އިންޑިޔާގެ ޖުމްހޫރީ ދުވަހުގެ މުނާސަބަތުގައި ބާއްވާ "ރިޕަބްލިކް ޑޭ ކޭމްޕް"ގައި ރާއްޖެއިން ބައިވެރިވާ ކެޑޭޓުންނާއި ތަޢުލީމާ ބެހޭ ވަޒީރު ޑރ. އާއިޝަތު ޝިހާމް ބައްދަލުކުރައްވައިފިއެވެ.
މި ބައްދަލުކުރެއްވުމުގައި މިނިސްޓަރ ވިދާޅުވީ، ސްކޫލް ދައުރުގައި އިތުރު ޙަރަކާތްތަކުގައި ބައިވެރިވާ ދަރިވަރުން ފާހަގަކުރެވިފައިވަނީ، ސްކޫލް ދައުރު ނިމޭއިރު ރިވެތި އާދަތައް އަށަގަނެ، ދިރިއުޅުމަށް ތައްޔާރުވެފައި ތިބޭ ދަރިވަރުންތަކެއްގެ ގޮތުގައި ކަމަށެވެ. ކޭމްޕްގައި ބައިވެރިވާ ދިވެހި ކެޑޭޓުންނަކީ އެހެން ޤައުމުތަކުގެ ކެޑޭޓުންނަށް ނަމޫނާ ދަރިވަރުން ތަކަކަށްވެ، ރިވެތި އަޚުލާޤު ދަމަހައްޓާ ބަޔަކަށްވުމަށް މިނިސްޓަރ އިލްތިމާސްކުރެއްވިއެވެ.
އިންޑިޔާގެ ކެޑޭޓް ކޯގެ ފަރާތުން ބާއްވަމުން އަންނަ 'ރިޕަބްލިކް ޑޭ ކޭމްޕް' ގައި މިއަހަރު ރާއްޖެއިން 4 ދަރިވަރަކާއި ޤައުމީ ކެޑޭޓް ކޯގެ 2 އޮފިސަރުން ބައިވެރިވެއެވެ. މިކޭމްޕްގައި ބައިވެރިން އިންޑިޔާގެ ރައީސާއި ބޮޑުވަޒީރުގެ އިތުރުން ޑިފެންސް މިނިސްޓަރާއި ބައްދަލުކުރުމަށް ހަމަޖެހިފައިވެއެވެ. އަދި ނޭޝަނަލް ކެޑޭޓް ކޯގެ ޑިރެކްޓަރ ޖެނެރަލާއިވެސް ކެޑޭޓުން ބައްދަލުކުރާނެއެވެ. އަދި އިންޑިޔާގެ މިލިޓަރީ އެކަޑަމީއަށާއި، އެޤައުމުގެ އާސާރީ ތަންތަނަށް ކޭމްޕްގެ ބައިވެރިން ޒިޔާރަތްކުރުމަށް ހަމަޖެހިފައިވެއެވެ.
މިމަހުގެ 15 ން 30 ށް މިކޭމްޕް ކުރިޔަށްދާނީ އިންޑިޔާގެ ނިއުދިއްލީގައެވެ. ރާއްޖޭގެ ޤައުމީ ކެޑޭޓް ކޯގެ ފަރާތުން ފާއިތުވި 9 އަހަރު މި ކޭމްޕްގައި ބައިވެރިވެފައިވެއެވެ. އަދި މިކޭމްޕަކީ ފާއިތުވި 5 މަސްދުވަހުގެ ތެރޭގައި ޤައުމީ ކެޑޭޓް ކޯގެ ފަރާތުން ބައިވެރިވާ ބައިނަލްއަޤްވާމީ 3 ވަނަ ކޭމްޕެވެ.