ސަބާގެ އުފެއްދުންތައް ސާކުގެ ޤައުމުތަކަށް އެއްވެސް ޓެރިފަކާ ނުލައި އެތެރެކުރުމާ ގުޅޭގޮތުން ސާރކުގެ ޤައުމުތަކުގެ މެދުގައި އެއްބަސްވެފައިވުމަކާއި ހަމައަށް އާދެވިފައިވާކަން އިކޮނޮމިކް މިނިސްޓްރީން ހާމަކުރައްވައިފިއެވެ.
ސަބާ މޯލްޑިވްސް ޕްރޮޖެކްޓަކީ، ގޭގައި މަސައްކަތްކުރާ ފަރާތްތަކަށް އެފަރާތްތަކުގެ އުފެއްދުންތަކަށް މާރކެޓް ހޯއްދަވައިދެއްވައި، ރަނގަޅު ޢާމްދަނީއެއް ލިބޭނެ މަގުފަހިކޮށްދެއްވުމަށްޓަކައި ސާރކު ޑިވެލޮޕްމަންޓު ފަންޑާއި ދިވެހި ސަރުކާރާ ގުޅިވަޑައިގެން އުފައްދަވަފައިވާ ކޯރޕަރޭޓިވް ސޮސައިޓީއެކެވެ. އަންހެނުން ބާރުވެރިކުރުވައި، ވިޔަފާރީގެ ދާއިރާއިން އަންހެނުންނަށް ކުރިއެރުންތައް ހޯއްދަވައިދެއްވުމަށް ސަރުކާރުން ކުރައްވާ ގިނަ މަސައްކަތްތަކުގެ ތެރެއިން އެއްކަމަކީ ސަބާ މޯލްޑިވްސް ޕްރޮޖެކްޓެވެ. ސަރުކާރުގެ 40 އިންސައްތަ ޙިއްޞާ އަދި ގޭގައި ތިބިގެން މަސައްކަތްކުރާ ފަރާތްތަކުގެ 60 އިންސައްތަ ޙިއްޞާވާ މި ކޯރޕަރޭޓިވް ސޮސައިޓީގައި ރަޖިސްޓްރީވެފައިވާ ޢާއްމު މެމްބަރުންގެ އަދަދު 2،000 އާއި ގާތްކުރެއެވެ. img:http://s4.psmnews.mv/images/660x400/14810180568633.jpg|ސަބާ ކޯޕަރޭޓިވެ ސޮސައިޓީގެ ދަށުން އުފައްދާ ބައެއް އުފެއްދުން - ފޮޓޯ: ސަބާ ކޯޕަރޭޓިވެ ސޮސައިޓީ
ސަބާގެ މަސައްކަތްތަކާއި ގުޅޭގޮތުން ޕީއެސްއެމްއަށް ދެއްވި އިންޓަރވިއުއެއްގައި އިކޮނޮމިކް މިނިސްޓަރުގެ ނާއިބް ޢަބްދު ﷲ މުޙައްމަދު ވިދާޅުވީ މިދިޔަ އަހަރު ބޭއްވެވި ސާރކްގެ ސަބާ ޤައުމުތަކުގެ ބައްދަލުވުމުގައި ޒީރޯ ޓްރިފްގައި ސާކުގެ ޤައުމުތަކުގެ މެދުގައި ސަބާގެ ތަކެތި ވިއްކޭނެ އިންތިޒާމް ހަމަޖެއްސުމަށް ރާއްޖެއިން ހުށަހެޅި ކަމަށާއި ހުރިހާ ޤައުމަކުންވެސް އެކަމަށް ތާއީދު ކޮށްފައިވާ ކަމަށެވެ. އަދި އަންނަ އަހަރު ކުރީކޮޅު އެކަމާ ގުޅޭގޮތުން ރަސްމީ އެއްބަސްވުމެއްގައި ސޮއިކުރެވޭ ކަމަށް ޢަބްދު ﷲ މުޙައްމަދު ވިދާޅުވިއެވެ.
ސަބާގެ މަސައްކަތްތަކަށް 10 ބުރީގެ ޢިމާރާތެއް އެޅުއްވުމަށް ވަނީ ހަމަޖެހިފައެވެ. އެގޮތުން އެކަމަށް ބިން އަދި ޢިމާރާތްކުރުމަށް ބޭނުންވާ ފައިސާވެސް ހަމަޖެހިފައިވާ ކަމަށް އަބްދު ﷲ މުޙައްމަދު ވިދާޅުވިއެވެ. މީގެއިތުރުން އައްޑޫ ސިޓީގައި ޤާއިމްކުރައްވާ ސަބާގެ ސެންޓަރުގެ ޢަމަލީ މަސައްކަތް ޑިސެމްބަރ މަހުގެތެރޭގައި ފައްޓަވާނެ ކަމަށާއި ޖެނުއަރީ މަހުގެތެރޭގައި އެތަނުގެ މަސައްކަތް ނިމޭނެ ކަމަށް އިކޮނޮމިކް މިނިސްޓަރުގެ ނާއިބް ޢަބްދު ﷲ މުޙައްމަދު ވިދާޅުވިއެވެ.
މި މަޝްރޫޢަކީ މިނިސްޓްރީ އޮފް އިކޮނޮމިކް ޑިވްލޮޕްމަންޓުން އަންހެންނުން ބާރުވެރި ކުރުވުމަށް 2013 ވަނަ އަހަރު ފެއްޓެވި ޚާއްޞަ މަޝްރޫޢެކެވެ.