މޯލްޑިވިއަން އައިޑަލް ސީޒަން ދޭއްގެ ގަދަ 6 ބައިވެރިން ޔަޤީންވެ، 2 ބައިވެރިއަކު މިރޭގެ ޝޯވއިން ވަކިވެއްޖެއެވެ.
ގަދަ 6 އަކަށް ދަތުރުކުރި ބައިވެރިން އިޢުލާންކޮށްފައިވަނީ އެކަމަށްޓަކާ މިރޭ ބޭއްވި ގާލާ ރައުންޑުގެ 5 ވަނަ ޝޯވގެ އެލިމިނޭޝަން ނައިޓުގައެވެ. 12 ބައިވެރިންނާއެކު ފެށި ގާލާ ރައުންޑުގެ ޝޯވތަކުގެ ބައިވެރިންގެ ޢަދަދު މިހާރު 6 އަކަށް ތިރިވެފައިވާއިރު، އެހެން ހަފްތާތަކުގެ އެލިމިނޭޝަން ނައިޓާއި ޚިލާފަށް، މިރޭގެ ޝޯވއިން 2 ބައިވެރިއަކު ވަނީ ކަޓާފައެވެ. އެގޮތުން ގަދަ ހަޔަކުން ޖާގައެއް ނުލިބި، އައިޑަލްގެ ޕްލެޓްފޯމާއި ވަކިވާންޖެހުނު 2 ބައިވެރިންނަކީ ޢާއިޝަތު ޖައިޝާ ވަޙީދާއި އަޙުމަދު ފަރަޝްއެވެ.
img:http://s2.psmnews.mv/images/660x400/14916776404067.jpg|މިރޭ ކެޓި ޢާއިޝަތު ޖައިޝާ ވަޙީދު
ގަދަ 6 އަށް ދަތުރުކުރި ބައިވެރިން:
ޝަމްވީލް މުޙައްމަދު، ޢިބްރާހީމް ވަޙީދު، މުޙައްމަދު ތަސްނީމް، އަޙްމަދު ނަބީލް މުޙައްމަދު، ޙަމޫދު އަޙްމަދު، ޢަބްދުﷲ ހިޝާން .
img:http://s2.psmnews.mv/images/660x400/14916776726563.jpg|މިރޭ ކެޓި އަޙްމަދު ފަރަޝް
"ޕޭރަންޓް ސްޕެޝަލް" މި ތީމަށް ރޭގެ ގާލާ ރައުންޑުގެ ފަސް ވަނަ ޝޯވ ޙާއްސަކޮށްފައިވާއިރު، މިރޭގެ އެލިމިނޭޝަން ނައިޓުން ފެނިގެންގޮސްފައިވަނީ ދިވެހިންގެ ދިވެހިވަންތައްކަން އެންމެ ރަނގަޅަށް ދައްކުވައިދޭ އެއް އާލާތްކަމުގައިވާ ބޮޑުބެރު ލަވަތަކަށެވެ. މިރޭގެ ޝޯވގައިވެސް ބައިވެރިންގެ ފަރާތުން ވަނީ ފޯރިގަދަ ރީތި ލަވަތަކެއް ހުށައަޅާދީފައެވެ.
މިރޭގެ އެލިމިނޭޝަން ނައިޓުގައި ގެސްޓް ޖަޖެއްގައި ގޮތުގައި ބައިވެރިވެފައިވަނީ ހަރުބީ ބޮޑުބެރު ގްރޫޕުން ދިވެހިންގެ ތެރެއަށް މަޝްޙޫރުވެގެންދިޔަ ޒުވާން ލަވަކިޔުންތެރިޔާ އިބްރާހީމް މަމްދޫޙެވެ.
މޯލްޑިވިއަން އައިޑަލްގެ ކުރިއަށްހުރި ޝޯވތަކަށް ދަތުރުކުރާ ބައިވެރިން ހޮވަނީ ޖަޖުންގެ 50 އިންސައްތަ މާކްސްއާއި، އެސްއެމްއެސް މެދުވެރިކޮށް ބެލުންތެރިން ފޮނުވާ 50 އިންސައްތަ ވޯޓު އެއްކޮށްލުމުން، އެންމެމަތިން ލިބޭ މާކްސްއަށް ބަލައިގެންންނެވެ.
ގާލާ ރައުންޑާއެކު، ބައިވެރިންގެ މެދުގައިވެސް ވާދަވެރިކަން އިތުރުވެފައިވާއިރު، ކޮންމެ ހަފްތާއެއްގެވެސް އޮންނަ އެލިމިނޭޝަން ނައިޓުން ބައިވެރިންގެ ތެރެއިން ކޮންމެވެސް އެއް ބައިވެރިއަކު އައިޑަލް ޝޯވއާ ވަކިވެގެންދެއެވެ. މޯލްޑިވިއަން އައިޑަލް ސީޒަން ދޭއްގެ ގްރޭންޑް ފިނާލޭ އޮންނާނީ ފައިނަލަށް ދަތުރުކުރާ ގަދަ 3 ބައިވެރިންނާއެކުއެވެ.