ދިވެހިންނަކީ ފުދުންތެރި، އަދި ތަރައްޤީވެފައިވާ ތަހުޒީބު މުޖުތަމަޢުއެއްގައި ދިރިއުޅެމުންދާ ބަޔަކަށް ހެއްދެވުމަށް ސަރުކާރުގެ އިޤްތިޞާދީ އެޖެންޑާގެ ދަށުން ރާއްޖޭގެ އެކި ސަރަޙައްދުތަކުގައި އުމްރާނީ ތަރައްޤީއާއި ގުޅުންހުރި އެތައް މަޝްރޫޢެއް ދަނީ ހިންގަވަމުންނެވެ. މީގެތެރެއިންވެސް އެންމެ ފާހަގަކޮށްލެވޭ އެއް މަޝްރޫޢަކީ ބިން ހިއްކެވުމުގެ މަޝްރޫޢުތަކެވެ. ސަރުކާރުގެ ފާއިތުވި ތިން އަހަރު ދުވަހުގެ ތެރޭގައި އެކެއް ޕޮއިންޓް އަށެއް ބިލިއަން ރުފިޔާގެ އަގުހުރި މިފަދަ ނުވަ މަޝްރޫޢެއް ރާއްޖޭގެ އެކި ސަރަޙައްދުގައި ވަނީ ހިންގަވާފައެވެ. މިއިން ކޮންމެ މަޝްރޫޢަކީވެސް ދިވެހި ރައްޔިތުންގެ އުއްމީދުތަކަކާއި ހުވަފެންތަކާއި ގުޅިފައިވާ މުހިއްމު މަޝްރޫޢުތަކެކެވެ. ސަބަބަކީ މިފަދަ ކޮންމެ މަޝްރޫޢަކީ ތަރައްޤީގެ އައު އުސްމިންތަކަކަށް ވާސިލުވުމަށް ހުޅުވިގެންދާ ދޮރުތަކެއްކަމުންނެވެ.
ތ. ގުރައިދޫގައި ސަރުކާރުން ހިންގަވާ ބިން ހިއްކެވުމުގެ މަޝްރޫޢަކީވެސް މިދެންނެވިފަދަ ރައްޔިތުންގެ އުއްމީދުތަކާއި ގުޅިފައިވާ މުހިއްމު މަޝްރޫޢެކެވެ.
އާބާދީގައި ގާތްގަނޑަކަށް ދެހާހަށްވުރެ ގިނަ މީހުން ދިރިއުޅެމުން އަންނަ ތ. ގުރައިދޫއަކީ ތ. އަތޮޅުގެ އިރުމަތީ ބިތުގައި އޮންނަ، ތަރައްޤީގެ ގޮތުން މުޅި ތ އަތޮޅުގައިވެސް ފާހަގަކޮށްލެވޭ އެއް ރަށެވެ. މަސްވެރިކަމަށް ލޯބިކުރާ، އަދި މަސްވެރިކަމުން ނަފާ ހޯދާ ރައްޔިތުންތަކެއް ދިރިއުޅޭ ތ. ގުރައިދޫއަކީ ބޮޑު ފަޅެއްގެ މައްޗަށް އެކުލެވިގެންވާ ރަށެކެވެ. އެރަށަށް ދިމާވެފައިވާ ބިމުގެ ދަތިކަމަށް ހައްލެއް ގެންނެވުމުގެ ގޮތުން، ގުރައިދޫ ބިން ހިއްކެވުމުގެ މަޝްރޫޢު ސަރުކާރުން އެމް.ޓީ.ސީ.ސީއާއި ހަވާލުކުރައްވާފައިވަނީ 9 ފެބްރުއަރީ 2014 ގައެވެ. އަދި އެކުންފުނިން މި މަޝްރޫޢުގެ އަމަލީ މަސައްކަތް ފަށާފައިވަނީ 24 ފެބްރުއަރީ 2014ގައެވެ.
