ގދ. ތިނަދޫގައި އަޅާ އައު އިންޖީނުގެއަށް ބޭނުންވާ 4 ޖެނެރޭޓަރު ސެޓް ގަތުމަށް، ސިންގަޕޫރުގެ ކުންފުންޏެއް ކަމަށްވާ، އެލަން އިންޖިނިއަރިންގ ޕްރައިވެޓް ލިމިޓެޑާއެކު ފެނަކަ ކޯޕަރޭޝަނުން އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގެ ދަށުން ގެންނަން ހަމަޖެހިފައިވަނީ، 1 މެގަ ވޯޓުގެ 2 ޖެނެރޭޓަރާއި، 2.1 މެގަވޯޓުގެ 2 ޖެނެރޭޓަރެވެ. މި 4 ޖެނެރޭޓަރުގެ އަގަކީ 1.264 މިލިއަން އެމެރިކާ ޑޮލަރެވެ.
މި އެއްބަސްވުމަށްފަހު، ފެނަކަ ކޯޕަރޭޝަންގެ މެނޭގިންގ ޑިރެކްޓަރ އަޙްމަދު ޝަރީފް ވިދާޅުވީ، ތިނަދޫގެ އައު އިންޖީނުގޭގެ މަސައްކަތް ކޮންޓްރެކްޓަރަކާ ޙަވާލުކޮށްގެން މިހާރު ކުރިއަށް އެބަގެންދަވާކަމަށެވެ. އަދި ކުރިއަށް އޮތް 3 މަސްދުވަހުގެ ތެރޭގައި ޖެނެރޭޓަރުތައް ރާއްޖެ ގެނެވި، އިތުރު އެއް މަސްދުވަހުގެ ތެރޭގައި މޮބަލައިޒް ކުރެވޭނެކަމަށްވެސް ޝަރީފް ވިދާޅުވިއެވެ. ޝަރީފް ވިދާޅުވީ، ޖެނެރޭޓަރުތައް ރާއްޖެ ގެންނަންވާއިރަށް، އިންޖީނުގޭގެ އިންޖީނުތައް ބަހައްޓަން ތައްޔާރުކުރާ ތަންތަން ހަދައި، ޖެނެރޭޓަރުތައް ބެހެއްޓެނެ ވަޞީލަތްތައް ޤާއިމްކުރެވޭނެ ކަމަށެވެ.
ގއ.ވިލިނގިއްޔާއި ހއ.ފިއްލަދޫ އިންޖީނުއަށް ބޭނުންވާ ސްޕެއާރސް ގެނައުމުގެ މަސައްކަތްވެސް މިއަދު ވަނީ ކޮންޓްރެކްޓަރަކާ ޙަވާލުކޮށްފައެވެ. މިކަން ޙަވާލުކުރީ އެލަން އިންޖިނިއަރިން އެންޑް ޕްރައިވެޓް ލިމިޓެޑާއެވެ. މިއީ އެ ދެރަށުގެ ޖެނެރޭޓަރުތައް އޯވަރހޯލްކުރުމަށް ރާއްޖެއިން ބޭރުން ކޮންމެހެން ގެންނަންޖެހޭ ސްޕެއާރތައް ގެނައުމަށް ވެވުނު އެއްބަސްވުމެކެވެ. މި އެއްބަސްވުމުގެ އަގަކީ 43 ހާސް އެމެރިކާ ޑޮލަރެވެ.