މާލޭގެ މައި 13 މަގެއް ތަރައްޤީ ކުރެއްވުމަށް ހިންގަވާ މަޝްރޫޢުގެ ދަށުން މަޖީދީ މަގުގެ 2 ވަނަ ސެގްމަންޓްގެ މަސައްކަތް ނިންމަވައި 3 ވަނަ ސެގްމަންޓް ހައްދަވަމުން އެބަގެންދަވައެވެ. މަގީދީމަގު ތަރައްޤީ ކުރެއްވުމުގެ މަސައްކަތް ފެއްޓެވީ އޮކްޓޯބަރ މަހުގައެވެ.
މީގެ 30 އަހަރު ކުރިން ތަރައްޤީ ކުރައްވާފައިވާ މާލޭގެ މަގުތައް، މަރާމާތު ނުކުރައްވައި ގިނަ ދުވަސްތަކެއްވުމުގެ ސަބަބުން، މަގުތަކުގެ ގާތައް ވަނީ ހާލަކުވެފައެވެ. އަދި، އެކި ކަންކަމަށް މަގުތަކުން ގާތައް ނަގައި، އަލުން ގައު އެތުރުމުގެ ކަންކަން ކޮށްފައި ހުންނަ ގޮތުން ގިނަ މަގުތަކެއް ވަނީ އަޑިގުޑަންވެފައެވެ. މީގެ އިތުރުން، ބައެއް ސަރަޙައްދުތަކުގައި ކާނުތަކަށްވަނީ ވެއްޔާއި ކުނިއެޅި، އަދި ކާނުތައް ހަލާކުވެ ފެން ނުހިނދޭ ޙާލަތަށް ވަނީ ގޮސްފައެވެ. img:http://s2.psmnews.mv/images/660x400/14789538114457.jpg|މާލޭ މަގުތައް ރަނގަޅު ފެންވަރަކަށް ހެދުމުގެ މަޝްރޫޢުގެ ތެރެއިން މަޖީދީ މަގުގެ މަސައްކަތް ހިނގަމުންދާގޮތް - ފައިލް ފޮޓޯ: ޕީއެސްއެމް / ޙުސައިން ސަޢީދު
މީގެ ނަތީޖާއެއްގެ ގޮތުން، ވިއްސާރަ މޫސުމުގައި މާލޭގެ މަގުތަކުގައި ފެންބޮޑުވެ، ހިނގާބިނގާވެ އުޅޭ މީހުންނާއި، ދުއްވާ އުޅަނދުފަހަރަށްވަނީ ދަތިތަކާއި ކުރިމަތިލާން ޖެހިފައެވެ. މާލޭގެ މަގުތަކުގެ ޙާލަތަކީ، މާލޭގައި ދިރިއުޅޭ މީހުންނަށް މިހާރު ކުރިމަތިވެފައިވާ އެންމެ ބޮޑު އެއް ދައްޗެވެ.
ރައީސް ޢަބްދުﷲ ޔާމީން ޢަބްދުލް ޤައްޔޫމްގެ ސަރުކާރުގެ އެންމެ ފުރަތަމަ އެންމެ ބޮޑު އެއް އަމާޒަކަށްވީ، ރާއްޖޭގެ ރައްޔިތުންނަށް ދަތިވެފައިވާ އެތައް ކަމެއް ޙައްލު ކޮށްދެއްވުމަށް މަސައްކަތް ފެއްޓެވުމެވެ. ރާއްޖޭގެ އުތުރުން ފެށިގެން ދެކުނުގެ ހުރިހާ ސަރަޙައްދަކަށް އަމާޒުކުރައްވައިގެން ރައީސް ޔާމީންގެ ސަރުކާރުން ފެއްޓެވި މަޝްރޫޢުތައް ވެގެންދިޔައީ، ދިވެހި ރައްޔިތުންނާއި ޤައުމުގެ ތަރައްޤީއަށް ބޮޑެތި ކުރިއެރުންތަކެއް ގެނެސްދިން ބިޔަ މަޝްރޫޢުތަކަކަށެވެ. img:http://s4.psmnews.mv/images/660x400/14789539601840.jpg|މާލޭ މަގުތައް ރަނގަޅު ފެންވަރަކަށް ހެދުމުގެ މަޝްރޫޢުގެ ތެރެއިން މަޖީދީ މަގުގެ މަސައްކަތް ހިނގަމުންދާގޮތް - ފައިލް ފޮޓޯ: ޕީއެސްއެމް / ޙުސައިން ސަޢީދު
ރާއްޖޭގެ ވެރިކަންކުރާ މާލޭ ސިޓީއަށް އަމާޒު ކުރައްވައިގެން ފެއްޓެވި މަޝްރޫޢުތަކުގެ ތެރޭގައި، މާލޭގެ މަގުތަކުގެ ޙާލަތު ރަނގަޅު ކުރެއްވުމާއި މާލޭ މަގުހެދުމުގެ މަޝްރޫޢު ފާހަގަކޮށްލެވެއެވެ. މާލޭގެ މަގުތައް ރަނގަޅު ފެންވަރަކަށް ތަރައްޤީ ކުރެއްވުމަށް މި އަހަރުގެ އޮކްޓޯބަރު މަހު ފެއްޓެވި މި މަޝްރޫޢުގެ ދަށުން، 13 މަގެއް އަލުން ތަރައްޤީ ކުރައްވައި، މާލޭގެ މައިމަގު ކަމަށްވާ މަޖީދީމަގުގެ މަސައްކަތް މިހާރު ގެންދަވަނީ ކުރަމުންނެވެ. މިގޮތުން މަޖީދީމަގު ހެދުމުގެ މަޝްރޫޢުގެ 2 ވަނަ ސެގްމެންޓްގެ މަސައްކަތް މިހާރުވަނީ މުޅިން ނިމިފައެވެ.
މި މަޝްރޫޢުގެ ދަށުން މަޖީދީމަގުގެ 3 ވަނަ ސެގްމެންޓް ތަރައްޤީ ކުރުމުގެ މަސައްކަތް މިހާރު ކުރިއަށްދާއިރު، މި މަގު ތަރައްޤީ ކުރައްވަނީ ހިނގާ މީހުންނާއި، ދުއްވާ އުޅަނދުފަހަރަށާއި ފުރޮޅުލީ ގޮނޑި ފަދަ ތަކެތި ބޭނުންކުރާ ފަރާތްތަކަށް ލުއި ފަސޭހަވާނެ ގޮތަކަށްކަން ފާހަގަކޮށްލެވެއެވެ.