ޅ.އަތޮޅުގެ ޞިއްޙީ މަރުކަޒުތަކުން ދެއްވާ ޚިދުމަތްތަކާއި، ދިމާވެފައިވާ ދަތިތަށް އޮޅުންފިލުއްވައި އެތަންތަނުގެ ޙާލަތު ހެލްތް މިނިސްޓްރީން ބައްލަވައިފިއެވެ.
ހެލްތް މިނިސްޓްރީގެ ޓީމެއް މިހާރު ގެންދަނީ ޅ.އަތޮޅުގެ ޞިއްޙީ ޚިދުމަތްދޭ ތަންތަނަށް ޒިޔާރަތްކުރައްވަމުންނެވެ.
މިޓީމުގެ އިސް ބޭފުޅެއްގެ ގޮތުގައި އެއަތޮޅަށް ވަޑައިގެން އުޅުއްވަނީ ހެލްތް މިނިސްޓްރީގެ ސީނިއަރ ޕޮލިސީ އެގްޒެގެޓިވް ޢަބްދުލްޙަމީދު އަބްދުއް ސަމަދެވެ.
މި ޓީމުގެ ބޭފުޅުން ޅ.އަތޮޅު ހޮސްޕިޓަލްގެ މެނޭޖްމަންޓާއެކު ބޭއްވި ބައްދަލުވުމުގައި، ނައިފަރު ހޮސްޕިޓަލަށް އަލަށް އިތުރުކުރެއްވި ފަސްބުރީގެ ޢިމާރާތަށް ބޭނުންވާ ބައެއް ވަޞީލަތްތައް ޤާއިމްކުރެއްވުމާ ގުޅޭގޮތުން މަޝްވަރާކުރައްވާފައިވާ ކަމަށް ހެލްތް މިނިސްޓްރީން ވިދާޅުވެއެވެ.
ޅ.އަތޮޅު ހޮސްޕިޓަލަށް ދިމާވެފައިވާ ޖާގައިގެ ދަތިކަން ޙައްލުކުރެއްވުމަށް ސަރުކާރުން ވަނީ ފަސް ބުރީގެ އިމާރާތެއް އަޅުއްވާފައެވެ. އަދި އެތަނުގެ މަސައްކަތް ނިންމަވައި މިހާރު ވަނީ ސަރުކާރާ ޙަވާލުކުރައްވާފައެވެ. އެ ހޮސްޕިޓަލަށް އަލަށް އިތުރުކުރެއްވި ބައިގައި 48 އެނދު ހުރެއެވެ.