މާލޭ ލޮނުޒިޔާރާތްކޮޅުގައި ތަރައްޤީކުރާ، "ބްރިޖް ވިއުވިންގ ޕްލެޓްފޯމް"ގެ މަސައްކަތް އަންނަ ފެބްރުއަރީމަހުގެ ތެރޭގައި ނިންމަވައި، އެތަން ޢާއްމުންނަށް ހުޅުވާލާނެކަމަށް ސްޓްރާޑަރ ޕްރައިވެޓް ލިމިޓެޑުން ބުނެފިއެވެ.
އެންމެ ޒަމާނީ ފެންވަރުގެ ރެސްޓޯރެންޓަކާއެކު ތަރައްޤީކުރާ މި ޕްލެޓްފޯމް ވެގެންދާނީ، މިހާތަނަށް މާލޭގައި ހެދިގެންދާނެ އެންމެ ތަފާތު އެއް ސަރަޙައްދުގެ ގޮތުގައި އެކުންފުނިން ސިފަކުރެއެވެ. ޗައިނާ- މޯލްޑިވްސް ފްރެންޑްޝިޕް ބްރިޖްގެ މަސައްކަތް ކުރާ ސަރަޙައްދުގައި އެ މަންޒަރު ބަލާލުމަށް ކޮންމެ ދުވަހަކުވެސް ގިނަ ޢަދަދެއްގެ ޢާއްމުން ލޮނުޒިޔާރާތްކޮޅަށް ޒިޔާރާތްކުރެއެވެ. އެފަދަ ފަރާތްތަކަށް ޢާއިލާއާއެކު ހިތްފަސޭހަ މާޙައުލެއްގައި ވަގުތު ހޭދަކޮށްލުމުގެ ފުރުޞަތު ތަނަވަސް ކޮށްދެއްވުމަށްޓަކައި، ސަރުކާރުން ވަނީ އެ ސަރަޙައްދުގައި "ބްރިޖް ވިއުވިންގ ޕްލެޓްފޯމް" އެޅުމުގެ މަސައްކަތް ސްޓްރާޑަރ ޕްރައިވެޓް ލިމިޑެޓާ ޙަވާލު ކުރައްވާފައެވެ. މިފަދަ ޕްލެޓްފޯމެއް ހެއްދެވުމުގެ އެންމެ ބޮޑު ބޭނުމަކީ، ބްރިޖްގެ މަސައްކަތް ހިނގަމުންދާ މަންޒަރު ބަލާލުމަށް މި މަސައްކަތް ފެށީއްސުރެ ރެޔާއި ދުވާލު އެތައް ބަޔަކު އެތަނަށް ޒިޔާރަތްކޮށް، ޝައުޤުވެރިކަމާއެކު އެ މަންޒަރު ބަލަމުންދާތީ އެފަދަ ފަރާތްތަކަށް ރައްކާތެރި އަދި ފަސޭއިން މަންޒަރު ފެންނާނެ އިންތިޒާމެއް ހަމަޖައްސަވައިދެއްވުމެވެ.
"ނިއުޕޯޓް" އަދި "ކޮކޯބެރީ"ގެ ނަމުގައި މިހާރުވެސް މާލޭގައި އައުޓްލެޓްތައް ހިންގަމުން އަންނަ ސްޓްރާޑަރ ކުންފުނިން ތަރައްޤީކުރާ މި ޕްލެޓްފޯމާއެކު، މުޅި އެ ސަރަޙައްދަށް ހިތްގައިމު ބޮޑު ބަދަލެއް ފެނިގެންދާނެ ކަމަށް އެކުންފުނިން ބުނެއެވެ. ގާތްގަނޑަކަށް 8.2 މިލިއަން ރުފިޔާ ޚަރަދުކޮށްގެން ހަދާ މި ޕްލެޓްފޯމަކީ، 350 މީހުންގެ ޖާގައިގެ ޕްލެޓްފޯމެކެވެ. މި ޕްލެޓްފޯމާއެކު، ސްޓްރާޑަރއިން އެ ސަރަޙައްދުގައި ޤާއިމުކުރާ އިތުރު ވަޞީލަތްތަކުގެ ތެރޭގައި، 350 މީހުންގެ ޖާގައިގެ ރެސްޓޯރެންޓެއްގެ އިތުރުން، ކުޑަކުދިންނަށް ޚާއްޞަކޮށްގެން، އިންޑޯ ޕްލޭ އޭރިއާއެއްވެސް ހިމެނެއެވެ.
