ޔަހޫދީ ދައުލަތުގެ އަސްކަރީ ބަންދުގައި ތިބޭ ފަލަސްޠީނުގެ ކުޑަކުދިންނަށް ކުރާ އަނިޔާތަކާއި، އިސްތިޢުމާރުކޮށްފައިވާ ހުޅަނގު އައްސޭރީގައި އެމެރިކާގެ 9 ރައްޔިތަކު މަރައިލި މައްސަލައާ ގުޅޭގޮތުން ރައީސް ޑޮނަލްޑް ޓްރަމްޕްގެ ސަރުކާރުން ރިޕޯޓެއް ހުށަހެޅުމަށް ގޮވާލައި އެމެރިކާގެ ޤާނޫނުހަދާ މަޖިލީހަށް ހުށަހެޅި ޤަރާރު ފާސްނުވެ ފޭލްވެއްޖެއެވެ.
އަންގާރަ ދުވަހު ނެގި މި ވޯޓުގައި ޤަރާރު ފޭލްވީ 53 ތާޢީދުނުކުރެއްވުމުންނެވެ. ޤަރާރު ފާސްކުރަން ވޯޓު ދެއްވީ 47 މެމްބަރުންނެވެ. މެމްބަރުން ވޯޓު ދެއްވާފައިވަނީ އާންމުކޮށް ސިޔާސީ ޕާޓީތަކުގެ ފިކުރާ އެއްގޮތަށެވެ. މި ޤަރާރާ ދެކޮޅަށް ވޯޓު ދެއްވި ހަމައެކަނި އިދިކޮޅު ޑިމޮކްރެޓިކް މެމްބަރަކީ ޕެންސިލްވޭނިއާގެ ސެނޭޓަރު ޖޯން ފެޓަރމަންއެވެ. އަދި ކެންޓަކީގެ ވެރިކަންކުރާ ރިޕަބްލިކަން ޕާޓީގެ މެމްބަރު ރޭންޑް ޕޯލް ވަނީ ޑިމޮކްރެޓުންނާ ގުޅިވަޑައިގެން މި ޤަރާރަށް ތާއީދުކުރައްވާ ވޯޓު ދެއްވާފައެވެ.
މި ގަރާރު ސެނެޓަށް ހުށަހެޅުއްވީ މޭރީލޭންޑްގެ ޑިމޮކްރެޓިކް ސެނޭޓަރު ކްރިސް ވެން ހޮލަންއެވެ. މި ޤަރާރު ހުށަހަޅުއްވަމުން އޭނާ ވަނީ، ޔަހޫދީ ދައުލަތުގެ ހަރުކަށި ބޮޑުވަޒީރު ބެންޖަމިން ނަތަންޔާހޫގެ ސަރުކާރުން ޖަވާބުދާރީވުމެއް ނެތި އަދި އެމެރިކާ ސަރުކާރުން އިންސާފު ހޯދައިދިނުމުގައި ނުކުޅެދިފައިވާކަން ފާހަގަކުރައްވައިފައެވެ. ޤަރާރު ހުށަހެޅި ޤާނޫނުގެ ދަށުން، އެމެރިކާގެ އަސްކަރީ އެހީ ލިބޭ ކޮންމެ ޤައުމެއްގެ އިންސާނީ ޙައްޤުތަކުގެ ޙާލަތާ ގުޅޭގޮތުން ޚާރިޖީ ވުޒާރާގެ ރަސްމީ ރިޕޯޓަކަށް އެދުމުގެ ބާރު ޤާނޫނުހަދާ މަޖިލީހުގެ މެމްބަރުންނަށް ލިބިގެންވެއެވެ.
