2006 ގެ ވޯލްޑް ކަޕްގައި ހިނގާދިޔަ ހާދިސާ އާމެދު ހިތާމައެއް ނުކުރަން: ޒިދާން

2006 ވަނަ އަހަރު އިޓަލީވިލާތާއި ފަރަންސޭސިވިލާތުގެ މެދުގައި ކުޅުނު ފީފާ ވޯލްޑް ކަޕްގެ ފައިނަލް މެޗު ނިމެން ކައިރިވެފައިވަނިކޮށް ހިނގާދިޔަ ހާދިސާއާމެދު ހިތާމަ ނުކުރާކަމަށް ފަރަންސޭސި ޤައުމީ ޓީމުގެ އޭރުގެ ކެޕްޓަން އަދި މިހާރު އެޓީމުގެ ކޯޗު ޒިނެޑީން ޒިދާން ބުނެފިއެވެ.

އޭނާ މިހެން ބުނެފައިވަނީ މިހާރު ކުރިއަށްދާ ޔުއޭފާ ނޭޝަންސް ލީގުގެ ލީގު އޭގެ ގްރޫޕް އެކެއްގައި މިރޭ ފަރަންސޭސީން އާއި އިޓަލީވިލާތާއި ދެމެދު ކުޅުމަށް ހަމަޖެހިފައިވާ މެޗުގެ ކުރިން ނޫސްވެރިންނާއި ވާހަކަ ދައްކަމުންނެވެ. 2006 ވަނަ އަހަރުގެ ފައިނަލް މެޗުގައި ޒިދާންވަނީ މެޗު ނިމެން ގާތްވެފައިވަނިކޮށް އިޓަލީވިލާތުގެ ޑިފެންޑަރ މާކޯ މަޓެރާޒީ އޭނާ ރުޅިއަރުވާލުމާއި ގުޅިގެން އޭނާއަށް ބޮލުން ހަމަލާ ދީފައެވެ. އަދި ނަތީޖާ އަކަށް ވެގެންދިޔައީ ޒިދާންއަށް ރަތްކާޑު ދައްކާ މެޗުގެ ބާކީ އޮތްބައި ފަރަންސޭސީން އެއްް ކުޅުންތެރިޔަކު މަދުކޮށް ކުޅުމެވެ. މިމެޗު ޕެނަލްޓީ ޖަހައިގެން ކާމިޔާބު ކޮށްފައިވަނީ އިޓަލީވިލާތުންނެވެ.

ޒިދާން ބުނީ އޭނާ އެކަމާއި ހިތާމަ ނުކުރާކަމަށާއި އެއީ އޭނާގެ ކެރިއަރުގެ ބައެއް ކަމަށެވެ. ނަމަވެސް އެމެޗުގައި އޭނާއަށް ކަންތައް ކުރެވުނު ގޮތާމެޗު ފަހުރުވެރި ނުވާ ކަމަށާއި އަދި އެކަމާއި ގުޅިގެން ބުނެވެން އޮތީ ކުރިންވެސް އެކަމާއި ގުޅޭގޮތުން ބުނެފައިވާ ފަދައިން އެއީ އޭނާގެ ކެރިއަރުގެ ބައެއް ކަމަށެވެ. އަދި މިވަގުތު އެންމެ އިސްކަމެއް ދެނީ މިހާރުގެ ފަރަންސޭސި ޓީމަށް ކަމަށާއި މިވަގުތު މުހިންމީ ކުރިއަށް އޮތް މެޗު ކާމިޔާބު ކުރިން ކަމަށެވެ.

ޒިދާންގެ ކޯޗު ކަމުގެ ދަށުން ފަރަންސޭސި ޓީމުން ނޭޝަންސް ލީގުގައި މިހާތަނަށް ކުޅުނު ދެ މެޗުވެސް ވަނީ ކާމިޔާބު ކޮށްފައެވެ. އަދި މިވަގުތު އުޅެނީ އެޓީމު ހިމެނޭ ގްރޫޕްގެ އެއްވަނައިގައެވެ. ނަމަވެސް ޒިދާން ބުނީ އެންމެ ފަހު މެޗުގައި ތުރުކީޔޭ 4 ލަނޑު އެއް ލަނޑުން ބަލިކުރި އިޓަލީވިލާތަކީ ވަރަށް ނުރައްކާތެރި ޓީމެއް ކަމަށާއި އެޓީމާއި ދެކޮޅަށް ކުޅެން ފަސޭހަ ނުވާނެ ކަމަށެވެ. ޒިދާން ބުނިގޮތުގައި އިޓަލީވިލާތަކީ މެޗު ތެރޭގައި ފާހަގަ ކޮށްލެވޭ ކަންތައްތައް ކުރުމުގެ ގާބިލްކަން ހުރި ޓީމެއް ކަމަށެވެ.

އިޓަލީވިލާތުގެ ކޯޗު ރޮބާޓޯ މަންޗީނީ ބުނީ ފަރަންސޭސިވިލާތާއި ދެކޮޅަށް ކުޅޭ މެޗަކީ ޒުވާން ކުޅުންތެރިން ނިސްބަތުން ގިނަ އިޓަލީވިލާތުގެ ޓީމުގެ ފެންވަރު ސާބިތު ކޮށްދިނުމަށް ލިބޭ ފުރުސަތެއް ކަމަށެވެ. މަންޗީނީ ބުނީ ފަރަންސޭސި ޓީމުގައި ތިބީ މުޅިންވެސް ފާހަގަ ކޮށްލެވޭ މޮޅެތި ކުޅުންތެރިން ކަމަށާއި އޭގެ ބަދަލުގައި އިޓަލީވިލާތުން މިއަންނަނީ ޒުވާން ގިނަ ކުޅުންތެރިން ތަކަކާއެކު ޓީމެއް ބިނާ ކުރެވޭތޯ މަސައްކަތް ކުރަމުން ކަމަށެވެ. އެހެން ކަމުން މިއީ މިޓީމު މިހާރު އޮތް ހާލަތު ދެނެގަންނަން ލިބިގެންދާނެ ރަނގަޅު ފުރުސަތެއްގެ ގޮތުގައި މަންޗީނީ ސިފަކުރިއެވެ.

މިގްރޫޕަށް ބަލާއިރު ކުޅުނު ދެމެޗު ކާމިޔާބު ކޮށް ފަރަންސޭސީން 6 ޕޮއިންޓާއެކު ގްރޫޕްގެ އެއްްވަނައިގާ އުޅޭއިރު ދެވަނައިގާ 3 ޕޮއިންޓާއި އެކު އުޅެނީ ބެލްޖިއަމް އެވެ. އަދި އިޓަލީވިލާތް އުޅެނީ 3 ޕޮއިންޓާއެކު ތިން ވަނައިގައެވެ. އަދި ހަތަރު ވަނައިގާ އުޅެނީ ކުޅުނު ދެމެޗުންވެސް ބަލިވެފައިވާ ތުރުކީޔޭއެވެ. ފަރަންސޭސިވިލާތާއި އިޓަލީވިލާތުގެ މެދުގައި މިރޭ ކުޅޭ މެޗު ކުޅުމަށް ހަމަޖެހިފައިވަނީ ފަރަންސޭސިވިލާތުގައެވެ.