އިބްރާހީމް ނާޞިރު އިންޓަރނޭޝަނަލް އެއަރޕޯޓުގައި ޤާއިމުކުރާ އާ ސީޕްލޭން ޓާމިނަލަށް ބޭނުންވާ ބިން ހިއްކުމުގެ މަސައްކަތް އަންނަމަހު ފެށުމަށް ހަމަޖައްސައިފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޑެޓް، އެމް.އޭ.ސީ.އެލުން ހާމަކުރާ ގޮތުގައި އެއަރޕޯޓުގައި ޤާއިމުކުރާ އާ ސީޕްލޭން ބޭސްއަށް ބޭނުންވާ ބިން ހިއްކުމަށް ހަމަޖެހިފައިވަނީ ހުޅުލޭގައި ހުރި އެއަރ ޓްރެފިކް ކޮންޓްރޯލް ޓަވަރ، އޭ.ޓީ.ސީ ޓަވަރ ހިމެނޭ ސަރަޙައްދުންނެވެ.
އިބްރާހީމް ނާޞިރު އިންޓަރނޭޝަނަލް އެއަރޕޯޓު ތަރައްޤީކުރެއްވުމުގެ ބިޔަ މަޝްރޫޢުގެ ދަށުން، އެއަރޕޯޓުގައި އަލަށް ހެއްދެވުމަށް ހަމަޖެހިފައިވާ ރަންވޭގެ މަސައްކަތަށް ބޭނުންވާ ބިން ހިއްކުމުގެ މަސައްކަތް ކުރަމުންދަނީ ސީޕްލޭންގެ އޮޕަރޭޝަންތައް ކުރިއަށްދާ ސަރަޙައްދުގައި ކަމަށްވާތީ، ހުޅުލޭގައި ހުރި އެއަރ ޓްރެފިކް ކޮންޓްރޯލް ޓަވަރ، އޭ.ޓީ.ސީ ޓަވަރ ހިމެނޭ ސަރަޙައްދުން ބިން ހިއްކުމަށްފަހު، އެ ސަރަޙައްދަށް މިހާރު ބޭނުންކުރަމުންދާ ސީ-ޕްލޭން ބޭސް ބަދަލުކުރުމަށް އެމް.އޭ.ސީއެލުން ވަނީ ނިންމާފައެވެ.
img:http://s1.psmnews.mv/images/660x400/14762634783208.jpg|ސީޕްލޭން ބޭސް - ފޮޓޯ: ޕީއެސްއެމް / އިސްމާޢީލް އަބްދުއްރަޙީމް
އެއަރޕޯޓް ތަރައްޤީކުރުމުގެ މަޝްރޫޢާ ގުޅޭ އެންމެފަހުގެ މަޢުލޫމާތު، ނޫސްވެރިންނާ ޙިއްޞާކުރައްވަމުން އެމް.އޭ.ސީ.އެލްގެ މެނޭޖިންގ ޑިރެކްޓަރ ޢާދިލް މޫސާ ވިދާޅުވީ، ސީ-ޕްލޭން ބޭސް ބަދަލުކުރުމަށް ބޭނުންވާ ކޮންސެޕްޓް އަދި ޑީޓެއިލް ޑިޒައިން ތައްޔާރުކޮށް ނިމިފައިވާކަމަށެވެ. އަދި އާ ސީ-ޕްލޭން ބޭސްއަށް ބޭނުންވާ ބިން ހިއްކުމުގެ މަސައްކަތް އަންނަ މަހުގެ ތެރޭގައި ކޮންޓްރެކްޓަރަކާ ޙަވާލުކޮށް، އެކަމުގެ ޢަމަލީ މަސައްކަތް ފަށާނެކަމަށް ޢާދިލް ވިދާޅުވިއެވެ.
އެއަރޕޯޓް ތަރައްޤީކުރެއްވުމުގެ މަޝްރޫޢުގެ ދަށުން އައު ރަންވޭއަށް ބޭނުންވާ ބިން ހިއްކުމުގެ މަސައްކަތް މެދުކެނޑުމެއް ނެތި ކުރިއަށްދާކަމަށް އެމް.އޭ.ސީއެލުން ބުނެއެވެ. އެގޮތުން މި މަޝްރޫޢުގެ ދަށުން މިހާރުވެސް 19 ހެކްޓަރަށްވުރެ ބޮޑު ސަރަޙައްދެއް ހިއްކައި ނިންމާފައިވާ ކަމަށް އެކުންފުނިން ހާމަކުރެއެވެ. އަދި ބިން ހިއްކުމުގެ މަސައްކަތް ކުރަމުންދަނީ އެއަރޕޯޓްގައި ސީޕްލޭންގެ އޮޕަރޭޝަންތައް ހިންގާ ސަރަޙައްދުގައިކަމުން، މި މަސައްކަތް ކުރަމުންދަނީ ސީޕްލޭންގެ އޮޕަރޭޝަންތަކާއި، އެއަރޕޯޓްގެ އިތުރު އެއްވެސް އޮޕަރޭޝަނަކަށް މި މަޝްރޫޢުގެ ސަބަބުން، ދަތިނުވާނެހެން ދުރާލައި ރާވައިގެންކަމަށްވެސް އެމް.އޭ.ސީ.އެލުން ބުނެއެވެ.
ހަމައެހެންމެ ބިން ހިއްކަމުންދާ ސަރަޙައްދުގެ ފަޅުގެ ބޮޑު ބަޔަކީ ގިނަ ޢަދަދެއްގެ ޔޮޓްފަހަރު އަޅާފައި ހުންނަ ސަރަޙައްދެއްކަމުން، މަސައްކަތް ކުރިއަށްދާ މިންވަރަކުން، އެ ސަރަޙައްދުން ޖާގަ ހުސްކުރުމުގެ މަސައްކަތްވެސް އެކުންފުނިން އަންނަނީ ކުރަމުންނެވެ.