އެމް.ޑަބްލިޔު.އެސް.ސީގެ ޑިވިޝަންތައް އަތޮޅުތަކުގައި އިތުރުކުރުމަށް ޚާއްޞަ މަސައްކަތްތަކެއް ފަށްޓަވައިފިއެވެ.
ރާއްޖޭގެ ތަރައްޤީއަށް ސަރުކާރުން ކުރައްވާ މަސައްކަތްތަކުގައި މާލޭ ވޯޓަރ އެންޑް ސްވަރޭޖް ކޮމްޕެނީ، އެމް.ޑަބްލިޔު.އެސް.ސީއިން ވެސް އަންނަނީ މުހިއްމު ޙިއްޞާއެއް އަދާކުރަމުންނެވެ. ޚާއްޞަގޮތެއްގައި ރައްޔިތުންނަށް ބޭނުންވާ ސާފު ބޯފެނާއި، 24 ގަޑިއިރު ކަރަންޓުގެ ޚިދުމަތް ޔަޤީންކޮށްދެއްވުމަށް ސަރުކާރުން ކަނޑައަޅުއްވާފައިވާ އަމާޒު ޙާޞިލުކުރުމަށްޓަކައި އެމް.ޑަބްލިޔު.އެސް.ސީގެ ފަރާތުން ރާއްޖޭގެ އެކި ކަންކޮޅުތަކުގައި ފެނާއި ނަރުދަމާއާ ގުޅުންހުރި ގިނަ މަޝްރޫޢުތަކެއް މިހާރުވެސް ދަނީ ހިންގަމުންނެވެ.
ކުރިއަށް އޮތް 10 އަހަރަށް އެކުލަވާލާފައިވާ އެމް.ޑަބްލިޔު.އެސް.ސީގެ ސްޓްރެޓެޖިކް ޕްލޭނާ ގުޅޭގޮތުން އެމް.ޑަބްލިޔު.އެސް.ސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ވިދާޅުވީ، އެކުންފުނިން ދެމުން އަންނަ ޚިދުމަތްތަކަކީ ރައްޔިތުންގެ ދިރިއުޅުމާ ގުޅިފައިވާ މުހިއްމު އަސާސީ ޚިދުމަތްތަކަކަށްވާއިރު، ރައްޔިތުންނާއި ވިހާވެސް ގާތުން، ލުއިފަސޭހަގޮތެއްގައި އެ ޚިދުމަތްތައް ލިބިދިނުމަކީ އެކުންފުނީގެ އަމާޒެއްކަމަށެވެ. އަދި އެކުންފުނިން ކުރިއަށް ރާވާފައިވާ ކަންކަމުގެ ތެރޭގައި ހިމަނުއްވައިގެން އަތޮޅުތަކުގައި އެކުންފުނީގެ ސަރވިސް ސެންޓަރުތަކާއި، ބޮޓްލިންގ ޕްލާންޓް ފަދަ ތަންތަން އިތުރުކުރުމަށް ޚާއްޞަ އިސްކަމެއްދީފައިވާކަން ފަޒުލް ފާހަގަކުރެއްވިއެވެ.
ފަޒުލް ވިދާޅުވީ، އެމް.ޑަބްލިޔު.އެސް.ސީގެ ޑިވިޝަންތައް މާލޭގެ އިތުރުން، ރާއްޖޭގެ އެހެނިހެން ސަރަޙައްދުތަކުގައި ޤާއިމުކުރުމުން، މާލެއެކޭ އެއް އަގެއްގައި އަތޮޅުތަކުގެ ރައްޔިތުންނަށްވެސް ޚިދުމަތުގެ ފަސޭހަކަން ލިބިގެންދާނެކަމަށެވެ. އަދި ކުންފުނީގެ ލޮޖިސްޓިކް ޚަރަދުތައްވެސް އެތައް ގުނައެއް ކުޑަކުރެވޭނެކަމަށް ފަޒުލް ވިދާޅުވިއެވެ.
އެމް.ޑަބްލިޔު.އެސް.ސީގެ ހިންގުން ހަރުދަނާކުރުމުގެ ގޮތުން އެކުންފުންޏަށް ބޭނުންވާ އިކުއިޕްމަންޓާއި، މެޝިނަރީ ހޯދުމުގެ މަސައްކަތް މިހާރުވެސް އަންނަނީ ކުރަމުންނެވެ. އަދި ޚިދުމަތް ދިނުމަށް ބޭނުންވާ ފަންނީ މީހުން ތަމްރީންކުރުމުގެ މަސައްކަތްވެސް އެމް.ޑަބްލިޔު.އެސް.ސީއިން އަންނަނީ ކުރަމުންނެވެ.