މޯލްޑިވްސް މެޑިކަލް އެންޑް ހެލްތް އެކްސްޕޯ އަކީ ރާއްޖޭގެ ޞިއްޙީ ދާއިރާ ކުރިއެރުވުމަށްޓަކައި މިދާއިރާއިން ދުނިޔޭގެ ފެންވަރުގެ ޓެކްނޮލޮޖީއާއި ޚިދްމަތްތައް ދޭނެ ގޮތްތަކަށް ވިޔަފާރިތައް އަހުލުވެރިކުރުވުމުގެ މަގްސަދުގައި ބާއްވާ އެކްސްޕޯއެކެވެ. ޞިއްޙީ ދާއިރާއިން ލިބެން ހުރި ޚިދްމަތްތަކަށް މުޖުތަމަޢު ހޭލުންތެރިކުރުމާއި، ޞިއްޙީ ރަނގަޅު އާދަކާދަތަކާއި، ރައްޖެއަކީ މިޞަރަޙައްދުގައި ލިބެން ހުރި ފެންވަރު ރަނގަޅު ޞިއްޙީ ޚިދްމަތްތައް ފަސޭހަކަމާއެކު ހޯދޭ ތަނަކަށްވާއިރު އެކަމަށް މުޖުތަމަޢު އަހުލުވެރިކުރުވުމަކީ މި އެކްސްޕޯގެ އަމާޒެއްކަމަށް އެމްވީ މެޑިކަލްސްއިން ބުނެއެވެ.
އަމިއްލަކުންފުންޏެއް ކަމަށްވާ އެމް.ވީ މެޑިކަލްސްއިން ބާއްވާ މި އެކްސްޕޯ ހުޅުއްވައިދެއްވުމަށްފަހު މިނިސްޓަރ އޮފް ސްޓޭޓް ފޮރ ހެލްތް ޑރ.މުޙައްމަދު ޙަބީބު ދެއްކެވި ވާހަކަފުޅުގައި، ރާއްޖޭގެ ސިއްޙީ ދާއިރާ ކުރިއަރަމުންދާއިރު، މަތީ ފެންވަރުގެ ސިއްޙީ ޚިދުމަތްތައް މިހާރު ރާއްޖޭގައިވެސް ލިބެން ހުރި ކަން ފާހަގަކުރެއްވިއެވެ. އެހެންނަމަވެސް އެޚިދުމަތްތަކާބެހޭ އެންމެ ރަނގަޅު މަޢުލޫމާތު ޢާންމު މުޖުތަމަޢަށް އުޅޭ މީހުންނަށް އެނގިވަޑައިނުގެން، އެޚިދުމަތް ހޯދަން ރާއްޖެއިން ބޭރަށްދާ ކަން ފާހަގަކުރެވޭކަމަށާއި އަދި މިފަދަ އެކްސިބިޝަނުން އެކަމަށް ހެޔޮބަދަލުތަކެއް އަންނާކަމަށް ޤަބޫލުކުރައްވާ ކަމަށް ސްޓޭޓް މިނިސްޓަރ ހަބީބު ވިދާޅުވިއެވެ.
ހެލްތް އެކްސްޕޯ އިންތިޒާމުކުރާ އެމް.ވީ މެޑިކަލްސްގެ މެނޭޖަރ މާރކެޓިންގ އެންޑް ޕަބްލިކް ރިލޭޝަންސް ޢަބްދުލް ޖަލީލް ޙުސައިން ވިދާޅުވީ، މިފަދަ ހެލްތް އެކްސްޕޯ ކުރިއަށް އޮތް ތަނުގައި މިއަށްވުރެ ފުރިހަމަކޮށް ބޭއްވުމަށް ނިންމާފައިވާ ކަމަށާއި މިއީ ކާމިޔާބު އެކްސްޕޯއަކަށް ވެގެންދާނެކަމަށް އުއްމީދު ކުރައްވާ ކަމަށެވެ.
މޯލްޑިވްސް މެޑިކަލް އެންޑް ހެލްތް އެކްސްޕޯގައި، ރާއްޖޭގެ މައި ހޮސްޕިޓަލް އައިޖީއެމްއެޗާއި އޭޑީކޭ ހޮސްޕިޓަލާއި، ޞިއްހީ ދައިރާއާއި ގުޅުން ހުރި އެކި ޚިދްމަތްތައް ފޯރުކޮށްދޭ ކްލިނިކްތަކާއި ކުންފުނިތައް ހިމެނޭގޮތަށް 7 ފަރާތަކުން ބައިވެރިވެފައިވެއެވެ.
ހެލްތް އެކްސްޕޯގެ މެއިން ސްޕޮންސަރަކީ ރާއްޖޭގެ އަމިއްލަ ހޮސްޕިޓަލެއް ކަމަށްވާ އޭޑީކޭ ހޮސްޕިޓަލެވެ. އޭޑީކޭ ހޮސްޕިޓަލްގެ މެނޭޖިންގ ޑިރެކްޓަރ އަޙުމަދު އައްފާލް ވިދާޅުވީ، މިފަދަ އެކްސްޕޯއެއްގައި އެހޮސްޕިޓަލުން ބައިވެރިވުމުގެ ބޭނުމަކީ، އެހޮސްޕިޓަލުން ދެއްވާ މަތީ ފެންވަރުގެ ސިއްޙީ ޚިދުމަތްތަކާ ގުޅޭ މަޢުލޫމާތު އާންމުނަށް ހިއްސާކުރެއްވުން ކަމަށެވެ.
ހެލްތް އެކްސްޕޯގައި، އިންޑިޔާގެ މަޝްހޫރު 7 ހޮސްޕިޓަލަކުން ބައިވެރިވެފައިވާއިރު މީގެ ތެރޭގައި ދިވެހިން އެންމެ ގިނައިން ފަރުވާ ހޯދަމުންދާ އިންޑިއާގެ ޓްރިވެންޑްރަމްގެ ޗައިތޭނިޔާ ހޮސްޕިޓަލާއި އާނަންތަޕޫރީ ހޮސްޕިޓަލް ހިމެނެއެވެ. ޖުމްލަ 17 ސްޓޯލެއް ބައިވެރިކޮށްފައިވާ މިއެކްސްޕޯއަކީ މިހާ ފުޅާކޮށް ރާއްޖޭގައި ބާއްވާ މިފަދަ ފުރަތަމަ ހެލްތް އެކްސްޕޯއެވެ.