އައްޑޫ ސިޓީ ކަރަންޓުގެ ޚިދުމަތާއި ސްޓެލްކޯއިން ރަސްމީކޮށް ހަވާލުވެއްޖެ

އައްޑޫ ސިޓީ ކަރަންޓުގެ ޚިދުމަތާއި ސްޓޭޓް އިލެކްޓްރިކް ކޮމްޕެނީ، ސްޓެލްކޯއިން ރަސްމީކޮށް ހަވާލުވެއްޖެއެވެ.

ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ރަސްމީކޮށް ފެށުމަށްޓަކައި މިއަދު އައްޑޫ ސިޓީ ހިތަދޫގައި ދިދަ ނެގުމުގެ ޚާއްޞަ ރަސްމިއްޔާތެއް ވަނީ ބާއްވާފައެވެ. މި ރަސްމިއްޔާތުގައި ޤައުމީ ދިދަ ނަންގަވައިދެއްވީ ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒުވަރާއި، ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާއެވެ.

މި ރަސްމިއްޔާތުގައި ވާހަކަ ދައްކަވަމުން ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒުވަރު ވަނީ މީގެ 17 އަހަރު ކުރިން ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ދެމުން އައިކަން ފާހަގަކުރައްވާފައެވެ. އަދި އައްޑޫ ސިޓީގެ ކަރަންޓުގެ ޚިދުމަތް އަލުން އަނބުރާ ސްޓެލްކޯއާ ޙަވާލުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކީ އައްޑޫގެ ރައްޔިތުންނަށް އިތުބާރުހުރި، ދެމެހެއްޓެނިވި ޚިދުމަތެއް ކަށަވަރުކޮށްދެއްވުމަށް އެޅުއްވި މުހިންމު ފިޔަވަޅެއް ކަމަށް ޑރ. އަޒުވަރު ވިދާޅުވިއެވެ.

ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ރަސްމީކޮށް ފެށުމަށްޓަކައި މިއަދު އައްޑޫ ސިޓީ ހިތަދޫގައި ޚާއްޞަ ދިދަ ނެގުމުގެ ރަސްމިއްޔާތެއް ވަނީ ބާއްވާފައި. މި ރަސްމިއްޔާތުގައި ޤައުމީ ދިދަ ނަންގަވައިދެއްވީ ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒުވަރު. އަދި ސްޓެލްކޯގެ ދިދަ… pic.twitter.com/U2NgajwWsz

— STELCO (@STELCOMALDIVES) September 30, 2026

އައްޑޫ ސިޓީއަށް ދިމާވެފައިވާ ކަރަންޓުގެ މައްސަލައަކީ ޒަމާނުއްސުރެ އެސިޓީއަށް ދިމާވެފައިވާ އެންމެ ބޮޑު އެއް މައްސަލައެވެ. މި މައްސަލައަށް ހައްލު ގެނައުމަށް އެކި ސަރުކާރުތަކުން ވަނީ މަސައްކަތްތަކެއް ކުރައްވާފައެވެ. ނަމަވެސް އަދިވެސް އެ ސިޓީގެ ކަރަންޓުގެ މައްސަލައަށް އެދެވޭ ހައްލެއް ލިބިފައެއްނުވެއެވެ.

އައްޑޫ ކަރަންޓުގެ މައްސަލައަށް ހައްލު ގެނައުމަށްޓަކައި މި ސަރުކާރު ވެރިކަމާ ހަވާލުވިފަހުން އެކި މަރުޙަލާތަކުގައި މުހިންމު ގިނަ މަސައްކަތްތަކެއް ކުރަމުންދާކަން ފާހަގަކޮށްލެވެއެވެ. އަދި ކަރަންޓުގެ މައްސަލައަށް ދާއިމީ ހައްލެއް ގެނައުމަށްޓަކައި، އައްޑޫ ސިޓީގައި ސެންޓްރަލް ޕަވަރ ސްޓޭޝަނެއް ގާއިމްކުރުމަށް ދުބާއީގެ ކުންފުންޏެއްކަމަށްވާ ޑެފިނިޓް ސޮލިއުޝަންސްއާ ވަނީ ހަވާލުކޮށްފައެވެ.

މި މަޝްރޫޢުގެ ދަށުން އައު އިންޖީނުގެ ތަރައްޤީކުރުމާއި، 5.2 މެގަވޯޓުގެ ލޯ-ސްޕީޑު 5 ޖަނަރޭޓަރު އިންސްޓޯލްކުރުމުގެ އިތުރުން، ބެލްޖިއަމުން އޮން-ގްރައުންޑް ތަމްރީންތައް ދިނުމަށް ވަނީ ހަމަޖެހިފައެވެ. އަދި ގްރިޑަށް ކަރަންޓު ދިނުމާ ހަމައަށް ކުރަންޖެހޭ ހުރިހާކަމެއް ކުރުމާއި، ފިޔުލް ފާރމެއް ޤާއިމުކުރުމުގެ އިތުުރުން، ބަންކަރިންގެ ޚިދުމަތް ދިނުމަށްވެސް ހަމަޖެހިފައިވެއެވެ.

މި މަޝްރޫޢުގެ ޢަމަލީ މަސައްކަތް ނިމުމާއެކު، އައްޑޫގެ ސެންޓްރަލް ޕަވަރ ސްޓޭޝަނުގައި 26.37 މެގަވޯޓުގެ ކަރަންޓު އުފެއްދުމުގެ ޤާބިލްކަން ހުންނާނެއެވެ. މިއާއެކު 20 އަހަރަށް ދަތިނުވާ ވަރަށް އައްޑޫ ސިޓީގައި ކަރަންޓު ކެޕޭސިޓީ ހުންނާނެކަމަށް ސަރުކާރުން ވިދާޅުވެއެވެ.

އައްޑޫ ސިޓީ ސެންޓްރަލް ޕަވަރ ސްޓޭޝަނަކީ ގަން ހިމަނައިގެން ޖުމްލަ 5 އަވަށަށް ކަރަންޓުގެ ޚިދުމަތް ދިނުމަށް މިވަގުތު ބޭނުންކުރަމުން އަންނަ ސްޓޭޝަނެކެވެ. މީގެ ތެރޭގައި އައްޑޫ ސިޓީ ހިތަދޫ، މަރަދޫ، މަރަދޫ ފޭދޫ، ފޭދޫ އަދި ގަން ހިމެނެއެވެ.