ތަކަންދޫ އެވޭލާ ހިރިގަލާއި، ގަބުރުސްތާން މަރާމާތުކުރުމުގެ މަސައްކަތް ނިމެނީ

ހއ.ތަކަންދޫގެ އެވޭލާ ހިރިގަލުގެ މަސައްކަތާއި، އެ ރަށުގެ ގަބުރުސްތާން ސަރަހައްދު މަރާމާތުކުރުމުގެ މަސައްކަތުގެ ބޮޑު ބައެއް ނިމިފައިވާ ކަމަށް ތަރިކައާބެހޭ ވުޒާރާއިން ހާމަކޮށްފިއެވެ.

މި މަޝްރޫޢަކީ، ޣާޒީ ބަންޑާރައިންގެ އަސަރުތައް ހިމާޔަތްކޮށް ދެމެހެއްޓުމާއި ތަރިކައިން އާމްދަނީ ހޯދުމުގެ މަޝްރޫޢުގެ ދަށުން ކުރިއަށްގެންދާ މަސައްކަތެކެވެ. ފަންނާއި ސަޤާފަތާއި ތަރިކައާބެހޭ ވުޒާރާއިން މަޢުލޫމާތު ދެއްވި ގޮތުގައި، މި މަޝްރޫޢުގެ ދަށުން ތަކަންދޫގައި ކުރިއަށްދާ މަރާމާތުގެ 90 އިންސައްތަ މަސައްކަތް މިހާރު ވަނީ ނިމިފައެވެ.

ބިމުގެ ގޮތުން ގާތްގަނޑަކަށް 40 ހެކްޓަރުގެ ބޮޑު ތަކަންދުއަކީ، 600 އެއްހާ މީހުންގެ އާބާދީއެއް އޮންނަ ރަށެކެވެ. ނަމަވެސް އެރަށުގައި ދިރިއުޅެމުންދަނީ، 200 އެއްހާ މީހުންނެވެ. މިއީ ޕޯޗުގީޒުންގެ އަތްދަށުން ރާއްޖެ ސަލާމަތް ކުރުމަށް އުތީމު ތަކުރުފާނުން ކުރެއްވި ޖިހާދުގެ ބައެއް ހާދިސާތަކާ ގުޅިފައިވާ ތާރީޚީ މުހިންމު ރަށެކެވެ. އެ ރަށުގައި ހުރި ޤަދީމީ ބިނާތަކުގެ ތެރޭގައި ރަށުގެ ހޭޅިފަށް ސަރަޙައްދުގައި ހުންނަ އަލިތަކުރުފާނު ޒިޔާރަތް ހިމެނެއެވެ.

ޣާޒީ ބަންޑާރައިންގެ އަސަރުތައް ހިމާޔަތްކޮށް ދެމެހެއްޓުމާއި ތަރިކައިން އާމްދަނީ ހޯދުމުގެ މަޝްރޫޢުގެ ދަށުން ހއ.ތަކަންދޫގެ އެވޭލާ ހިރިގަލުގެ މަސައްކަތާއި ވެވު (ގަބުރުސްތާން ސަރަހައްދު) މަރާމާތުކުރުމުގެ މަސައްކަތުގެ %90 ނިމިއްޖެ. pic.twitter.com/HGnufpZHlJ

— Ministry of Arts, Culture and Heritage (@MoDLCH) September 30, 2026

ތަކަންދޫގައި އޮތް އެންމެ ޝައުޤުވެރި އެއް ތާރީޚީ ތަނަކީ، އެ ރަށުގައި އޮންނަ ހިރިގަލު ގަބުރުސްތާނެވެ. މިއީ، ރާއްޖޭގައި އޮތް ހިރިގަލުގެ އެންމެ ބޮޑު ގަބުރުސްތާނެވެ. އެންމެ ގިނަ ބަޔަކު ދަންނަ އައްޑޫ ހުޅުދޫ ކޯގަންނު ގަބުރުސްތާނުގައި 1500 އެއްހާ ހިރިގަލު މަހާނަ ހުރިއިރު، ތަކަންދޫގެ މި ގަބުރުސްތާނުގައި 1700 އަށްވުރެ ގިނަ މަހާނަ ޖޯޑު ފެންނަން އެބަހުއްޓެވެ. މީގެ އިތުރުންވެސް އެ ރަށުގައި އިތުރު ތިން ގަބުރުސްތާނު އޮވެއެވެ.

ގަބުރުސްތާނުގައި ހުރި ބައެއް ހިރިގަލު މަހާނަތަކުގައިވާ ލިޔުންތަކަށް ބަލާއިރު، މި ތަނަށް 350 އެއްހާ އަހަރު ވެދާނެ ކަމަށް ބެލެވެއެވެ. ބައެއް ގާތަކުގައި ހިޖުރައިން 1122ގެ ތާރީޚު ލިޔެފައިވާއިރު، އޭރުގެ ޢިއްޒަތްތެރިންނާއި، ބޮޑުން އަދި ޢާންމު ރައްޔިތުންނާއި ގިނަ އަދަދެއްގެ ތުއްތު ކުދިންގެ މަހާނަތައް އެކި ފަންތީގެ ހައިބަތު ދައްކުވައިދޭ ގޮތަށް ފެންނަން އެބަހުއްޓެވެ. މީގެ އިތުރުން ހިރިގަލުގެ 8 ކަން ވަޅަކާއި، އާނުގެ 4 ކަން ވަޅެއް، އިތުރު ވަޅަކާއި ވެވެއްގެ އިތުރުން އިހުގެ ހުކުރު މިސްކިތާއި ޢީދު މިސްކިތުގެ ފާރުން ބައެއް ވެސް އެ ސަރަޙައްދުގައި ހިމެނެއެވެ.

ރަށުގެ ރައްޔިތުންގެ އެދުމަކީ ރަށުގައި ހުރި މިފަދަ އާސާރީ ބިނާތައް ފުރިހަމައަށް ދިރާސާކުރެވި، ޙިމާޔަތްކޮށް، އަންނަން އޮތް ޖީލުތަކަށް މި ތާރީޚު ފޯރުކޮށްދިނުމެވެ. އަދި އެތަންތަން ދާއިމީކޮށް ބެލެހެއްޓޭނެ އިންތިޒާމު ހަމަޖެހި، ރާއްޖޭގެ ހިރިގަލުގެ އެންމެ ބޮޑު ގަބުރުސްތާނަކީ ޤައުމީ ތަރިކައިގެ ލިސްޓުގައި ޚާއްސަ އިސްކަމެއްދެވިފައިވާ ތަނަކަށް ވުމެވެ.