ވޯޓަށްފަހު މީސްމީޑިއާގައި ކުރެއްވި ޕޯސްޓެއްގައި ވެން ހޮލަން ވިދާޅުވީ، ހުޅަނގު އައްސޭރީގައި މަރާލެވުނު އެމެރިކާގެ 9 ރައްޔިތުންނަށާއި، ކޮންމެ ދުވަހަކު އަނިޔާވެރިކަމާ ކުރިމަތިލާންޖެހޭ ފަލަސްޠީނުގެ ރައްޔިތުންނަށް އިންސާފު ހޯދައިދިނުމަށް އޭނާ ހުށަހެޅުއްވި ޤަރާރަށް 47 މެމްބަރުން ތާޢީދުކުރެއްވި ކަމަށެވެ. އަދި މިއީ މި މަސައްކަތުގައި މިހާތަނަށް ލިބުނު އެންމެ ބޮޑު ތާޢީދުކަން ފާހަގަކުރައްވައި، ރިޕަބްލިކަން މެމްބަރުން ހުރަސްއެޅި ނަމަވެސް، އިންސާފު ލިބެންދެން މި މަސައްކަތް ހުއްޓާނުލައްވާނެ ކަމަށް އޭނާ ވިދާޅުވިއެވެ.
ފޭލްކޮށްލި މި ޤަރާރުގައި ގޮވާލާފައިވަނީ، ޤަރާރު ފާސްވާތާ 30 ދުވަހުގެ ތެރޭގައި ސިއްރު ނޫން ރިޕޯޓެއް ޚާރިޖީ ވުޒާރާއިން ހުށަހެޅުމަށެވެ. އެ ރިޕޯޓުގައި އެމެރިކާ ރައްޔިތުން މަރުވި ހާދިސާތަކުގެ ތަޙުޤީޤުތަކާއި، ޔަހޫދީ ޖަލުތަކުގައި ބަންދުކޮށްފައި ތިބި އެމެރިކާ ރައްޔިތުންނާމެދު ޢަމަލުކުރާ ގޮތާއި، އަދި ޔަހޫދީ ދައުލަތުގެ އަސްކަރީ ބަންދުގައި ތިބޭ ފަލަސްޠީނުގެ ކުޑަކުދިންގެ ޙާލަތުގެ ތަފްޞީލު ހިމަނަންޖެހެއެވެ.
މި ޤަރާރުގައި 2022 ވަނަ އަހަރުގެ ޖަނަވަރީ މަހުން ފެށިގެން ހުޅަނގު އައްސޭރީގައި ޔަހޫދީންގެ ޙަމަލާތަކުގައި މަރުވި އެމެރިކާގެ 9 ރައްޔިތުންގެ މައްސަލަ ފާހަގަކޮށްފައިވެއެވެ. ހަމައެއާއެކު، ޔަހޫދީންގެ ސަލާމަތީ ބާރުތަކުން ފަލަސްޠީނަށް ނިސްބަތްވާ އެމެރިކާގެ ކުޑަކުދިން ހައްޔަރުކޮށް ކުރާ އަނިޔާތައްވެސް ޤަރާރުގައި ބަޔާންކޮށްފައިވެއެވެ.
މި ޤަރާރުގައި ފާހަގަކޮށްފައިވާ ގޮތުގައި، 2023 ވަނަ އަހަރުގެ އޮކްޓޯބަރު މަހުގެ 7ވަނަ ދުވަހުގެ ފަހުން ޔަހޫދީންގެ ނިރުބަވެރި އަސްކަރީ ކޭމްޕްތަކުގައި މަދުވެގެން ފަލަސްތީނުގެ 44 މީހުން ވަނީ ޝަހީދުވެފައެވެ. އަދި ޤައިދީންނަށް ތަޅައި އަނިޔާކުރުމާއި، ޖިންސީ ގޯނާކުރުމާއި، ފުރައްސާރަކުރުން ފަދަ ކަންކަން ރޭވިގެން ކުރަމުންދާކަން އިންސާނީ ޙައްޤުތަކަށް މަސައްކަތްކުރާ ޖަމާއަތްތަކުން ވަނީ ހާމަކޮށްފައެވެ.
މީގެއިތުރުން ހުޅަނގު އައްސޭރީގައި ޔަހޫދީ ވަޒަންވެރިން ހިންގާ ނިރުބަވެރި ޢަމަލުތައް އިތުރުވަމުންދާއިރު، 2020 ވަނަ އަހަރުން ފެށިގެން ފަލަސްޠީނުގެ އާންމުން މަރާލި އެއްވެސް ވަޒަންވެރިއެއްގެ މައްޗަށް ކުށް ސާބިތުވެ، އިންސާފު ޤާއިމުކުރެވިފައި ނުވާކަންވެސް މި ޤަރާރުގައި ހިމަނާފައިވެއެވެ.