އެއް މެންބަރަކު ފިޔަވައި އެހެން ހުރިހާ މެންބަރުންގެ މާލީ ބަޔާންތައް އާންމުކޮށްފި

ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައް އާންމުކޮށްފިއެވެ.

ރައްޔިތުންގެ މަޖިލީހުގެ މެންބަރުން މާލީ ބަޔާން ހުށަހަޅަންޖެހެނީ އެ މެންބަރަކު ހުވާ ކުރާ ތާރީޚުން ފެށިގެން އަހަރު ދުވަސް ހަމަވުމުންނެވެ. އެގޮތުން ބަލާއިރު މިހާރު ތިއްބެވި 20 ވަނަ މަޖިލީހުގެ މެންބަރުން މާލީ ބަޔާންތައް ހުށަހަޅަންޖެހެނީ ކޮންމެ އަހަރެއްގެވެސް އޯގަސްޓް މަހުގެ 31ވަނަ ދުވަހާ ހަމައަށެވެ.

މިއީ 20 ވަނަ މަޖިލީހުގެ މެންބަރުން ހުށަހަޅާ ދެވަނަ މާލީ ބަޔާންތަކެވެ. މި ބަޔާންތައް މަޖިލީހުގެ ވެބްސައިޓުގައި މިހާރު ވަނީ އާންމުކޮށްފައެވެ.

މާލީ ބަޔާން ހުށަހަޅަން ޖެހޭ މުއްދަތުގައި 93 މެންބަރުންގެ ތެރެއިން 91 މެންބަރުން ވަނީ ބަޔާންތައް ހުށަހަޅާފައެވެ. ބަޔާން ހުށަނާޅުއްވަނީ މައްޗަންގޮޅި އުތުރު ދާއިރާގެ މެންބަރު އިބްރާޙީމް މުޙައްމަދު އެކަންޏެވެ.

މަޖިލީހުގެ ހިތަދޫ އުތުރު ދާއިރާގެ ކުރީގެ މެންބަރު މުޙައްމަދު ސިނާންވެސް ވަނީ ދެވަނަ މާލީ ބަޔާން މަޖިލީހަށް ހުށަހަޅުއްވާފައެވެ. ސިނާން މަޤާމު މިއަހަރުގެ އޭޕްރިލްމަހު ގެއްލުނު ނަމަވެސް އެ މުއްދަތާ ހަމައަށް މެންބަރެއްގެ މަޤާމުގައި ހުންނެވުމުން މާލީ ބަޔާން ހުށަހަޅުއްވަންޖެހެއެވެ.

މިހާރު މަޖިލީހުގައި ތިއްބެވި މެންބަރުންގެ ތެރެއިން މާލީ ބަޔާން ހުށަހަޅުއްވަން ނުޖެހެނީ ހިތަދޫ އުތުރު ދާއިރާއަށް އަލަށް އިންތިޚާބުވެވަޑައިގެންނެވި މެންބަރު ޢަބްދުﷲ ޞާދިގެވެ. އޭނާ މަޤާމުގެ ހުވާކުރެއްވީ މިއަހަރުގެ ޖޫން މަހުގެ 15ވަނަ ދުވަހު ކަމަށްވާތީ އޭނާ މި މުއްދަތުގައި މާލީ ބަޔާން ހުށަހަޅުއްވަން ނުޖެހެއެވެ.

މެންބަރުން މާލީ ބަޔާން ހުށަހެޅުމަކީ މަޖިލީހުގެ ގަވާއިދުގެ ދަށުން ކޮންމެ މެންބަރަކުވެސް ކުރަންޖެހޭ ކަމެކެވެ. މި ބަޔާނުގައި ކޮންމެ މެންބަރެއްގެ މިލްކިއްޔާތުގައިވާ ފައިސާއާއި މުދަލުގެ މައުލޫމާތު އާންމުކުރެވޭނެއެވެ.