ހުޅުމާލޭގައި އަލަށް ޢިމާރާތްކުރާ "ވެއަރހައުސް ޝެލް"ގެ މަސައްކަތް އަންނަ އަހަރުގެ ކުރީކޮޅު ނިންމައި، އެތަން ބޭނުންކުރުމަށް ދޫކުރާނެކަމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީން ހާމަކޮށްފިއެވެ.
މިއީ ހުޅުމާލޭގައި އެކިކަހަލަ ވިޔަފާރިކުރާ ފަރާތްތަކާއި، ސިނާޢީ މަސައްކަތްތައް ކުރާ ފަރާތްތަކަށް މުދާ ގުދަންކުރުމުގައި މިހާރު ދިމާވެފައިވާ ޖާގައިގެ ދަތިކަން ޙައްލުކޮށްދިނުމަށް، އެޗް.ޑީ.ސީއިން އިސްނަގައިގެން، އެކުންފުނީގެ ޚަރަދުގައި އިމާރާތްކުރާ ގުދަންތަކެކެވެ.
ތިން ބުރީގެ މި ޢިމާރާތުގައި ގުދަންކުރުމަށް ޚާއްޞަ 36 ޔުނިޓެއް ޤާއިމުކުރުމަށް ހަމަޖެހިފައިވާކަމަށް އެޗް.ޑީ.ސީން ބުނެއެވެ. ހުޅުމާލޭގައި އަލަށް ޢިމާރާތްކުރާ "ވެއަރހައުސް ޝެލް" ގެ ތިން ބުރީގެ މި ޢިމާރާތުގެ ފައުންޑޭޝަން އެޅުމުގެ މަސައްކަތް މިހާރު ވަނީ ނިމިފައެވެ. އަދި މިހާރު ކުރަމުންދަނީ އެތަނުގެ ސްޓްރަކްޗަރ އެތުރުމުގެ މަސައްކަތެވެ. އެ މަސައްކަތުގެވެސް ބޮޑު ބައެއް މިހާރު ވަނީ ނިމިފައެވެ. މިތަން ނިމޭއިރު، ގުދަންކުރުމަށް މުދާ ވެއްދުމާއި ނެރުމުގެ އިންތިޒާމްވެސް ހަމަޖެހިގެންދާނެކަމަށް އެޗް.ޑީ.ސީން ވިދާޅުވެއެވެ.
މި ޢިމާރާތުގެ މަސައްކަތް އަންނަ އަހަރުގެ ކުރީކޮޅު މުޅިން ނިންމުމަށް އެކުންފުނިން ވަނީ ކަނޑައަޅާފައެވެ. އަދި ޢިމާރާތުން ޔުނިޓްތައް ދޫކުރާނެ އުޞޫލްތައް ކައިރި މުސްތަޤުބަލެއްގައި ޢާއްމުކުރާނެކަމަށްވެސް އެޗް.ޑީ.ސީން ބުނެއެވެ.