އެކިފަހަރުތަކުގެ މަތީން ދައުލަތައް ދައްކަންޖެހޭ ފައިސާ ނުދައްކައިގެން މީރާއިން ވިލާ ކުންފުންޏާމެދު ފިޔަވަޅު އެޅުމަކީ ސަރުކާރު ނުވަތަ ރައީސް އަބްދުﷲ ޔާމީން އަބްދުލްޤައްޔޫމް، އެކަމުގެ ޒިންމާ ނަންގަވަންޖެހިވަޑައިގަންނަވާނެ ކަމެއް ނޫންކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު އިބްރާހީމް މުއާޒް ޢަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ތަރުޖަމާނު ވިދާޅުވީ، މިސަރުކާރަކީ އެންމެހާ ރައްޔިތުންނަށްވެސް ހަމަހަމަކަމާއި އިންސާވުވެރިކަމާއެކު، ޢަދުލުވެރި ވެރިކަމެއް ކޮށްދެއްވާ ސަރުކާރެއްކަމަށެވެ. ވަކި ފަރުދަކަށް ވުމުން ވަކިގޮތަކަށް އެމީހަކާމެދު ސަރުކާރުން ޢަމަލު ނުކުރައްވާނެކަމަށާ، ވިލާ ކުންފުނިން ދައުލަތަށް ދައްކަންޖެހޭ ފައިސާގެ މައްސަލައަކީ، މިސަރުކާރު އައުމުގެ މާކުރިން ފެށިގެން ސިލްސިލާގޮތެއްގައި ހިނގަމުން އަންނަ މައްސަލައެއްކަމަށެވެ. އަދި ސަރުކާރުން، ވިލާކުންފުންޏާބެހޭ އެއްވެސްވާހަކައެއްވެސް ޤާސިމް އިބްރާހީމްގެ ވާހަކައެއްވެސް މިހާތަނަށް ނުދައްކަވާކަމަށް މުއާޒް ވިދާޅުވިއެވެ.
ދައުލަތުގެ އިދާރާތަކުން ކަންކަން ކުރިއަށްގެންދަވާ އުސޫލުތަކަކީ ޤާނޫނީގޮތުން ކުރިއްސުރެ ކަނޑައެޅިފައިވާ ކަމެއްކަމަށާ، އެކަންކަމުގެ ތެރެއަށް ނުފޫޒުފޯރުވައި ބަސްބުނުމަކީ މިސަރުކާރުން ކުރައްވާނެކަމެއް ނޫންކަމަށް ރައީސް އޮފީހުގެ ތަރުޖަމާނު ވިދާޅުވިއެވެ.