މާލޭ އިރުދެކުނު ފަރާތުގައި ސަރުކާރުން ތަރައްޤީކުރައްވާފައިވާ އިންޑަސްޓްރިއަލް ވިލެޖުގެ މަގުހެދުމުގެ މަސައްކަތް އަންނަ ފެބްރުއަރީ މަހުގެ ނިޔަލަށް އެއްކޮށް ނިންމާލެވޭނެކަމަށް ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާލޭ ސިޓީގެ ތޮއްޖެހުން ކުޑަކޮށް، މާލޭގައި ދިރިއުޅޭ ރައްޔިތުންނަށް ހިތްފަސޭހަ މާހައުލެއް ޤާއިމުކޮށްދިނުމަށް ސަރުކާރުން ކުރައްވަމުންގެންދަވާ މަސައްކަތުގެ ދަށުން މިވަގުތު އެންމެ ބާރު ސްޕީޑުގައި ކުރިއަށްގެންދަވާ އެއް މަޝްރޫޢަކީ ސިނާޢީ ސަރަޙައްދެއްގެ ގޮތުގައި މާލޭގެ މާލޭގެ އިރުދެކުނު ފަރާތުގައި ތަރައްޤީކުރައްވާ އިންޑަސްޓްރިއަލް ވިލެޖްގެ މަޝްރޫޢެވެ. މިއީ ދައުލަތުގެ ބަޖެޓުން ގާތްގަނޑަކަށް 160 މިލިއަން ރުފިޔާ ޚަރަދުކުރައްވައިގެން ކުރިއަށް ގެންދަވާ މާލޭގެ މަލަމަތި ބަދަލުކޮށްލުވާނެފަދަ ބިޔަ މަޝްރޫޢެކެވެ.
img:http://s3.psmnews.mv/images/660x400/14806942299107.jpg|އިންޑަސްޓްރިއަލް ވިލެޖު ތަރައްޤީކުރުމަށް ހިއްކާފައިވާ ސަރަހައްދު- ފޮޓޯ: ޕީއެސްއެމް
އިންޑަސްޓްރިއަލް ވިލެޖް ތަރައްޤީކުރެއްވުމަށް ބޭނުންވާ ބިން ހިއްކެވުމުގެ މަސައްކަތް މިހާރު ވަނީ ނިމިފައެވެ. އަދި މިހާރު ކުރެވެމުންދަނީ އެތަނުގެ ފަސްގަނޑު ޙިމާޔަތްކުރުމަށް ބޭނުންވާ ރިވެޓްމަންޓް ޖެހުމާއި، ބޭރު ތޮށި ރަނގަޅު ފެންވަރަކަށް މަރާމާތުކުރުމުގެ މަސައްކަތެވެ. އަދި ރަނގަޅު ފެންވަރަކަށް މަގުތައް ހެއްދެވުމުގެ މަސައްކަތް ފެށުމަށް ބޭނުންވާ ސާމާނާއި މެޝިނަރީޒް އަދި ވެހިކަލްތައް ގެނެސް، އެމަސައްކަތް ފެށުމަށް މިހާރުދަނީ ތައްޔާރުވަމުންނެވެ.
އިންޑަސްޓްރިއަލް ވިލެޖާއި ގުޅޭގޮތުން ވާހަކަފުޅުދައްކަވަމުން ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވީ، މިހާރު މަސައްކަތް ކުރިއަށްދާ ސްޕީޑަށް ބަލާނަމަ، ބޮޑު ހިލަޖަހާ، ބޭރު ތޮށި މަރާމާތުކުރުމުގެ މަސައްކަތް ޑިސެމްބަރު މަހުގެ މެދެއްހާތާ ނިންމާލެވޭނެކަމަށެވެ. އަދި އިންޑަސްޓްރިއަލް ވިލެޖްގެ މަގުހެދުމާއި، މަގުބައްތިޖެހުމުގެ މަސައްކަތް އަންނަ ފެބްރުއަރީ މަހުގެ ނިޔަލަށް ނިންމާލެވޭނެކަމަށް މިނިސްޓަރ މުޢިއްޒު ވިދާޅުވިއެވެ.
މަގުހެދުމުގެ އިތުރުން، އިންޑަސްޓްރިއަލް ވިލެޖުގައި މިވަގުތު ކުރަމުންދާ އަނެއް މުހިއްމު މަސައްކަތަކީ އުޅަނދުފަހަރު ވަނުމަށް ދެކުނު ފަރާތުގައި ހަދާ ނެރުގެ މަސައްކަތެވެ. މިނެރުގެ މަސައްކަތްވެސް އަންނަ އޭޕްރީލް މަހުގެ ނިޔަލަށް ނިންމާލެވޭނެކަމަށް މިނިސްޓަރ ވިދާޅުވިއެވެ. އިންޑަސްޓްރިއަލް ވިލެޖަކީ ސިނާޢީ އެކި ކަހަލަ ބޭނުންތަކަށް ޚާއްސަކޮށްގެން ތަރައްޤީކުރައްވާ ސަރަޙައްދެއްކަމުން، އިންޑަސްޓްރިއަލް ވިލެޖް ހެދިގެންދާނީ ތިމާވެއްޓާވެސް ރައްޓެހިގޮތަކަކަމަށް ހައުސިންގ މިނިސްޓްރީން ހާމަކުރައްވައެވެ.
މި މަޝްރޫޢު އެއްކޮށް ނިމުމުން، އިންޑަސްޓްރިއަލް ވިލެޖުގައި މާލެއިން ކުނި ބޭރުކުރާ ވޭސްޓް މެނޭޖްމަންޓް ސެންޓަރެއް ޤާއިމުކުރުމާއި، މާލެތެރޭގައި ހުރިއެކި ކަހަލަ ކެމިކަލް ގުދަންތަކާއި، ވޯކްޝޮޕް، ގަރާޖްފަދަ ތަންތަން ހިންގޭނެފަދަ މަލްޓި-ސްޓޯރީ ބިލްޑިންގތަކެއް ތަރައްޤީކުރެވިގެންދާނެއެވެ. މީގެ އިތުރުން، މާލޭގައި ބޭނުންކުރަމުންދާ ހެވީ ވެހިކަލްތައް ޕާކްކުރެވޭނެ ސަރަޙައްދެއް ޤާއިމުކުރުމާއި، ރެޑީމިކްސް ކޮންކްރީޓް ހަދާ ސަރަޙައްދެއް ޤާއިމުކުރެވިގެންދާނެއެވެ.