ޝަރީޢާ ހުއްދަކުރާ އިންވެސްޓްމަންޓްތަކުން ރަނގަޅު ޢާމްދަނީއެއް ހޯދައި ކުރިއަށް އޮތް ތިންއަހަރު ދުވަހުގެ ތެރޭގައި ދިވެހި ރައްޔިތުން ޙައްޖަށް ދިއުމަށް ކުރަންޖެހޭ ހޭދަ ކުޑަކުރުމަކީ، އަމާޒެއްކަމަށް ޙައްޖުކޯޕަރޭޝަނުން ބުނެފިއެވެ.
އެކޯޕަރޭޝަނުން މިކަން ހާމަކުރީ "ކާމިޔާބު ތިން އަހަރު" މިނަމުގައި ހޮޓެލްޖެންގައި ބޭއްވި ރަސްމިއްޔާތުގައެވެ.
2013 ވަނަ އަހަރު ސަރުކާރުން އުފެއްދި މޯލްޑިވްސް ޙައްޖުކޯޕަރޭޝަނަކީ، ދިވެހި ރައްޔިތުންނަށް ލުއި ފަސޭހަކަމާއެކު ޙައްޖުގެ މަތިވެރި އަޅުކަން އަދާކުރެވޭނެ އިންތިޒާމު ހަމަޖައްސައި، އެ އަޅުކަން އަދާކުރުމަށް ގަސްދުކުރާ ދިވެހިންގެ ފައިސާ އަމާނާތްތެރިކަމާއެކު ބަލަހައްޓާނެ ނިޒާމެއް ޤާއިމުކުރެއްވުމަށް ސަރުކާރުން އުފައްދަވާފައިވާ ސަރުކާރުގެ ސަތޭކަ އިންސައްތަ ހިއްސާއޮންނަ ކުންފުންޏެކެވެ. ވޭތުވެދިޔަ ދެތިން އަހަރުދުވަހުގެ ތެރޭގައި ދިވެހިރައްޔިތުންގެ ތެރެއިން 2900 އަށްވުރެ ގިނަމީހުން ޙައްޖުގެ އަޅުކަންއަދާކޮށްފައިވަނީ ޙައްޖު ކޯޕަރޭޝަނުގެ ބެލުމުގެ ދަށުންނެވެ.
ޙައްޖުކޯޕަރޭޝަނުގެ ތިން އަހަރުގެ ކާމިޔާބީ ފާހަގަކުރުމަށް، ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފު ޢުމަރު ވިދާޅުވީ، ޙައްޖުގެ އަޅުކަން ފުރިހަމަގޮތުގައި ފަސޭހަކަމާއެކު އަދާކުރެވޭނެ އިންތިޒާމް ހަމަޖެހިފައި ވުމަކީ، ކޮންމެ ދިވެހި ރައްޔިތަކަށްވެސް ލިބޭނެ ބޮޑު ހިތްހަމަޖެހުމެއްކަމަށެވެ. މިކަމުގައި މޯލްޑިވްސް ޙައްޖު ކޯޕަރޭޝަނުން ލާމަސީލު ނަމޫނާއެއް ދައްކާފައިވާކަން މިނިސްޓަރ ވަނީ ފާހަގަކުރައްވާފައެވެ.
img:http://s4.psmnews.mv/images/660x400/14912163333368.jpg|މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފު ޢުމަރު- ފޮޓޯ: ޕީއެސްއެމް
" ޙައްޖާއި އުމްރާއަށް ވަޑައިގަންނަވާ އަޚުންނާއި އުޚުތުންނަށް ވަރަށް ރަނގަޅު ޚިދުމަތްތަކެއް ފޯރުކޮށްދެއްވުމަށް ވަރަށް ގިނަގުނަ މަސައްކަތްތަކެއް ކުރައްވާ. އެކޯޕަރޭޝަނުގައި މިވަގުތު ތިއްބެވި މެނޭޖްމަންޓް ދާއިރާގެ ބޭފުޅުންނަކީ، މިޒަމާނުގެ ހިންގުންތެރިކަމާއި، ޓެކްނޮލޮޖީއަށް ފަހި ބޭފުޅުންތަކަކަށްވުމާއެކު، މިއަދު އަޅުގަނޑުމެންނަށް ފެނިގެންދާ އަނެއް ޙަޤީގަތަކީ، ރަށްރަށުގައި ތިބެގެންވެސް ދުރާލާ ފައިސާދެއްކޭނެ އިންތިޒާމުތައްވެސް މިހާރު ހަމަޖެހިފައިވުން." މިނިސްޓަރ އާދަމް ޝަރީފް އުމަރު ވިދާޅުވިއެވެ.
