ފަލަސްޠީނުގެ ޣައްޒާގައި ފެންބޮޑުވުމުން ރައްކާތެރިވުމަށާއި އެހީއަށް އޮތް އެންމެ ބޮޑު ހުރަހަކީ ޣައްޒާގެ ބިމުގެ %65 އަށް ވަނުމަށް ޔަހޫދީ ފައުޖުން ހުރަސްއެޅުން ކަމުގައި އެކުވެރި ދައުލަތްތަކުން (އދ) ހާމަކޮށްފިއެވެ. ނޫސްވެރިންނާ ވާހަކަފުޅު ދައްކަވަމުން އދގެ ތަރުޖަމާނު ސްޓިފަން ދުޖަރީކް ވިދާޅުވީ، ޣައްޒާގެ ބާކީ އޮތް %35 ސަރަޙައްދު މިހާރުވެސް އޮތީ ވަރަށް ބޮޑަށް ތޮއްޖެހިފައި ކަމުގައެވެ. އަދި، މި ކަމާ ގުޅިގެން އިންސާނީ އެހީ ފޯރުކޮށްދޭ ޖަމާޢަތްތަކަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމުގައެވެ.
ފިނި މޫސުމުގައި ފެންބޮޑުވުމުގެ ކާރިސާތަކުން ޢާއިލާތައް ސަލާމަތްކުރުމަށް އަޅަންޖެހޭ ފިޔަވަޅުތައް އދގެ އިންސާނީ އެހީދޭ ޖަމުޢިއްޔާއާއި (އޯސީއެޗްއޭ) ބައިވެރިން ދަނީ ވަޒަންކުރަމުންނެވެ. މި ގޮތުން، ބަލިކަށި ޢިމާރާތްތައް ހުރި ސަރަޙައްދުތަކުން ނުކުންނަން ބޭނުންވާ މީހުންނަށް ވަގުތީ ބޯހިޔާވަހިކަން ދިނުމަށް ތިން ތަނެއް ވަނީ ބަލާފައެވެ. މީގެ އިތުރުން، ޣައްޒާގެ އާބާދީގެ ފަސްބައިކުޅަ އެއްބައި ދިރިއުޅޭ 450 އަށްވުރެ ގިނަ ރެފިއުޖީ ކޭމްޕްތަކުގެ ޙާލަތު ވެސް ދަނީ ބަލަމުންނެވެ. މީހުން ބަދަލުކުރުމަށް ޓަކައި ގޮވާތަކެތި ސާފުކުރުމާއި، ބިންގަނޑު އެއްވަރުކުރުމާއި، ފެނާއި ކަރަންޓު ވިއުގަ ޤާއިމުކުރުމުގެ އިތުރުން މަގުތައް ހެދުން ފަދަ ކަންކަން ކުރަންޖެހޭނެ ކަން ދުޖަރީކް ފާހަގަކުރެއްވިއެވެ.
އިންސާނީ އެހީދޭ ޖަމާޢަތްތަކަށް ލޮޖިސްޓިކް ގިނަ ހުރަސްތަކެއް ކުރިމަތިވެފައިވާއިރު، ބަރު މެޝިނަރީއާއި، ސްޕެއަރ ޕާޓްސްއާއި، އިންޖީނަށް އަޅާ ތެލުގެ އިތުރުން ޒަރޫރީ ސާމާނު އެތެރެކުރުމަށް ޔަހޫދީންގެ ހުއްދައަށް އެދިފައިވާ ކަން ވެސް އޭނާ ހާމަކުރެއްވިއެވެ. މި ހުރަސްތަކާހުރެ، ޞިއްޙީ ފަރުވާ ފޯރުކޮށްދިނުމަށް ވަނީ ވަރަށް ބޮޑަށް ދަތިވެފައެވެ. ޚާއްޞަކޮށް ކެންސަރު ބަލީގެ ފަރުވާއަށް ބޭނުންވާ ކީމޯތެރަޕީއާއި ރޭޑިއޯތެރަޕީއަށް ބޭނުންވާ އާލާތްތަކާއި ސާމާނު މަދުވެފައިވާއިރު، ބަލި ދެނެގަންނަ ނިޒާމުތަކަށް ބޭނުންވާ ނިޒާމުތަކަށް ކަރަންޓު ދިނުމަށް ބޭނުންކުރާ ޖަނަރޭޓަރުތަޖަށް ބޭޞުންވާ ތެލާއި މެކޭނިކަލް ސާމާނު ވަރަށް ބޮޑަށް މަދުވެފައިވާ ކަމުގައި އދ އިން ހާމަކުރެއެވެ.
2025 އޮކްޓޫބަރުގައި ގަތުލުއާންމުގެ ހަމަލާތައް ހުއްޓާލުމަށް ޔަހޫދީ ފައުޖުން އެއްބަސްވި ނަމަވެސް، އެއާ ޚިލާފަށް ދީފައިވާ ނިރުބަވެރި ހަމަލާތަކުގައި ފަލަސްޠީނުގެ 1،431 މީހުން ޝަހީދުކޮށް، 5،026 މީހުން ޒަޚަމްކޮށްލާފައިވާ ކަމުގައި ޣައްޒާގެ ޞިއްޙަތާބެހޭ ވުޒާރާއިން ހާމަކުރިއެވެ. 2023 އޮކްޓޫބަރުގައި ޣައްޒާގެ ރައްޔިތުންގެ ނަސްލުހޭދުކުރުމަށް ޔަހޫދީން ފެށި ޤަތުލުޢާންމުގައި މިހާތަނަށް ފަލަސްޠީނުގެ 74،000 އަށްވުރެ ގިނަ މީހުން ޝަހީދުކޮށްލައި، 175،000 އަށްވުރެ ގިނަ މީހުން ވަނީ ޒަޚަމްކޮށްލާފައެވެ.