ވާޖީނިއާގެ އައްސޭރިފަށާ ކައިރިން އެމެރިކާގެ އަސްކަރީ މަނަވަރަކަށް އަސްކަރީ ބޯޓެއް ޖައްސަން އުޅުމުގެ ތެރޭގައި ހިނގި ހާދިސާއެއްގައި 4 ސިފައިންނަށް އަނިޔާވެއްޖެއެވެ.
ހޯމަ ދުވަހުގެ އިރުއޮއްސި 6:18 ހާއިރު އެމެރިކާގެ ވާޖީނިއާގެ އައްސޭރިފަށާ ކައިރިން ދަތުރުކުރަމުންދިޔަ "ޔޫއެސްއެސް ޑްވައިޓް ޑީ އައިޒަންހާވަރު" މަނަވަރަށް ޖައްސަން އުޅުމުގެ ތެރޭގައި ހިނގި މި ހާދިސާއާ ގުޅިގެން، ބޯޓުގައި ތިބި 2 ޕައިލެޓުން ވަނީ ކުއްލި ޙާލަތުގައި ބޯޓުން ބޭރުވެ ކަނޑަށް ފުންމާލާފައެވެ. އެމެރިކާގެ ކަނޑުގެ އަސްކަރިއްޔާއިން މަޢުލޫމާތު ދެއްވި ގޮތުގައި، ސަލާމަތީ ބާރުތަކުން ވަނީ ދެ ޕައިލެޓުން މޫދުން ނަގައި، ރައްކާތެރިކަމާއެކު މަނަވަރަށް ގެންގޮސް ޞިއްޙީ ފަރުވާ ދޭން ފަށާފައެވެ.
މި ހާދިސާގައި އަނިޔާވި ހަތަރު ސިފައިންގެ ތެރެއިން އެކަކަށް އިތުރު ފަރުވާ ދިނުމަށްޓަކައި ވަނީ ނޯފޯކް ސަރަޙައްދުގެ ހަސްފަތާލަކަށް ބަދަލުކޮށްފައެވެ. ނަމަވެސް އެ މީހާއަށް ލިބިފައިވާ އަނިޔާތަކަކީ ފުރާނައަށް ނުރައްކާވާ ފަދަ ގެއްލުންތަކެއް ނޫން ކަމަށް އަސްކަރިއްޔާއިން ހާމަކުރެއެވެ. އަނެއް 3 ފަޅުވެރިންނަށް މަނަވަރުގެ ތެރޭގައި ވަނީ ފަރުވާދީފައެވެ. އަދި މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ޚާއްޞަ ތަޙުޤީޤެއް މިހާރު ދަނީ ކުރިއަށެވެ.
މި ހާދިސާގައި ބައިވެރިވި ބޯޓުގެ ތަފްޞީލު އަސްކަރިއްޔާއިން އަދި ހާމަކޮށްފައެއް ނުވެއެވެ. ނަމަވެސް، ނިމިޓްސް ކްލާހުގެ "އައިޒަންހާވަރު" މަނަވަރުގައި ޢާންމުކޮށް ބޭނުންކުރަނީ 2 މީހުންގެ ޖާގަ އޮންނަ އެފް/އޭ-18 ސުޕަރ ހޯނެޓް މަރުކާގެ ހަނގުރާމަމަތީ ޖެޓާއި، އީއޭ-18ޖީ ގްރޯލަރ ކަރަންޓު އެޓޭކް ޖެޓުތަކެވެ. 15 މަސްދުވަހުގެ މަރާމާތު މަސައްކަތަކަށްފަހު މިއަހަރުގެ އޭޕްރީލް މަހު އަލުން ޚިދުމަތަށް ނެރުނު މި މަނަވަރު ދިޔައީ އޮގަސްޓު މަހުގެ ނިޔަލަށްވެސް އަސްކަރީ ފަރިތަކުރުންތައް ފުރިހަމަކުރަމުންނެވެ.