ފާއިތުވެދިޔަ 3 އަހަރު ދުވަހުގެ ތެރޭގައި ރާއްޖޭގެ 42 ރަށަކަށް ނަރުދަމާ ނިޒާމް އަދި 43 ރަށަކަށް ފެނުގެ ނިޒާމް ސަރުކާރުން ކަށަވަރު ކޮށްދެއްވާފައިވާ ކަމަށް އެންވަޔަރަމަންޓް މިނިސްޓަރ ޠާރިޤް އިބްރާހީމް ވިދާޅުވެއްޖެއެވެ. ޓީ.ވީ.އެމްގެ "ޤައުމު ބިނާ ކުރުމުގެ 3 އަހަރު" މި ޕްރޮގްރާމްގައި ވާހަކަފުޅު ދައްކަވަމުން އެންވަޔަރަމަންޓް މިނިސްޓަރ ޠާރިޤް އިބްރާހީމް ވިދާޅުވީ، ފެނާއި ނަރުދަމާގެ ޚިދުމަތް ރައްޔިތުންނަށް ފޯރުކޮށްދެއްވުމުގައި ރާއްޖޭގެ ތާރީޚުގައިވެސް އެންމެ ކާމިޔާބު މަޝްރޫޢުތައް ހިންގަވާފައިވަނީ ރައީސުލްޖުމްހޫރިއްޔާ ޢަބްދު ﷲ ޔާމީން ޢަބްދުލްޤައްޔޫމްގެ ސަރުކާރުން ކަމަށެވެ.
ޓީ.ވީ.އެމްގެ "ޤައުމު ބިނާ ކުރުމުގެ 3 އަހަރު" މި ޕްރޮގްރާމްގައި ވާހަކަފުޅު ދައްކަވަމުން އެންވަޔަރަމަންޓް މިނިސްޓަރ ޠާރިޤް އިބްރާހީމް ވިދާޅުވީ، ރައްޔިތުންނަށް ބޭނުންވާ އަސާސީ ޚިދުމަތްތައް ލިބިދެއްވުމުގައި ސަރުކާރުން ފާއިތުވި 3 އަހަރު ދުވަހުގެ ތެރޭގައި ބޮޑެތި ކުރިއެރުންތަކަކާއި ކާމިޔާބީތަކެއް ޙާޞިލްކުރައްވާފައިވާ ކަމަށެވެ. އެގޮތުން ރައީސް ޔާމީން ވެރިކަމަށް ވަޑައިގެންނެވިއިރު، ޒަމާނީ ފެންވަރުގައި ނަރުދަމާ ނިޒާމް ޤާއިމުކުރެވިފައިވަނީ 31 ރަށުގައި ކަމަށާއި، މާލޭ ސިޓީ ހިމެނޭހެން ރައްކާތެރިގޮތުގައި ސާފުބޯފެން ފޯރުކޮށްދިނުމަށް ފެނުގެ ނިޒާމް ޤާއިމުކުރެވިފައިވަނީ އެންމެ 6 ރަށުގައިކަންވެސް މިނިސްޓަރ ފާހަގަކުރެއްވިއެވެ. ނަމަވެސް ރައީސް ޔާމިން ވެރިކަމަށް ވަޑައިގެންނެވިފަހު، 42 ރަށަކަށް ނަރުދަމާ ނިޒާމް، އަދި 43 ރަށަކަށް ފެނުގެ ނިޒާމް ކަށަވަރު ކޮށްދެއްވާފައިވާ ކަމަށް މިނިސްޓަރ ވިދާޅުވިއެވެ. އެގޮތުން 10 ރަށެއްގައި ނަރުދަމާ ނިޒާމް ޤާއިމުކުރެއްވުމުގެ މަސައްކަތް ނިންމަވައި، ޚިދުމަތް ދެއްވަން ފައްޓަވާފައިވާއިރު، 950 މިލިއަން ރުފިޔާ ޚަރަދުކުރައްވައިގެން 21 ރަށެއްގައި ނަރުދަމާ ނިޒާމް ޤާއިމުކުރެއްވުމުގެ ޢަމަލީ މަސައްކަތް މިހާރުވެސް ކުރިއަށްދާކަން މިނިސްޓަރ ޠާރިޤް ފާހަގަކުރެއްވިއެވެ.
