އަރިއަތޮޅު އުތުރުބުރީ އޮމަދޫގައި ޢިމާރާތްކުރައްވާ މިސްކިތުގެ މަސައްކަތް ނިމި މި މަހުގެ ތެރޭގައި ސަރުކާރާއި ޙަވާލު ކުރެއްވޭނެ ކަމަށް އެ މަސައްކަތުގެ ކޮންޓްރެކްޓަރާއި ޙަވާލާދީ އޮމަދޫ ކައުންސިލުން ވިދާޅުވެއްޖެއެވެ.
ސަޢުދީ ރަސްގެފާން، ސަލްމާން ބިން ޢަބްދުލްޢަޒީޒްގެ ހިލޭއެހީގައި އޮމަދޫގައި ޢިމާރާތްކުރައްވާ މި މިސްކިތަކީ، 304 މީހުންނަށް އެއްފަހަރާ ނަމާދުކުރެވޭ މިސްކިތެކެވެ. ސަރުކާރުން ސްވިފްޓް އިންޖިނިއަރިންގ ޕްރައިވެޓް ލިމިޓެޑާއި ޙަވާލު ކުރައްވައިގެން ކުރިއަށްގެންދަވާ މި މިސްކިތުގެ މަސައްކަތުގައި މިހާރު ކުރިއަށްދަނީ ފިނިޝިންގެ މަސައްކަތެވެ.
އާބާދީގެ އެއްހާހަށްވުރެ ގިނަ މީހުން ދިރިއުޅެމުންދާ އޮމަދޫގައި މިހާރު ހުރީ ރަނގަޅު ފެންވަރުގެ އެންމެ މިސްކިތެކެވެ. އޮމަދޫ ކައުންސިލްގެ ނައިބުރައީސް ޙަސަން މުނީޒް ވިދާޅުވީ މިހާރު ހުރި އެ މިސްކިތުގައި ޖާގައިގެ ދަތިކަން ކުރިމަތިވުމުގެ ސަބަބުން، ވަގުތީ މިސްކިތެއް ހަދާފައިވާ ކަމަށެވެ. އަދި އައު މިސްކިތް ހުޅުވުމުން މިހާރު ދިމާވެފައިވާ ޖާގައިގެ ދަތިކަމަށް ޙަލެއް ލިބިގެންދާނެ ކަމަށް މުނީޒް ވިދާޅުވިއެވެ.
އޮމަދޫގައި ޢީމާރާތް ކުރައްވާ މިސްކިތާއެކު، ސަޢުދީ ރަސްގެފާނު ސަލްމާން ބިން ޢަބްދުލްޢަޒީޒް ވަނީ ރާއްޖޭގައި 10 މިސްކިތެއް ބިނާކުރެއްވުމަށް ހިލޭއެހީ ވެދެއްވާފައެވެ.