ވަގުތު ފާއިތުވެ ނޭޕާލަށް އަންނަ މަހު ފަށާ ސާފް ޗެމްޕިއަންޝިޕް ފުޓުބޯޅަ މުބާރާތުން ފުރުސަތު ގެއްލިއްޖެއެވެ.
ދެކުނު އޭޝިޔާގެ ފުޓުބޯޅ ފެޑަރޭޝަން (ސާފް)އިން ނޭޕާލް މުބާރާތުގައި ބައިވެރި ކުރަން ދީފައިވާ ފުރުސަތުގެ މުއްދަތު ހަމަވީ އިއްޔެއެވެ. ސެޕްޓެމްބަރު މަހުގެ 30 ވަނަ ދުވަހުގެ ކުރިން ނޭޕާލުން ފީފާގެ ސަސްޕެންޝަނުން ސަލާމަތްވާން ޖެހެއެވެ.
ނަމަވެސް ސެޕްޓެމްބަރު މަހުގެ ތެރޭގައި މި ސަސްޕެންޝަނުގެ މައްސަލަ ވަނީ އިތުރަށް ގޯސްވެފައެވެ. އެއީ ނޭޕާލްގެ ފުޓުބޯޅަ ފެޑަރޭޝަނުގެ ޚަޒާންދާރާއި އެ ނޫން ވެސް މާލީ ކަންކަމާ ގުޅޭ ބައެއް އޮފިޝަލުން ހައްޔަރުކޮށް ސަރުކާރުން ކުރިއަށް ގެންދާ ތަހުގީގު ފުޅާ ކުރުމުންނެވެ.
"އަހަރުމެން އުއްމީދު ކުރީ ނޭޕާލުން ސެޕްޓެމްބަރު 30ގެ ކުރިން މިކަން ހައްލު ކުރާނެ ކަމަށް. އަދި ސަސްޕެންޝަނުން އަރައި ގަންނާނެ ކަމަށް. ބަނގްލަދޭޝްއަށް ފަހު މި މުބާރާތުގައި އެންމެ ފޯރި ނެގި އެއް ބަޔަކީ ނޭޕާލް. އަދި ނޭޕާލެ ކުޅޭނަމަ މުބާރާތް ވާދަވެރިވާނެ،" ސާފްގެ ޖެނެރަލް ސެކްރެޓަރީ ޕުރުޝޮޓަމް ކަޓޭލް ވިދާޅުވިއެވެ.
އޭނާ ވިދާޅުވީ ނޭޕާލް ނެތި މުބާރާތް ކުޅުމަކީ މުބާރާތުގެ ވާދަވެރިކަމާއި ފޯރިއަށް ވެސް ބަދަލު އަންނާނެ ކަމެއް ކަމަށް ސާފުން ގަބޫލު ކުރާ ކަމަށެވެ. މިހެންވެ ނޭޕާލަށް މުބާރާތުގައި ވާދަކުރެވޭނެ އެއްވެސް ގޮތެއް އޮތްތޯ ބަލައި ފީފާ އާއި އޭއެފްސީގެ ރަސްމީ ޖަވާބަކަށް އިންތިޒާރު ކުރާނެ ކަމަށެވެ.
ފީފާގެ ސަސްޕެންޝަނުން އަރައިނުގަނެ ދެކުނު އޭޝިޔާގެ އެންމެ ވާދަވެރި މުބާރާތުގައި ނޭޕާލަށް ބައިވެރިވެވެން އޮންނާނެ ހަމައެކަނި ގޮތަކީ އެ ގައުމުގެ ނަމުގައި މުބާރާތް ނުކުޅުމެވެ. އޭރުން ކުޅެން ޖެހޭނީ މުޅިން އެހެން ނަމެއްގައެވެ. ގައުމީ ދިދަ އާއި އެނޫން ވެސް ގައުމު ތަމްސީލުވާނެ އެއްވެސް އާލާތެއް ވެސް ބޭނުމެއް ނުކުރެވޭނެއެވެ.
ސާފް ޗެމްޕިއަންޝިޕް ބާއްވާނީ އަންނަ ނޮވެމްބަރު މަހުގެ ހަތަރަކުން 17 އަށް ބަނގްލަދޭޝްގައެވެ. މުބާރާތުގައި ދިވެހިރާއްޖެ ހިމެނެނީ މުބާރާތުގެ އެންމެ ކާމިޔާބު ގައުމު އިންޑިޔާ އާއި ޕާކިސްތާނާއެކު ގްރޫޕް ބީގައެވެ. ގްރޫޕް އެގައި ހިމެނެނީ ބަނގްލަދޭޝް އާއި ބޫޓާނާއި ސްރީލަންކާއެވެ. ރާއްޖެ ވަނީ މި މުބާރާތް 2008 އާއި 2018ގައި ކާމިޔާބު ކޮށްފައެވެ.