މިރަސްމިއްޔާތުގައި ވާހަކަފުޅުދައްކަވަމުން ޙައްޖު ކޯޕަރޭޝަނުގެ މެނޭޖިންގ ޑިރެކްޓަރ ޔާމީން އިދުރީސް ވިދާޅުވީ، ވޭތުވެދިޔަ މުއްދަތުގެ ތެރޭގައި ކުރިއެރުންތަކާއި، ރައްޔިތުންގެ ލޯތްބާއި، އިތުބާރު ލިބިފައިވާކަމަށާއި، މަސައްކަތްކުރައްވަނީ ޚިދުމަތް އިތުރަށް ކުރިއެރުވުމަށްކަމަށެވެ. އެގޮތުން، ދުރާލާ ރާވައިގެން ފަހަށް ފައިސާ ރައްކާކޮށްގެން ޙައްޖުގެ އަޅުކަން އަދާކުރުމުގެ ފުރުޞަތު ދިވެހި ރައްޔިތުންނަށް ތަނަވަސްކޮށްދީ، އެ ފައިސާއިން ޙަލާލު އިންވެސްޓުމަންޓުތަކެއްކޮށް، އެ އިންވެސްޓުމަންޓުތަކުން ލިބޭ ފައިދާ އެ ފައިސާ ދިން ފަރާތްތަކުގެ މެދުގައި ބަހާލައިގެން، ޙައްޖަށް ދިއުމުމަށް ބޭނުންވާ ފައިސާ ކުރުމުއްދަތެއްގައި ލިބޭނެ ފަދަ އިންތިޒާމެއް ހަމަޖައްސައި، ކޮންމެ ދިވެހި ރައްޔިތަކަށްވެސް އަވަހަށް ޙައްޖަށް ދެވޭނެ ގޮތް ހަދައިދެއްވުމަށް މިހާރުވެސް މަސައްކަތްކުރައްވަމުންގެންދަވާކަމަށް އޭނާ ވިދާޅުވިއެވެ.
"އަޅުގަނޑުމެންގެ ޓާގެޓަކީ ކުރިއަށްއޮތް އަހަރުތަކުގެ ތެރޭގައި ދިވެހިރައްޔިތަކު ޙައްޖު ކޯޕަރޭޝަނަށް ސަތޭކަ ރުފިޔާ ލާކަމުގައިވަނީނަމަ، ޙައްޖު ކޯޕަރޭޝަނަށް އެސަތޭކަ ރުފިޔާގެ ތެރެއަށް މަދުވެގެން އިރާދަކުރެއްވިއްޔާ ޙައްޖުކޯޕަރޭޝަނުން އޭގެ ތެރެއަށް ދިހަ ރުފިޔާ ލެވޭވެރު ކުރިއަށްއޮތްތަނުގައިވުން. އަޅުގަނޑުމެން އަބަދުވެސް މިދައްކަމުންދަނީ، ޙައްޖު އަގުހެޔޮކުރާ ވާހަކަ. ކުރިއަށް އޮތް ތިން އަހަރު އަޅުގަނޑުމެން މަސައްކަތް މިކުރަނީ އެގޮތަށް ހައްޖުގެ އަގު ކުޑަކުރުމަށް." ޔާމީން ވިދާޅުވިއެވެ.
މިރަސްމިއްޔާތުގައިވަނީ ޙައްޖު ކޯޕަރޭޝަނަށް އެކި ގޮތްގޮތުން، އެހީތެރިވެދިން މުއައްސާތަކަށް ހަނދާނީފިލާ ދީފައިވެއެވެ. އަދި އެކި ގޮތްގޮތުން އެކޯޕަރޭޝަނަށް އެހީތެރިވެދިން މީހުންނަށްވެސް ހަނދާނީލިޔުންދީފައިވެއެވެ.
ޙައްޖު ކޯޕަރޭޝަނުން މިހާރުދޭ ޚިދުމަތްތަކުގެ ތެރޭގައި، ޙައްޖާއި، ޢުމްރާގެ ޚިދުމަތާއި، ޢަޤީގާ ކަތިލުމާއި، ހަލާލު އިންވެސްޓްމަންޓުގެ އިތުރުން، ޙައްޖު ކިޓުގެ ނަމުގައި ވަނީ ޚާއްސަ ޚިދުމަތެއްވެސް ތަޢާރަފްކޮށްފައެވެ.