"ސަރުކާރުން ވަނީ 42 ރަށަކަށް ނަރުދަމާގެ ނިޒާމް ޔަޤީންކޮށްދެއްވާފައި. އޭގެތެރެއިން މިހާރު 10 ރަށެއްގެ މަސައްކަތް ނިމި ޙިދުމަތް ދެއްވަމުން ދަނީ. އަދި 21 ރަށެއްގެ ނަރުދަމާ ނިޒާމް ޤާއިމުކުރެއްވުމުގެ މަސައްކަތް މިހާރުވެސް ވަރަށް ހަލުވި ސްޕީޑުގައި ކުރިއަށްއެބަދޭ. އަދި 11 ރަށެއްގައި ނަރުދާމާ ނިޒާމް ޤާއިމުކުރެއްވުމަށް ބޭނުންވާ ޑިޒައިންގެ މަސައްކަތް ނިމި، އަމަލީ މަސައްކަތް ކުރުމަށް ކޮންޓްރެކްޓަރެއް އެވޯޑްކުރުމުގެ މަސައްކަތް ކުރަމުން މިދަނީ. އިރާދަކުރެއްވިއްޔާ ކައިރި މުސްތަޤުބަލެއްގައި މި ރަށްތަކުގައިވެސް އަމަލީ މަސައްކަތް ފެށިގެންދާނެ" މިނިސްޓަރ ޠާރިޤް ވިދާޅުވިއެވެ.
ފެނުގެ ނިޒާމް ޤާއިމުކުރެއްވުމަށް ސަރުކާރުން ކުރައްވާފައިވާ މަސައްކަތްތަކަށް އަލިއަޅުއްވާލައްވަވާ ވާހަކަފުޅު ދައްކަވަމުން މިނިސްޓަރ ޠާރިޤް ވިދާޅުވީ، ފާއިތުވި 3 އަހަރު ދުވަހުގެ ތެރޭގައި، 12 ރަށެއްގައި ފެނުގެ ނިޒާމް ޤާއިމުކުރައްވާ ޙިދުމަތް ދެއްވަން ފައްޓަވާފައިވާ ކަމަށެވެ. އަދި 550 މިލިއަނަށްވުރެ ގިނަ ރުފިޔާ ހޭދަކުރައްވައިގެން ފެނުގެ ނިޒާމް ޤާއިމުކުރެއްވުމުގެ މަސައްކަތް 15 ރަށެއްގައި މިހާރުވެސް ކުރިއަށްގެންދަވާ ކަމަށް މިނިސްޓަރ ވިދާޅުވިއެވެ.
"ފެނުގެ ނިޒާމް ޤާއިމުކުރެއްވުމުގެ މަސައްކަތް 12 ރަށެއްގައި ނިންމާ، ޚިދުމަތްދޭން ފައްޓާފައިވޭ. އަދި 15 ރަށެއްގެ ފެނުގެ ނިޒާމް ޤާއިމުކުރެއްވުމުގެ އަމަލީ މަސައްކަތް މިހާރުވެސް ކުރަމުންދަނީ. އިތުރު 16 ރަށެއްގެ ފެނުގެ ނިޒާމް ޤާއިމުކުރުމުގެ މަސައްކަތް ކުރުމަށްވެސް ބަޔަކާއި ހަވާލުކުރެއްވުމުގެ މަސައްކަތް ސަރުކާރުން މިދަނީ ކުރައްވަމުން" މިނިސްޓަރ ޠާރިޤް ވިދާޅުވިއެވެ.
ރަށްރަށުގެ ފެނާއި ނަރުދަމާ ނިޒާމް ހަރުދަނާ އަދި ދެމެހެއްޓެނިވި ނިޒާމެއްގެ ދަށުން ބެލެހެއްޓިފައި ނުވާތީ، ފެނާއި ނަރުދަމާ ނިޒާމް މަރާމާތު ކުރެއްވުމަށްވެސް ދައުލަތުގެ ބަޖެޓުން ވަރަށް ބޮޑެތި ޚަރަދުތަކެއް ކުރައްވަން ޖެހިވަޑައިގެންނެވިކަން "ޤައުމު ބިނާ ކުރުމުގެ 3 އަހަރު" މި ޕްރޮގްރާމުގައި ވާހަކަފުޅު ދައްކަވަމުން މިނިސްޓަރ ޠާރިޤް ފާހަގަކުރައްވާފައިވެއެވެ.