ހއ. ހޯރަފުށްޓަކީ ދަނޑުވެރި ރަށަކަށް ނުވިނަމަވެސް، އެރަށުގައި އުފައްދާފައިވާ ކޯރޕަރޭޓިވް ސޮސައިޓީއަކުން އަންނަނީ ދަނޑުވެރިކަމުގެ ސިނާޢަތަށް ވަދެ، އެކަމުން ރަނގަޅު ނަފާއެއް ހޯދަމުންނެވެ. "ބިޒް ވިލް" ކޯޕަރޭޓިވް ސޮސައިޓީއަކީ މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އަދި އިންޓަރނޭޝަނަލް ފަންޑު ފޮރ އެގްރިކަލްޗުރަލް ޑިވެލޮޕްމަންޓް، އިފާޑާ ގުޅިގެން ރާއްޖޭގައި ހިންގާ ޑައިވަރސިފިކޭޝަން ޕްރޮގްރާމްގެ ދަށުން ހިންގާ ކޯޕަރޭޓިވް ސޮސައިޓީއެކެވެ.
ބިޒް ވިލް ކޯރަޕަރޭޓިވް ސޮސައިޓީގައި ހައްދާ ބާވަތްތަކުގެ ތެރޭގައި، ލެޓިއުސް، ކިއުކަމްބާ، މެލަން، ބަޓާރ ނަޓްސް އަދި ކަރާ ހިމެނެއެވެ. ޒުވާރި އަދި ދޮންކެޔޮވެސް ހެއްދެމުގެ މަސައްކަތް މިހާރު އެ ކޯރޕަރޭޓިވް ސޮސައިޓީން ވަނީ ފަށާފައެވެ. އެގޮތުން މިހާރު ދޮންކެޔޮ ހަތަރު ސަތޭކައެއްހާ ގަސް މިހާރު ވަނީ އިންދާފައެވެ. އަދި ސްޓޯބެރީއާއި ކެކްޓަސްފަދަ ތަކެތި ހެއްދުމުގެ މަސައްކަތް ފެށުމަށް ބިޒް ވިލްއުން އަންނަނީ ތައްޔާރުވަމުންނެވެ.
img:http://s2.psmnews.mv/images/660x400/14807530251892.jpg|ބިޒް ވިލް އިން ހައްދާފައިވާ މިރުސް ގަސްތަކެއް
ދަނޑުވެރިކަމުން ރަރގަޅު ނަފާއެއް ހޯދިދާނެކަން ހޯރަފުށީގައި އުފައްދާފައިވާ ބިޒް ވިލް ކޯރޕަރޭޓިވް ސޮސައިޓީން އަންނަނީ ދައްކަމުންނެވެ. އެގޮތުން ކުރިމަގުގައި މިހާރަށްވުރެ ވިޔަފާރި ފުޅާކުރުމަށް އެ ކޯރޕަރޭޓިވުން ބޭނުންވެއެވެ. ބިޒްވިލް ކޯރޕަރޭޓިވް ސޮސައިޓީގެ ޗެއަރ ޕާސަން ޢަބްދުލް މަތީން މުޙައްމަދު ވިދާޅުވީ ކުރިއަށް އޮތް ތާނގައި ދަނޑުވެރިކަމާ ގުޅުން ހުރި އިތުރު ދާއިރާތަކަށްވެސް އެ ކޯރޕަރޭޓިވްގެ ވިޔަފާރި ފުޅާކުރުމަށް ވިސްނާފައިވާ ކަމަށެވެ.ބިޒް ވިލް ކޯރޕަރޭޓިވް ސޮސައިޓީގައި ރަޖިސްޓްރީވެފައިވާ ޢާއްމު މެމްބަރުންގެ އަދަދު ފަސް ސަތޭކަ ފަންސަވީހަށް ވަނީ އަރާފައެވެ. މި ކޯރޕަރޭޓިވާމެދު މެންބަރުން ކުރަމުން އަންނަނީ ފޮނި އުއްމީދުތަކެކެވެ. އަދި ކޯރޕަރޭޓިވްގެ މަސައްކަތްތަކާމެދު މެމްބަރުން ތިބީ ހިތްހަމަޖެހިފައެވެ.
ބިޒް ވިލް ކޯރޕަރޭޓިވް ސޮސައިޓީއަކީ ދެހާސް ހަތަރު ވަނަ އަހަރު ސުނާމީ އެރުމާއި ގުޅިގެން މަސްވެރިކަން ދަށްވެގެން ދިޔުމާއި ގުޅިގެން އެ ރަށުގައި ވަޒީފާ ނެތް މީހުންގެ އަދަދު އިތުރުވެގެން ދިޔުމުން، އެކަމަށް ހައްލެއް ހޯދުމަށްޓަކައި އެރަށުގެ ބައެއް މީހުން އިސްނަގައިގެން ފެށި ކޯރޕަރޭޓިވް ސޮސައިޓީއެކެވެ.