ރާއްޖޭގައި ފެތުރެމުންދިޔަ އިންފުލުއެންޒާއާއި އަރިދަފުސް ރޯގާއާ ގުޅިގެން ހެލްތް މިނިސްޓްރީން ކަނޑައެޅުއްވި ލެވެލް 3 ނުވަތަ ޞިއްޙީ ދާއިރާގެ ތެރޭގައި އިޖާބަދިނުމުގެ މިންގަނޑު އުވާލައްވައިފިއެވެ.
މާލެއާއި އަތޮޅުތެރޭގެ ބައެއް ރަށްރަށުގައި ފެތުރެމުންދިޔަ އަރިދަފުސް ރޯގާއާއި، އިންފުލުއެންޒާގެ ޙާލަތު ރަނގަޅުވެފައިވާ ކަމަށް ހެލްތް ޕްރޮޓެކްޝަން އެޖެންސީ، އެޗްޕީއޭއިން ވިދާޅުވިއެވެ. އަދި މާލެއާއި އަތޮޅުތަކުގައި ހަލުވިކަމާއެކު ރޯގާ ފެތުރުން މަދުކުރުމަށް ޞިއްޙީ ދާއިރާގެ ތެރޭގައި އިޖާބަދިނުމަށް ކަނޑައަޅާފައިވާ މިންގަނޑު ނުވަތަ އިޖާބަދިނުމުގެ 3 ވަނަ ލެވެލްގައި މަސައްކަތް ކުރުމުގެ ޙާލަތެއް މިހާރު ނެތް ކަމަށް އެޗްޕީއޭއިން ހާމަކުރައްވައެވެ. އެޗްޕީއޭއިން ވިދާޅުވީ މިހާރު މަސައްކަތް ކުރައްވަނީ ޢާންމު ޙާލަތުގައި ރޯގާ އުޅޭއިރު ކަންތައްތައް ކުރައްވާ އުޞޫލުގެ މަތިން ކަމަށެވެ. އަދި ބަލިތައް އުޅޭގޮތް ދެނެގަތުމަށް ޤާއިމްކުރެވިފައިވާ ޑިޒީޒް ސަރވެއިލަންސް ނިޒާމުގެ ތެރެއިން އެއްވެސް ރަށެއްގައި އާދަޔާ ޚިލާފަށް ބައްޔެއް އުޅޭނަމަ ނުވަތަ ރޯގާއެއް އިތުރުވާނަމަ ކަނޑައަޅުއްވާފައިވާ މިންގަނޑުގެ ތެރެއިން މަސައްކަތް ކުރަމުން ގެންދަވާނެ ކަމަށް އެޗްޕީއޭއިން ވިދާޅުވެއެވެ.
އެޗްޕީއޭއިން ވިދާޅުވީ މާލެއާއި އަތޮޅުތަކުގެ ޞިއްޙީ ޚިދުމަތްދޭ ތަންތަނުންނާއި އެހެނިހެން ފަރާތްތަކުން މި ރޯގާގެ ތެރޭގައި ވަރަށް ބޮޑަށް އެހީތެރިވެ އެއްބާރުލުން ދެއްވާފައިވާ ކަމަށެވެ. އަދި އެޗްޕީއޭއިން ދެއްވާފައިވާ ލަފާގެ މަތިން ސްކޫލްތައް ބަންދުކޮށްދެއްވައި އެޅުއްވި މުހިންމު ފިޔަވަޅު އެ އެޖެންސީ ފާހަގަކުރައްވައެވެ. އަދި ރޯގާ ފެތުރުމުގެ ޙާލަތު ރަނގަޅުވެފައިވާތީ ސްކޫލްތަކަށް ދަރިވަރުން ފޮނުއްވުމުގައި މައްސަލައެއް ނެތްކަމަށް ހެލްތް ޕްރޮޓެކްޝަން އެޖެންސީން ވިދާޅުވެއެވެ.
އަރިދަފުސް ރޯގާ ވައިރަލް ހުން އަދި އިންފުލުއެންޒާ ފަދަ ބަލިތަކަކީ އަބަދުވެސް އުޅެމުންދާ މޫސުމީ ރޯގާތައްކަމުން، މިފަދަ ބައްޔެއް ޖެހުމުން އެހެން މީހުންނަށް ބަލި ފެތުރުން މަދުކުރެވޭނެ ގޮތަށް ރައްކާތެރިކަމުގެ ފިޔަވަޅު އެޅުމާއި އާންމު ސާފަތާހިރުކަން ދެމެހެއްޓުމަށް ހެލްތް ޕްރޮޓެކްޝަން އެޖެންސީން ވަނީ އިލްތިމާސް ކުރައްވާފައެވެ.