ހުޅުމާލޭގައި 3000 އަށްވުރެ ގިނަ އެޕާޓްމަންޓްގެ މަސައްކަތް ކުރިއަށް

ހުޅުމާލޭގައި ސެމީ ލަގްޒަރީ އަދި ލަގްޒަރީ 3,100 އަށްވުރެ ގިނަ އެޕާޓްމެންޓުގެ މަސައްކަތް އެކި މަރުހަލާތަކުގައި މިވަގުތުވެސް ކުރިއަށްދާ ކަމަށް ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީގެ މެނޭޖިންގ ޑިރެކްޓަރ ޢަލީ ޒުހައިރު ވިދާޅުވެއްޖެއެވެ.

ދިވެހިރާއްޖޭގެ އަޑުން ގެނެސްދޭ "އަހާށޭ ބުނާނަން" ޕްރޮގްރާމުގައި ވާހަކަ ދައްކަވަމުން އެޗްޑީސީގެ މެނޭޖިންގ ޑިރެކްޓަރ ޢަލީ ޒުހައިރު ވަނީ، ހުޅުމާލޭގައި އެކި ފަރާތްތަކުން ކުރިއަށްގެންދާ ހައުސިންގ މަޝްރޫޢުތަކާ ގުޅޭ ތަފްސީލުތައް ހިއްސާކުރައްވާފައެވެ.

އެޗްޑީސީގެ މެނޭޖިންގ ޑިރެކްޓަރ ޢަލީ ޒުހައިރު ވިދާޅުވީ، ހުޅުމާލެ ފޭސް 1 އަދި ފޭސް 2ގައި ރިއަލް އެސްޓޭޓް ވިޔަފާރީގެ ދަށުން މިހާތަނަށް 12،831 ސެމީ އެންޑް ލަގްޒަރީ އެޕާޓްމަންޓު ތަރައްޤީކޮށްފައިވާ ކަމަށެވެ. މީގެ އިތުރުންވެސް ރިއަލް އެސްޓޭޓް ވިޔަފާރީގެ ދަށުން 3،163 ޔުނިޓު ތަރައްޤީ ކުރުމުގެ އަމަލީ މަސައްކަތްތައް ކުރިއަށްދާ ކަމަށް ޒުހައިރު ވިދާޅުވިއެވެ.

"ހުޅުމާލެ ފޭސް 1 އަދި ފޭސް 2ގައި ސެމީ އެންޑް ލަގްޒަރީ އެޕާޓްމަންޓުތަކުގެ ތެރޭގައި އެބަހުރި 12،831 ޔުނިޓު. އެއީ، 172 ޑިވެލޮޕްމެންޓުގެ ތެރެއިން ގެނެވިފައި. އަދި އޭގެ އިތުރަށް މިހާރު އެބަ ތަރައްޤީކުރަމުންދޭ އެކި މަރުހަލާތަކުގައި ސެމީ ލަގްޒަރީގެ ތެރޭގައި 1،763 ޔުނިޓު، އަދި ލަގްޒަރީގެ ގޮތުގައި 1،400 ޔުނިޓު އެކި މަރުހަލާތަކުގައި މިވަގުތުވެސް އެބަ ކުރިއަށްގެންދޭ." ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީގެ މެނޭޖިންގ ޑިރެކްޓަރ ޢަލީ ޒުހައިރު ވިދާޅުވިއެވެ.

ރިއަލް އެސްޓޭޓް މަޝްރޫޢުތަކުގެ އިތުރުން ހުޅުމާލޭގައި މިވަގުތުވެސް ބޭންކް އޮފް މޯލްޑިވްސް، ބީއެމްއެލްގެ އެފޯޑަބަލް ހައުސިންގ ޔުނިޓުތަކުގެ އަމަލީ މަސައްކަތްތައް ފަށައިގެން ކުރިއަށްދާކަން ހާމަކުރައްވަމުން ޒުހައިރު ވިދާޅުވީ، މިއީ ބީއެމްއެލްއާއި ގެދޮރުވެރިކަމާ ބެހޭ ވުޒާރާ އަދި އެޗްޑީސީ ގުޅިގެން ހިންގާ ޚާއްސަ މަޝްރޫޢެއް ކަމަށެވެ. މި މަޝްރޫޢުގެ ދަށުން މިހާރުވެސް ބައެއް ސަރަޙައްދުތަކުގައި އަމަލީ މަސައްކަތްތައް ފަށާފައިވާ މަންޒަރު ފެންނަން ހުންނާނެ ކަމަށްވެސް އޭނާ ވިދާޅުވިއެވެ.

މީގެއިތުރުން ހުޅުމާލޭގައި ކުރިއަށް ގެންދިއުމަށް ހަމަޖެހިފައިވާ އިތުރު ސޯޝަލް ހައުސިންގ މަޝްރޫޢުތަކަށް ބޭނުންވާ ބިންތައް މިހާރު ކަނޑައަޅައި، ކަމާބެހޭ ފަރާތްތަކާ ހަވާލުކޮށްފައިވާ ކަމަށާއި، މިގޮތުން އިތުރު ސޯޝަލް ހައުސިންގ މަޝްރޫޢުތައްވެސް ކުރިއަށް އޮތްތަނުގައި ހުޅުމާލެއަށް އަންނާނެ ކަމުގެ ޔަގީންކަން ޒުހައިރު ދެއްވިއެވެ.

ހައުސިންގ ޔުނިޓުތައް އެޗްޑީސީން ތަރައްޤީކުރަމުން ދަނީ ހަމައެކަނި ހުޅުމާލޭގައި ނޫންކަން ފާހަގަކުރައްވަމުން ޒުހައިރު ވިދާޅުވީ، އަތޮޅުތެރޭގެ ރަށްތަކުގައިވެސް އެޗްޑީސީން ހައުސިންގ މަޝްރޫޢުތައް ހިންގަމުންދާ ކަމަށެވެ. އެގޮތުން ގާތްގަނޑަކަށް 5،000 ހައުސިންގ ޔުނިޓު ރާއްޖޭގެ އެކި ކަންކޮޅުތަކުގައި ތަރައްޤީ ކުރުމުގެ މަސައްކަތް އެޗްޑީސީއާ ހަވާލުކޮށްފައިވާ ކަމަށް ޒުހައިރު ވިދާޅުވިއެވެ.

އޭގެ ތެރެއިން ހދ. ކުޅުދުއްފުށީގައި ތަރައްޤީކުރާ 400 ހައުސިންގ ޔުނިޓުގެ އަމަލީ މަސައްކަތް މިހާރުވެސް ފެށިގެން ކުރިއަށްދާ ކަމަށާއި، ދެން ހުރި ރަށްތަކުގައި މަސައްކަތް ފެށުމަށް ކުރަހަންޖެހޭ ކުރެހުންތައް ކުރެހުމާއި، މަޝްރޫޢުތަކަށް ބޭނުންވާ ފައިނޭންސް ހޯދުމުގެ މަސައްކަތްތައް އެކި މަރުހަލާތަކުގައި ކުރަމުންދާ ކަމަށްވެސް ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީގެ މެނޭޖިންގ ޑިރެކްޓަރ ޢަލީ ޒުހައިރު ވިދާޅުވިއެވެ.