2017 ވަނަ އަހަރަށް ސަރުކާރުން ލަފާކުރެއްވި 26.7 ބިލިޔަން ރުފިޔާގެ ބަޖެޓު ރައްޔިތުންގެ މަޖިލީހަށް މިއަދު ހުށަހަޅައިފިއެވެ.
މި ބަޖެޓް ސަރުކާރުގެ ފަރާތުން މަޖިލިހަށް ހުށަހަޅުއްވައިދެއްވީ ފިނޭންސް މިނިސްޓަރ އަޙުމަދު މުނައްވަރެވެ. އަންނަ އަހަރުގެ ބަޖެޓަކީ މިހިނގާ އަހަރަށް ހުށަހެޅުނު 27 ޕޮއިންޓް ހަތަރެއް ފަހެއް ބިލިޔަން ރުފިޔާގެ ބަޖެޓަށް ވުރެއް 0.75 ބިލިއަން ރުފިޔާގެ ކުޑަ ބަޖެޓެކެވެ. އަންނަ އަހަރަށް ލަފާކޮށްފައިވާ ބަޖެޓަކީ މިހާތަނަށް ތަރައްޤީގެ މަޝްރޫޢުތަކަށް އެންމެ ބޮޑު ހިއްސާއެއް ކަނޑައެޅިފައި އޮތް ބަޖެޓުކަން ފާހަގަކޮށްލެވެއެވެ.
2017 ވަނަ އަހަރަށް ފިނޭންސް މިނިސްޓަރ އަޙުމަދު މުނައްވަރު ހުށަހެޅުއްވި ބަޖެޓަކީ ތަރައްޤީގެ މަޝްރޫޢުތަކަށް އިސްކަންދޭ، ދައުލަތުގެ ރިކަރަންޓް ޚަރަދު ކުޑަކުރުމަށް ބާރު އަޅާ ބަޖެޓެކެވެ. އަދި ފަހުގެ ތާރީޚެއްގައި ރިކަރަންޓް ޚަރަދު ކުޑަކުރުމަށް ސިޔާސަތުތަކެއް ކަނޑައަޅައި، އެ ކަމަށް އަމާޒުކޮށް، ބަޖެޓު އެކުލަވާލެވުނު މިއީ ފުރަތަމަ ފަހަރުކަން ފާހަގަކޮށްލެވެއެވެ. އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށައަޅުއްވަމުން ފިނޭންސް މިނިސްޓަރ އަޚުމަދު މުނައްވަރު ވިދާޅުވީ ބަޖެޓްގެ 51އިންސައްތަ ހޭދަކުރަން ހަމަޖެހިފައިވަނީ ރިކަރަންޓް ޚަރަދުތަކަށް ކަމަށާއި 49 އިންސައްތަ ހިއްސާކުރާނީ ކެޕިޓަލް ޚަރަދުތަކަށް ކަމަށެވެ.
2017 ވަނަ އަހަރުގެ ބަޖެޓުގައި 13.2 ބިލިއަން ރުފިޔާ ކެޕިޓަލް ޚަރަދުގެ ގޮތުގައި ކަނޑައަޅާފައިވާއިރު، ކެޕިޓަލް ޚަރަދުގެ 60 އިންސައްތަ ހޭދަކުރެވޭނީ ޕަބްލިކް ސެކްޓަރ އިންވެސްޓްމަންޓް ޕްރޮގްރާމަށް ނުވަތަ ޕީ.އެސް.އައި.ޕީ އަށެވެ.
2017 ވަނަ އަހަރަށް ލަފާކުރާ ދައުލަތުގެ ބަޖެޓު އެކުލަވާލެވިފައިވަނީ، ސަރުކާރުން ފަށްޓަވާފައިވާ ތަރައްޤީގެ މަޝްރޫޢުތައް މެދުވެރިކޮށް އިޤްތިޞާދީ އާ ފުރުސަތުތައް އުފެއްދުމަށް ކަމަށާއި މި ބަޖެޓު އެކުލަވާލެވިފައި ވަނީ ރައްޔިތުންނަށް ފޯރުކޮށްދޭ ޚިދުމަތްތަކާއި ހިންގެމުންދާ އުމްރާނީ ތަރައްޤީގެ މަޝްރޫޢުތަކަށް ބުރޫ އެރިޔަނުދީ، ދައުލަތަށް ލިބޭ އާމްދަނީއިން ޚަރަދު ދެކޮޅު ޖެއްސުމާ ދިމާއަށް ކަމަށް މިނިސްޓަރ މުނައްވަރު ވިދާޅުވިއެވެ.
ފަތުރުވެރިކަމަށް އަންނާނެ ކަމަށް ލަފާކޮށްފައިވާ ކުރިއެރުންތަކާއި، އިމާރާތްކުރުމުގެ ޞިނާޢަތަށް އަންނަމުންދާ ހެޔޮބަދަލު އެ ގޮތުގައި ދެމިއޮންނާނެ ކަމުގެ އުއްމީދާއި އެކު އަންނަ އަހަރު ޤައުމުގެ އިޤްތިޞާދީ ދުވެލި އިތުރަށް ހަލުވިވެ، 4.7 އިންސައްތަ ކުރިއަރާނެ ކަމަށް ލަފާކުރައްވާކަމަށް މިނިސްޓަރ މުނައްވަރު ވިދާޅުވިއެވެ. އަދި މެދުރާސްތާގެ އަމާޒަކީ އިޤްތިޞާދީ ދުވެލި 5 އިންސައްތައަށްވުރެ އިތުރުވުން ކަމަށްވެސް މިނިސްޓަރ ވިދާޅުވިއެވެ.
އާމްދަނީއާއި ހިލޭ އެހީގެ ގޮތުގައި 2017 ވަނަ އަހަރު ދައުލަތަށް 21.9 ބިލިއަން ރުފިޔާ ލިބޭނެކަމަށް ލަފާކޮށްފައިވެއެވެ. މީގެ ތެރޭގައި ހިމެނެނީ، ޓެކުހުގެ ގޮތުގައި ލިބޭ 14.1 ބިލިއަން ރުފިޔާއެވެ. އަދި ޓެކްސް ނޫން ގޮތް ގޮތުން ލިބޭ 4.8 ބިލިއަން ރުފިޔާ އާއި، ހިލޭ އެހީގެ ގޮތުގައި ލިބޭ 876 މިލިއަން ރުފިޔާއާއި އާމްދަނީ އިތުރުކުރުމަށް ހުށަހަޅާ ކަންތައްތަކުން ލިބޭ 2 ބިލިއަން ރުފިޔާއެވެ.