މީހުން ދިރިއުޅޭ ރަށްރަށުގައި ބޯފެނަށްޖެހޭ މައްސަލަ ޙައްލުކުރެއްވުމަށް ސަރުކާރުން ކުރައްވަމުން ގެންދަވާ މަސައްކަތުގެ ދަށުން 76 ރަށެއްގައި ސާފު ބޯފެން ރައްކާކުރެވޭ ނިޒާމުތައް ޤާއިމްކުރައްވަމުން ގެންދަވާކަމަށް އެންވަޔަރަމަންޓް މިނިސްޓަރ ތާރިޤް އިބްރާހީމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ފެން ފަހި ކެމްޕޭން އިފްތިތާހުކުރެއްވުމަށް އެންވަޔަރަމަންޓް މިނިސްޓްރީގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ފެނަކީ ދިރިއުޅުމަށާއި ޢާއްމު ސިއްޙަތަށް ވަރަށް މުހިންމު އެއްޗަކަށް ވުމާއެކު، ރާއްޖޭގެ ރައްޔިތުންނަށް ސާފު ބޯފެން ލިބިދެވޭނެ ގޮތްތައް ތަނަވަސްކޮށްދެއްވުމަކީ ސަރުކާރުން ބޮޑު އިސްކަމެއް ދެއްވައިގެން ކުރައްވަމުން ގެންދަވާ މަސައްކަތެކެވެ. ފެނުގެ ބޭނުން ހެޔޮގޮތުގައި ހިފުމަށާއި، ރާއްޖޭގެ ބިމުގެ ފެންފަށަލަ ރައްކާތެރިކޮށް، ވާރޭފެން ރައްކާކުރެވޭ މިންވަރު އިތުރުކޮށް ފެނުން ލިބެންހުރި ފައިދާތައް ހެޔޮގޮތުގައި ބޭނުންކުރުމަށް ކުރެވެންހުރި މަސައްކަތްތަކެއް ކުރުމަކީ ނުހަނު ބޭނުންތެރިކަމެކެވެ. ރާއްޖޭގެ ރަށްރަށުގައި ޒަމާނުއްސުރެ ސާފު ފެނުގެ ގޮތުގައި ބޭނުންކުރަމުން އައިސްފައިވަނީ ވާރޭފެނުގެ އިތުރުން ބިމުގެ އަޑިން ނެގޭ ފެނެވެ.
ރާއްޖޭގެ ރަށްރަށުގައި ފެނުގެ ނިޒާމު ޤާއިމްކުރެވިފައިވާ ގޮތަށް ބަލާއިރު 2013 ވަނަ އަހަރުގެ ނިޔަލަށް ފެނުގެ ނިޒާމް ޤާއިމުކޮށްފައިވަނީ 6 ރަށެއްގައެވެ. މިއީ އާބާދީގެ 25 އިންސައްތައެވެ. އެހެންނަމަވެސް 2016 ގެ ނިޔަލަށް ފެނުގެ ނިޒާމު ޤާއިމްކުރެވިފައިވާ ރަށްތަކުގެ އަދަދުވަނީ 21 އަށް އިތުރުވެގެން ގޮސްފައެވެ. އެއީ އާބާދީގެ 39 އިންސައްތައެވެ. ކުރިއަށް އޮތް 2018 ގެ ނިޔަލަށް ރާއްޖޭގެ މުޅި އާބާދީގެ 75 އިންސައްތައަށް ޒަމާނީ ފެނުގެ ނިޒާމުގެ ޚިދުމަތް ޔަޤީންކޮށްދިނުމަކީ ރައީސް ޔާމީންގެ ސަރުކާރުން ކަނޑައަޅާފައިވާ އަމާޒެކެވެ.
އެންވަޔަރަމަންޓް މިނިސްޓަރ ތާރިޤް އިބްރާހީމް ވިދާޅުވީ، މީހުން ދިރިއުޅޭ ރަށްރަށުގައި ބޯފެނަށްޖެހޭ މައްސަލަ ޙައްލުކުރުމަށްޓަކައި 27 ރަށެއްގައި ވޭރޭފެން ނަގައި ރައްކާކުރާ ނިޒާމް ޤާއިމްކުރައްވާފައިވާކަމަށެވެ.
"ރާއްޖޭގައި މީހުން ދިރިއުޅޭ ރަށްރަށުގައި ބޯފެނަށްޖެހޭ މައްސަލަ ޙައްލުކުރުމަށްޓަކައި 2015 ވަނަ އަހަރު ފެށުނު ޚާއްސަ މަޝްރޫޢުގެ ދަށުން 27 ރަށެއްގައި ވާރޭފެން ނަގައި ރައްކާކުރާ ނިޒާމް ޤާއިމްކުރެވިފައިވާއިރު 76 ރަށެއްގައި ސާފު ފެން ރައްކާކުރެވޭ ނިޒާމުތައް ޤާއިމްކޮށްދިނުމުގެ މަސައްކަތް ދަނީ ކުރަމުން" މިނިސްޓަރ ތާރިޤް ވިދާޅުވިއެވެ.
ރައްޔިތުންނަށް ބޭނުންވާ އަސާސީ ޚިދުމަތްތައް ދެމެހެއްޓެނެވި ގޮތެއްގައި ދެއްވުމަށް އެރަށެއްގެ ފެނާ ނަރުދަމާގެ ޚިދުމަތް އެއް މުއައްސާސާއެއް މެދުވެރިކޮށް ދެއްވުމަކީ ސަރުކާރުގެ ސިޔާސަތެކެވެ. މިނިސްޓަރ ތާރިޤް ވިދާޅުވީ، ފާއިތުވެދިޔަ 3 އަހަރު ދުވަހުގެ ތެރޭގައި 18 ރަށެއްގައި ނަރުދަމާ ނިޒާމް ޤާއިމްކުރައްވާފައިވާ ކަމަށެވެ.