ރަޝިއާގެ ތެލާއި ގޭސް އުފައްދާ ސިނާއަތުގެ ވަސީލަތްތަކަށް ޔޫކްރެއިނުން ދެމުންގެންދާ ހަމަލާތައް ހުއްޓުވުމަށް އެމެރިކާއިން ބާރުއަޅަމުންދާ ކަން ހާމަވެއްޖެއެވެ. މި ގޮތުން، މި ހަމަލާތައް ނުހުއްޓައިފިނަމަ ޔޫކްރެއިނަށް ހަތިޔާރު ފޯރުކޮށްދޭ ނިޒާމު ހުއްޓާލާނެ ކަމުގެ އިންޒާރު އެމެރިކާއިން ދެމުންދާ ކަމުގައި، މި ކަމުގެ މަޢުލޫމާތު ލިބިފައިވާ ވިލާތުގެ ޤައުމުތަކުގެ މަޞްދަރުތަކުން ހާމަކުރިއެވެ. މަޞްދަރުތަކުން ބުނީ، ރަޝިއާގެ ތެޔޮ ސާފުކުރާ ކާރުޚާނާތަކަށް ދޭ ހަމަލާތައް ހުއްޓާލުމަށް އެމެރިކާގެ އޮފިޝަލުން ވިލާތުގެ ޤައުމުތަކަށާއި ކީވްއަށް ގުޅައި އަންގަމުންދާ ކަމުގައެވެ.
މީގެ އިތުރުން، އެމެރިކާއިން ދިން އިންޒާރުތަކުގެ ތެރޭގައި ޖާސޫސީ މަޢުލޫމާތު ހިއްސާކުރުން ހުއްޓާލުން ހިމެނެއެވެ. އަދި، ޔޫކްރެއިނަށް ހަތިޔާރު ހޯދައިދޭ 'ޕްރަޔޮރަޓައިޒްޑް ޔޫކްރެއިން ރިކުއަޔަމަންޓްސް ލިސްޓް' (ޕަރލް) ނިޒާމު މެދުކަނޑާލާނެ ކަން ވެސް އެމެރިކާއިން އަންގާފައިވާ ކަމުގައި ރިޕޯޓުތައް ބުނެއެވެ. ނަމަވެސް، މި ކަމާ ގުޅޭގޮތުން ވައިޓް ހައުސްއިން ވަކި އެއްޗެއް ބުނެފައެއް ނުވެއެވެ.
އެމެރިކާގެ ދިފާޢީ އޮފިޝަލެއްގެ ފޯނު ކޯލެއް ލިބުނު ވިލާތުގެ ޤައުމެއްގެ އޮފިޝަލަކު މި ކަން ކަށަވަރުކޮށްދެއްވިއެވެ. ނަން ހާމަކޮށްފައިނުވާ އެ އޮފިޝަލު ވިދާޅުވީ، "އެ މީހުން [އެމެރިކާއިން] ކީވްއަށް އެބަ ގުޅާ... ވިލާތުގެ އެންމެންނަށް އެބަ ގުޅާ،" ކަމުގައެވެ.
މި ކަން ހާމަވެފައި މި ވަނީ، ރަޝިއާ-ޔޫކްރެއިން ހަނގުރާމައާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް ކުއްލި އިޢުލާނެއް ކުރައްވާފައިވާ ދަނޑިވަޅެއްގައެވެ. އޮކްޓޫބަރު 11 ގައި ޓްރަމްޕް ވިދާޅުވީ، ރަޝިއާއާއި ޔޫކްރެއިނާ ދެމެދު ހަކަތައިގެ ވަސީލަތްތަކަށް ހަމަލާދިނުން ހުއްޓާލުމުގެ އެއްބަސްވުމަކަށް އާދެވިފައިވާ ކަމަށާއި، މިއަށް ވަގުތުން އަމަލުކުރަން ފަށާނެ ކަމުގައެވެ.
ނަމަވެސް، ޔޫކްރެއިންގެ ރައީސް ވޮލޮދްމީރް ޒެލެންސްކީ ވިދާޅުވީ، އެ އެއްބަސްވުމުގެ ތަފްސީލުތައް ބެލުމަށް އަދިވެސް އިންތިޒާރުކުރައްވަމުން ގެންދަވާ ކަމުގައެވެ. "މިހާރުން ފެށިގެން ރަޝިއާއާއި ޔޫކްރެއިންގެ ހަނގުރާމައިގައި ހަކަތައިގެ ވަސީލަތްތަކަށް ހަމަލާދިނުން ވަނީ ހުއްޓާލެވިފައި. ދެ ފަރާތުން ވަނީ އެއްބަސްވެފައި. މިކަމާ ޚިލާފު ނުވާތި!" ޓްރަމްޕް ވިދާޅުވިއެވެ.