ޕްލެޓްފޯމްގެ މަސައްކަތް ކުރިއަށްގޮސްފައިވާ ހިސާބާ ގުޅޭގޮތުން ޕީ.އެސް.އެމް ނިއުސްއާ ވާހަކަދައްކަވަމުން ނިއުޕޯޓް ރެސްޓޯރެންޓްގެ މެނޭޖަރ އަދި މި ޕްރޮޖެކްޓުގައިވެސް އިސްކޮށް ޙަރަކާތްތެރި ވެވަޑައިގަންނަވާ ބޭފުޅެއްކަމުގައިވާ ޢާޒިމް ޢަލީ ވިދާޅުވީ، މިހާރު އެންމެ ބާރުމިނުގައި ކުރަމުންދާ މަސައްކަތަކީ، ޕްލެޓްފޯމްގެ ފުރާޅު ހަރުކުރުމުގެ މަސައްކަތް ކަމަށެވެ. އެ މަސައްކަތް ނިމުނުހާ އަވަހަކަށް، ޕްލެޓްފޯމްގެ ދެން ހުރި ބައިތައް ހަރުކުރުމުގެ މަސައްކަތް ކުރަމުންދާނެ ކަމަށެވެ. މިއީ ވަކި ވަކި ބައިތައް ރާވައިގެން ހަދާ ޕްލެޓްފޯމެއްކަމުން، މި މަސައްކަތަށް މާގިނަ ދުވަސްތަކެއް ހޭދަވާނެކަމަށް ނުބެލޭވޭކަމަށްވެސް އޭނާ ވިދާޅުވިއެވެ. އަދި އެ ސަރަޙައްދުގައި ހަދާ ރެސްޓޯރެންޓާއި، އިންޑޯ ޕްލޭއޭރިއާގެ މަސައްކަތުގެ ބޮޑުބައެއް މިހާރު ނިމިފައިވާކަން ޢާޒިމް ފާހަގަކުރެއްވިއެވެ. ޢާޒިމް ވިދާޅުވީ، މިހާރު މަސައްކަތް ކުރިއަށްދާ ސްޕީޑަށް ބަލާނަމަ، އަންނަ ޖެނުއަރީ މަހުގެ ނިޔަލަށް ޕްލެޓްފޯމްގެ މަސައްކަތް އެއްކޮށް ނިންމާލެވޭނެ ކަމަށެވެ. އަދި ފެބްރުއަރީ މަހުގެ ތެރޭގައި ރެސްޓޯރެންޓްގެ ޚިދުމަތާއެކު، މުޅި އެ ސަރަޙައްދު ޢާއްމުންނަށް ހުޅުވާލެވޭނެ ކަމަށެވެ.
ޕްލެޓްފޯމްގެ މަސައްކަތް މުޅިން ނިމޭއިރު، ބްރިޖްގެ މަސައްކަތް ފަސޭހަކަމާއެކު ދުރުގައި ތިބެގެން ބަލާލެވޭނެފަދަ އާލާތްތައް ނުވަތަ ބައިނެކިޔުލާ ބެހެއްޓިފައި ހުންނާނެއެވެ. އަދި ކޮންމެ ފަރާތަކަށްވެސް ހިލޭ މި ޕްލެޓްފޯމް ބޭނުންކުރެވިދާނެ ކަމަށް ސްޓްރާޑަރއިން ބުނެއެވެ. ހަމައެހެންމެ ސަރަޙައްދަށް ޒިޔާރާތްކުރާ ޢާއްމުންނަށް ވެހިކަލް ޕާކްކުރެވޭނެ އިންތިޒާމް ހަމަޖެއްސުމުގެ ގޮތުން ޕާކިންގ ޒޯނެއްވެސް ތަރައްޤީ ކުރެވިގެންދާނެ ކަމަށް އެކުންފުނިން ބުނެއެވެ.