img:http://s3.psmnews.mv/images/660x400/14818954308823.jpg|ގުރައިދޫގައި އަލަށް ހިއްކާފައިވާ ސަރަޙައްދު
ދަޢުލަތުގެ ބަޖެޓުން 126 މިލިއަން ރުފިޔާ ޚަރަދުކުރައްވައިގެން ހިންގަވާ މި މަޝްރޫޢުގެ ދަށުން ގުރައިދޫގެ ފަޅުން ސާޅިސް ފަސް ހެކްޓަރުގެ ސަރަޙައްދެއް ހިއްކެވުމަށް ވަނީ ހަމަޖެހިފައެވެ. މިއީ އެރަށުގައި މިހާރު ބޭނުންކުރަމުންދާ ބިމަށްވުރެވެސް ސައިޒުގެގޮތުން ބޮޑު ބިމެއްކަން ފާހަގަކޮށްލެވެއެވެ. ސިނާޢީގޮތުން މާގިނަ މަސައްކަތްތަކެއް މިވަގުތު ރަށުގައި ކުރިއަށް ނުދިޔަނަމަވެސް، މި މަޝްރޫޢާއެކު، ތަރައްޤީރޮނގުން އުއްމީދީ މަޝްރޫޢުތަކެއް ގުރައިދޫގައިވެސް ގެންދެވިދާނެކަމަށް ޤަބޫލުކުރައްވާކަމަށް ގުރައިދޫ ކައުންސިލްގެ ރައީސް ޙުސެއިން އަޙަދު ވިދާޅުވިއެވެ.
ޕީ.އެސް.އެމް ނިއުސްއާއި ވާހަކަދެއްކި ގުރައިދޫ ރައްޔިތެއް ބުނިގޮތުގައި އެރަށުގައި ކުރިއަށްގެންދާ ބިން ހިއްކުމުގެ މަސައްކަތް އެއްކޮށްނިމި، އެ ސަރަޙައްދުގައި މީހުން އާބާދުވާން ފަށާ މަންޒަރު ދެކިލުމަކީ މިހާރު އެމީހުން އެންމެ ބޭނުންވާ އެއްކަން ކަމުގައެވެ. އަދި މިއީ އެތައް ރައްޔިތުންތަކެއްގެ އުއްމީދުތަކާއި ގުޅިފައިވާ، މުޅި ތ. އަތޮޅަށްވެސް މުހިއްމު މަޝްރޫޢެއްކަން އެމީހުން ފާހަގަކުރިއެވެ.
ގުރައިދޫ ބިން ހިއްކެވުމުގެ މަޝްރޫޢުގެ މަސައްކަތް މިހާރުވެސް ކުރިއަށްގެންދަވާއިރު، މި މަޝްރޫޢުގެ ބޮޑު ބައެއް މިހާރު ވަނީ އެއްކޮށް ނިމިފައެވެ. ގުރައިދޫއަކީ ތ. އަތޮޅުގެ އެހެން ރަށްރަށުގެ ރައްޔިތުންވެސް މުހިއްމު ބޭނުންތަކަށް އަންނަ ރަށަކަށްވެފައި، އަދި އެހެން އަތޮޅުތަކަށް ދަތުރުކުރާ ބޯޓުފަހަރުވެސް ދަތުރުމަތީ މަޑުކޮށްލުމަށް ބަނދަރުކުރާ ރަށެއްކަމުން، ބިންހިއްކެވުމުގެ މިފަދަ މަޝްރޫޢެއް ގުރައިދޫގައި ހިންގެވުމަކީ އެއްގޮތަށްވުރެ ގިނަ ގޮތްގޮތުން އެރަށުގެ ރައްޔިތުންނަށް ފައިދާ ލިބޭނެކަމެއްކަން ގުރައިދޫ ރައްޔިތުންވެސް ދެކެއެވެ.