އެމެރިކާއިން އަލުން ޢުދުވާނީ ހަމަލާތަކެއް ދީފިނަމަ، ކުރިއަށްވުރެ ވަރުގަދަ ރައްދެއް ދިނުމަށް އީރާނުން ތައްޔާރުވަމުންދާ ކަމުގައި މަޞްދަރުތަކުން ބުނެފިއެވެ. ޚާރިޖީ މަޝްވަރާތަކުން ކާމިޔާބު ލިބުމުގެ ފުރުސަތު ކުޑަކަމުގައި އީރާނުގެ އިސްވާރުން ދެކިވަޑައިގަންނަވާއިރު، އެމެރިކާގެ ޣައިރުޤާނޫނީ ހަނގުރާމައަށް އެއްބާރުލުންދޭ ޤައުމުތަކަށާއި މެދުއިރުމަތިން ބޭރުގެ އަމާޒުތަކަށް ހަމަލާދިނުމަށް އީރާނުގެ އަސްކަރީ ކޮމާންޑަރުން ރާއްވަވަމުން ގެންދަވާ ކަމުގައި މަޞްދަރުތަކުން ބުންޏެވެ. ދެ ފަރާތުން ވެސް ދޫދޭން ބޭނުންނުވާތީ، ރައީސް މަސްޢޫދު ޕީޒިޝްކިޔާން ނިއު ޔޯކުން އެނބުރި ވަޑައިގެންނެވުމަށް ފަހު މި ރޭވުންތައް އިތުރަށް ވަރުގަދަކޮށްފައިވާ ކަމުގައި ވެސް މަޞްދަރުތަކުން ބުންޏެވެ.
ފެބުރުވަރީ 28 ގައި އެމެރިކާ އަދި ޔަހޫދީން ފެށި ޣައިރުޤާނޫނީ ހަނގުރާމައަށް ހަތް މަސް ވެފައިވާއިރު، 40 ދުވަހަށް ފަހު އެޕްރީލު 8 ގައި ހަމަލާތައް ހުއްޓާލުމަށް ފަހުވެސް ކުރިމަތިލުންތައް ދަނީ ހިނގަމުންނެވެ. އެމެރިކާއިން އަލުން ހަމަލާދީފިނަމަ، ހުރްމުޒް ކަނޑުއޮޅިން ފެށިގެން އެމެރިކާގެ މަޞްލަޙަތުތަކާ ދެކޮޅަށް ފިޔަވަޅު އެޅުމަށް ލުބްނާން، ޔަމަން އަދި ޢިރާޤުގައި ހަރަކާތްތެރިވާ މުޖާހިދުންނާއި ހަތިޔާރުއެޅި ޖަމާޢަތްތަކަށް އީރާނުން އިރުޝާދު ދީފައިވާ ކަމުގައި މަޞްދަރުތަކުން ބުންޏެވެ. މަސްރަޙުގެ ދާރިސެއް ކަމުގައިވާ ޙަމްދީރިޒާ ޢަޒީޒީ ވިދާޅުވީ، މިއީ ދިފާޢީ ބާރުވެރިކަން ދެއްކުމަށް އީރާނުން އަޅާފައިވާ ފިޔަވަޅެއް ކަމުގައެވެ.
އެކުވެރި ދައުލަތްތަކުގެ (އދ) އާންމު މަޖިލީހުގެ ހަވާސާގައި، ހަތް ދުވަހުގެ ތެރޭގައި ހަމަލާތައް ހުއްޓާލުމަށާއި، ބަނދަރުތަކުގެ ޙިޞާރު ނައްތާލައި ފްރީޒްކޮށްފައި ނުވަތަ ހިފަހައްޓާފައިވާ 12 ބިލިޔަން އެމެރިކާ ޑޮލަރު ދޫކޮށްލުމަށް އެދި ޤަޠަރު މެދުވެރިކޮށް އީރާނުން އެމެރިކާއަށް ހުށަހެޅިއެވެ. ރައީސް ޑޮނަލްޑް ޓްރަމްޕް މި ކަމަށް އިންކާރުކުރެއްވި ނަމަވެސް، އީރާނުން ދަނީ އެމެރިކާގެ މި ޖަވާބު ދިރާސާ ކުރަމުންނެވެ. އެއްވެސް މަޝްވަރާއެއްގައި އީރާނުގެ ނިއުކްލިޔަރ ޕުރޮގުރާމާ ގުޅޭ މައްސަލަ ހިމެނުމަށް އެމެރިކާއިން ބޭނުންވި ނަމަވެސް އީރާނުން ބުނީ އެ ކަމާމެދު އެއްވެސް ވާހަކައެއް ދެއްކޭނީ ފުރަތަމަ ހުށަހަޅާފައިވާ ޝަރުޠުތަކަށް އެއްބަސްވުމުން ކަމުގައެވެ.
ހަނގުރާމައިގައި އެތައް ހާސް ޢާންމުން ޝަހީދުވެ، އީރާނުގެ އަސްކަރިއްޔާއަށާއި އިޤުތިޞާދަށް ބޮޑެތި ގެއްލުންތަކެއް ލިބިފައިވާއިރު، އެމެރިކާއިން ރައްކާކޮށްފައި ހުރި މުހިންމު ހަތިޔާރުތަކުގެ ސްޓޮކު ވެސް ވަނީ އިންތިހާއަށް މަދުވެފައެވެ. މިއީ، ހަނގުރާމަ ދިގުދެންމުމަށް އެމެރިކާއަށް އޮތް ބޮޑު ކަންބޮޑުވުމެކެވެ. މި ދަނޑިވަޅުގައި، ޔަމަނުުގެ ހަތިޔާރު އެޅި ޙޫޘީ ޖަމާޢަތުން ބާބް އަލް-މަންދަބް ކަނޑުއޮޅީގެ އައްސޭރިފަށުގައިވާ ސަރަޙައްދުތަކަށް އަތްގަދަ ކުރުމާއެކު ސަޢޫދީ ޢަރަބިއްޔާގެ މަޞްލަޙަތުތަކަށް ވެސް ވަނީ ނުރައްކާވެފައެވެ. ދެމިގެންދާ ޙިޞާރަކަށް އީރާނަށް ކެތްނުކުރެވޭނެ ކަމުގައި މަސްރަޙުގެ ދާރިސެއް ކަމުގައިވާ އެލެކްސް ވަތަންކާ ވިދާޅުވާއިރު، އަސްކަރީ އަދި އިޤުތިޞާދީ ފިއްތުންތައް ތަހައްމަލުކުރުން އީރާނުގެ އިސްވާރުންނަށް ދަތިވަމުންދާ ކަމުގައި ވެސް މަޞްދަރުތަކުން ފާހަގަކުރެއެވެ.