ޒުވާނުންނަށް ޚާއްސަކޮށްގެން ގިނަ މަޝްރޫޢުތަކެއް ސަރުކާރުން ދަނީ ހިންގަވަމުންނެވެ. މިގޮތުން ޒުވާނުންގެ ދުޅަހެޔޮކަމާއި، ތަރައްޤީއަށް ޚާއްޞަ ކުރައްވައިގެން ތަރައްޤީ ކުރައްވަމުން ގެންދަވާ ހުޅުމާލޭގައި ޒުވާނުންނަށް ގިނަ ފުރުޞަތުތަކެއް ދަނީ ފަހިކޮށްދެމުންނެވެ.
މީގެތެރޭގައި ހުޅުމާލޭގައި ތަރައްޤީކުރާ އެތްލެޓިކް ސިންތަޓިކް ޓްރެކްއާއި، ޤަތަރު ސަރުކާރުގެ އެހީގައި ތަރައްޤީކުރާ ފުޓްބޯޅަ ސްޓޭޑިއަމް، އަދި ސްޕޯޓްސް ކޮމްޕްލެކްސް ހިމެނެއެވެ. މި މަޝްރޫޢުގެ މަސައްކަތްތައް އެކި މަރުޙަލާގައި ކުރިއަށްދާކަން ފާހަގަކޮށްލެވެއެވެ.
ރައީސް ޔާމީނުގެ ސަރުކާރުގައި "ޒުވާނުންނާއި ކުޅިވަރު" މި ތަޞައްވުރުގެ ދަށުން، ޒުވާނުންނަށް ޚާއްސަކޮށްގެން ސަރުކާރުން ގެންދަވަނީ ގިނަ މަޝްރޫޢުތަކެއް ހިންގަވަމުންނެވެ. މީގެ ތެރެއިން ޒުވާނުންގެ ސިޓީ، ހުޅުމާލޭގައި ކުރިއަށް ގެންދާ ބޮޑެތި މަޝްރޫޢުތައް ފާހަގަ ކޮށްލެވެއެވެ.
ޔޫތު މިނިސްޓަރ އިރުތިޝާމް އާދަމް ވިދާޅުވީ ކުޅިވަރުގެ ވަސީލަތްތައް ޤާއިމުކުރުމުގެ ގޮތުން ރާއްޖޭގެ 3 ސަރަޙައްދެއްގައި ސްޕޯޓްސް ޕާކްތަކެއް ތަރައްޤީކުރުމަށް ރާވާފައިވާ ކަމަށެވެ. މިކަމަށްޓަކައި ދަޢުލަތުގެ ބަޖެޓުން 1.4 މިލިއަން ރުފިޔާ ހަމަޖެހިފައިވާ ކަމަށް މިނިސްޓަރ ވިދާޅުވިއެވެ.
އަދި ހުޅުމާލޭގައި ބައިނަލްއަޤްވާމީ ފެންވަރުގައި ތަރައްޤީ ކުރަމުންދާ އެތްލެޓިކް ސިންތަޓިކް ޓްރެކްގެ މަޝްރޫޢުގެ މަސައްކަތް ވަރަށް ބާރަށް ކުރިއަށްދާކަން ފާހަގަކުރައްވާ ޔޫތް މިނިސްޓަރ ވިދާޅުވީ، މި ޓްރެކްގެ މަސައްކަތުގެ 75 އިންސައްތަ ނިމިފައިވާ ކަމަށެވެ. މިނިސްޓަރ ވިދާޅުވީ އަންނަ އަހަރުގެ ކުރީކޮޅު މި ޓްރެކް ހުޅުވިގެންދާނެ ކަމަށެވެ.
ޔޫތު މިނިސްޓަރ އިތުރަށް ވިދާޅުވީ މި ސަރުކާރުގެ އަމާޒަކީ ޒުވާނުންނަށް ޚާއްސަކޮށްގެން މިފަދަ ގިނަ މަޝްރޫތަކެއް ހިންގަވާ ގިނަ ފުރުސަތުތަކެއް ހޯއްދަވާދެއްވުން ކަމަށެވެ. އަދި މި ޓްރެކުގެ ސަބަބުން ޒުވާން އެތްލީޓުންނަށް ކުރިއަށް ދިއުމަށް ގިނަ ފުރުސަތުތަކެއް ހުޅުވިގެންދާނެ ކަމަށެވެ.
"ޔޫތުސިޓީގައި ސަރުކާރުން މިހާރު ބިނާކުރަމުންދާ އެތްލެޓިކް ސިންތަޓިކް ޓްރެކުގެ 75 ޕަސެންޓް ވަނީ ނިމިފަ، މި މަޝްރޫޢަށް ދިވެހި ސަރުކާރުންވަނީ 14 މިލިއަން ރުފިޔާ ވަނީ ޚަރަދުކޮށްފަ، މީޒުވާން އެތްލީތުންނަށް ކުރިއަށް ދިއުމަށް ހުޅުވައިދޭ ފުރުސަތުތަކެއް. މި ފުރުސަތުތަކުގެ ތެރެއިން ސާއިދު ފަދަ އެތައް އެތްލީޓުން އުފެދިގެންދާނެ. ބައިންލައަޤުވާމީ މައިދާނުގައި ޤައުމަށް ފަޚްރުވެރި މެޑަލްތަކެއް ލިބިގެންދިއުމަކީ އަޅުގަނޑުމެންނާއި، ޒުވާނުންގެވެސް އަމާޒް" ޔޫތު މިނިސްޓަރ އިރުތިޝާމް އާދަމް ވިދާޅުވިއެވެ.
މީގެ އިތުރަށް މިނިސްޓަރ ވިދާޅުވީ ޤަތަރު ސަރުކާރުން ހުޅުމާލޭގައި ތަރައްޤީ ކުރެއްވުމަށް ހަމަޖެހިފައިވާ ފުޓްބޯޅަ ސްޓޭޑިއަމް ޢަމަލީ މަސައްކަތްތައް އަންނަ އަހަރުގެތެރޭގައި ފެށިގެންދާނެ ކަމަށެވެ.
ޒުވާނުންނާއި ގުޅިލާމެހިފައިވާ ގިނަ މަޝްރޫޢުތައް ހުޅުމާލޭގައި ސަރުކާރުން ހިންގަވަމުންދާއިރު، މިހާރު ހުޅުމާލޭގައި ވަނީ ސްޕޯޓުސް ކޮމްޕްލެސްއެއް ޤާއިމްކުރުމަށް ކުރަންޖެހޭ މަސައްކަތްތައް ފަށާފައެވެ. މި ސްޕޯޓްސް ކޮމްޕްލެކްސް ޤާއިމުވެގެން ދިޔުމުން ކުޅިވަރު އެސޯސިއޭޝަންތަކަށް ދިމާވެފައިވާ ދަތިތަކެއް ޙައްލެއް ލިބިގެންދާނެ ކަމަށް ޔޫތު މިނިސްޓްރީން ވިދާޅުވެއެވެ.
ޒުވާނުންގެ ތަރައްޤީއަށް ކުރައްވަމުންދާ މަސައްކަތްތަކަށް އަހަރަކު 300 މިލިއަނެއްހާ ރުފިޔާ ކަނޑައަޅުއްވާފައިވާއިރު، ރާއްޖޭގެ އެކި ސަރަޙައްދުގައި ކުޅިވަރާއި ކަސްރަތުގެ އެކި ވަސީލަތްތައް ޤާޢިމު ކުރެއްވުމުގެ މަސައްކަތް ސަރުކާރުން ދަނީ ކުރައްވަމުންނެވެ.