ދިރާގު ފައިބަރ ބްރޯޑްބޭންޑް ނެޓްވޯކް ލ. އަތޮޅުގައި ޤާއިމްކޮށް ޚިދުމަތް ދޭން ފަށައިފިއެވެ.
ދިރާގުން ފައިބަރ ބްރޯޑްބޭންޑުގެ ޚިދުމަތް އިތުރަށް ފުޅާކުރުމުގެ ގޮތުން ހިންގާ މަޝްރޫޢުގެ ދަށުން، ލ. އަތޮޅުގައި ފައިބަރ ބްރޯޑްބޭންޑްގެ ޚިދުމަތް ދޭން ފެށީ އިއްޔެއެވެ. އެއަތޮޅުން މިޚިދުމަތް އެންމެ ފުރަތަމަ ޤާއިމުކޮށްފައިވަނީ ގަމުގައެވެ.
ފައިބަރ ބްރޯޑްބޭންޑަކީ ބްރޯޑްބޭންޑް ޚިދުމަތް ދިނުމަށް ބޭނުންކުރެވޭ އެންމެ ފަހުގެ ޓެކްނޮލޮޖީއެވެ.ދިރާގުން އަންނަނީ ލ.ފޮނަދުއަށް މި ޚިދުމަތް ފުޅާކޮށް، އަތޮޅުގެ އިތުރު ރަށްތަކަށް މި ޚިދުމަތް ދިނުމަށް މަސައްކަތް ކުރަމުންނެވެ. ދިރާގުން ބުނީ މިހާރުވެސް ލ.ގަމުގެ ގިނަ ފަރާތްތަކުން މި ޚިދުމަތަށް ޝައުޤުވެރިކަން ފާޅުކޮށްފައިވާ ކަމަށާއި ބޮޑު ތަރުޙީބެއް ލިބެމުން އަންނަކަމަށެވެ. ފައިބަރ ޚިދުމަތަށް އެދޭ ހުރިހާ ފަރާތްތަކަށް ފައިބަރ ބޮރޯޑްބޭންޑް ކަނެކްޝަނެއް ޖެނުއަރީމަހުގެ ނިޔަލަށް ހިލޭ ދޭނެކަމަށް އެ ކުންފުނިން ހާމަކުރެއެވެ.
ދިރާގުގެ ބްރޯޑްބޭންޑުގެ ޚިދުމަތް މުޅިރާއްޖެއަށް ވަނީ ދީފައެވެ. ދިރާގުން ފައިބަރ ނެޓްވޯކް ޤާއިމްކޮށް، ފައިބަރ ބްރޯޑްބޭންޑްގެ ޚިދުމަތް މިހާރު ފޯރުކޮށްދެމުންދަނީ ލ.ގަން ފިޔަވައި، މާލެ، ހުޅުމާލެ، ވިލިމާލެ އަދި ކ.މާފުށީގައެވެ. މުޅިރާއްޖެއަށް މި ޚިދުމަތް ދިނުމަށް އެކުންފުނިން އަންނަނީ މަސައްކަތްކުރަމުންނެވެ.