ދައުލަތުގެ ބަޖެޓުގައި ހިމެނޭ މައުލޫމާތުތައް އާއްމުންނަށް ފަސޭހައިން ލިބޭނެ އިންތިޒާމް ހަމަޖެއްސުމަށްޓަކައި ބަޖެޓަށް ޚާއްސަ ވެބްސައިޓަކާއި ބަޖެޓުގައި ހިމެނޭ މުޙިއްމު މައުލޫމާތުތައް ހިމެނޭ ލުއި ފޮތެއް ތައާރަފްކުރައްވައިފިއެވެ.
ބަޓެޓް ވެބްސައިޓު އަދި ލުއި ފޮތް އިފްތިތާޙުކޮށްދެއްވީ މިއަދު އެކަމަށްޓަކައި ބޭއްވި ޚާއްސަ ރަސްމިއްޔާތެއްގައި ފިނޭންސް މިނިސްޓަރ އަހުމަދު މުނައްވަރުއެވެ. ފިނޭންސް މިނިސްޓްރީގައި ބޭއްވެވި މި ރަސްމިއްޔާތުގައި އިފްތިތާޙުކުރެއްވި ބަޖެޓް ވެބްސައިޓު އަދި ބަޖެޓުގެ ލުއި ފޮތުގައި ދައުލަތުގެ ބަޖެޓުގައި ހިމެނޭ މުޙިއްމު މައުލޫމާތުތައް ހިމެނެއެވެ. އޭގެ ތެރޭގައި ދައުލަތުގެ ޚަރަދާއި އާމްދަނީގެ ތަފްސީލްގެ އިތުރުން، ސަރުކާރުން ކުރިއަށް ގެންދެވުމަށް ރާއްވަވާފައިވާ މަޝްރޫއުތަކުގެ މައުލޫމާތުތައް ހިމެނެއެވެ.
މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް ފިނޭންސް އެންޑް ޓްރެޜަރީ އަޙުމަދު މުނައްވަދު ވިދާޅުވީ މިވެބްސައިޓު މެދުވެރިކޮށް ސަރުކާރުގެ ޚަރަދުތައް އަދި އާމްދަނީގެ އަދަދުތައް މަހުން މަހަށް އާއްމުކުރެވިގެންދާނެ ކަމަށެވެ. އަންނަ އަހަރު މިއަށްވުރެއް ފުރިހަމައަށް ބަޖެޓުގެ މަސައްކަތް ކުރިއަށް ގެންދެވުމަށް ބޭނުންފުޅުވާ ކަމަށާއި އެގޮތުން މޯބައިލް އެޕްލިކޭޝަނެއް މެދުވެރިކޮށް، ބަޖެޓާއި ގުޅޭ މައުލޫމާތު އާއްމުންނަށް ފޯރުވައިދެއްވޭނެ އިންތިޒާމް ހަމަޖެއްސެވުމަށް މަސައްކަތް ކުރައްވަމުން ގެންދަވާ ކަމަށް މިނިސްޓަރ ވިދާޅުވިއެވެ.
އަންނަ އަހަރަށް ލަފާކޮށް 26.7 ބިލިޔަން ރުފިޔާގެ ބަޖެޓެއް، މިދިޔަ އަންގާރަ ދުވަހު ރައްޔިތުންގެ މަޖިލީހަށް ހުށަހަޅުއްވާފައިވާއިރު މި ބަޖެޓަކީ މިހިނގާ އަހަރަށް ހުށަހެޅުއްވި 27 ޕޮއިންޓް ހަތަރެއް ފަހެއް ބިލިޔަން ރުފިޔާގެ ބަޖެޓަށް ވުރެއް 0.75 ބިލިއަން ރުފިޔާގެ ކުޑަ ބަޖެޓެކެވެ.