އެކަށީގެންވާ އަވަސްމިނެއްގައި ޢަދުލުއިންސާފަށް ވާސިލްވުމުގެ ޙައްޤަކީ ޤާނޫނުއަސާސީން ކޮންމެ ދިވެހިރައްޔިތަކަށްވެސް ލިބިދީފައިވާ ޙައްޤެކެވެ. މިޙައްޤު ކަށަވަރުކޮށްދެއްވުމަށްޓަކައި ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛް ޢަބްދުﷲ ސަޢީދުގެ އިސްނެންގެވުމުގެ މަތިން ޝަރުޢީ ކޯޓްތަކުން މައްސަލަ ބައްލަވާ މިންވަރު އަވަސްކުރައްވައި، ގިނަދުވަސްވެފައިވާ މައްސަލަތައް ނިންމެވުމަށް ޢަމާޒްތަކެއް ކަޑައަޅުއްވައި 2015 ވަނަ އަހަރުން ފެށިގެން ގެންދަވަނީ މަސައްކަތް ކުރައްވަމުންނެވެ.
ޝަރުޢީ ދާއިރާގެ 2016 ވަނައަހަރުގެ ޕާފޯމަންސް ރިޕޯޓުން ދައްކާގޮތުން ޝަރުޢީ ކޯޓްތަކުން ނިންމަވާފައިވާ މައްސަލަތަކުގެ ޢަދަދު ޝަރުޢީ ދާއިރާގެ ތާރީޚްގައި ފުރަތަމަ ފަހަރަށް ވަނީ 20 ހާހަށް އަރާފައެވެ.
ޝަރުއީ ކޯތްތަކުން 2016 ވަނައަހަރުގެ ތެރޭގައި 20698 މައްސަލަ ނިންމަވާފައިވެއެވެ. މިއީ 2015 ވަނަ އަހަރާ އަޅާ ބަލާއިރު 7 އިންސައްތައިގެ އިތުރުވުމެކެވެ. އަދި ދަށު ކޯޓްތަކަށް ހުށައެޅުނު މައްސަލަތަކުގެ ޢަދަދުވެސް 2016 ވަނައަހަރު ވަނީ ރެކޯޑް މިންވަރަކަށް އިތުރުވެފައެވެ. އެގޮތުން ސުޕީރިއަރ ކޯޓުތަކަށް 2016 ވަނައަހަރުގެ ތެރޭގައި 8278 މައްސަލަ ހުށައަޅާފައިވާއިރު، މެޖިސްޓްރޭޓް ކޯޓްތަކަށް 11910 މައްސަލަ ވަނީ ހުށައަޅާފައެވެ.
މީގެ އިތުރުން ޝަރުޢީ ކޯޓްތަކުގައި ނުނިމި ހުރި މައްސަލަތަކުގެ ޢަދަދު މަދުކުރެއްވުމަށް ޝަރުޢީ ދާއިރާއިން ކުރައްވާ މަސައްކަތް ކާމިޔާބު ކަމަށް ޝަރުޢީ ދައިރާއިން ހާމަކުރައްވައެވެ. އެގޮތުން 2016 ވަނަ އަހަރުގެ ނިޔަލަށް ޝަރުޢީ ކޯޓުތަކުގައި ނުނިމި ހުރި މައްސަލަތަކުގެ ޢަދަދު ވަނީ ދަށް ކުރެވިފައެވެ. 2016 ވަނައަހަރު ނިމުނުއިރު ޝަރުޢީ ކޯޓުތަކުގައި ނުނިމި ހުރި މައްސަލަތަކުގެ ޖުމްލަ ޢަދަދަކީ 6668އެވެ.
ޝަރުޢީ ކޯޓްތަކުގައި ނުނިމި ގިނަދުވަސްވެފައިވާ މައްސަލަތަކުގެ ޢަދަދު 2015 ވަނައަހަރާ އަޅާބަލާއިރު ވަނީ 1155 މައްސަލައަށް މަދުކުރެވިފައެވެ. ޝަރުޢީ ކޯޓްތަކުގައި މިހާރު 1 އަހަރަށްވުރެ ގިނަދުވަސްވެފައިވާ މައްސަލަތަކުގެ ޢަދަދަކީ 790އެވެ.ޝަރުޢި ކޯޓްތަކުގެ ކޭސް ކްލިއަރެންސް ރޭޓް ނުވަތަ ހުށައެޅުނު މައްސަލަތަކުގެ ނިސްބަތުން މައްސަލަ ނިންމަވާ ނިސްބަތަކީ، 103 އިންސައްތައެވެ. މިރޭޓުން ދޭހަކޮށްދެނީ ކޯޓްތަކަށް ހުށައެޅޭ މައްސަލަތަކަކުގެ ޢަދަދަށްވުރެ ނިންމަވާ މައްސަލަތަކުގެ ޢަދަދު އިތުރުކަމެވެ.
2016 ވަނައަހަރުގެ ތެރޭގައި އިންސާފަށް އެދި ޝަރުޢީ ކޯޓްތަކަށް ހުށައެޅުނު މައްސަލަތަކުގެ ޢަދަދު ރެކޯޑް މިންވަރަކަށް އިތުރުވެފައިވަމުމުން ދޭހަކޮށްދެނީ ޝަރުޢީ ކޯޓްތަކުގެ ތަޞައްވުރު ރަނގަޅުވެ، އިންސާފު ހޯދުމަށްޓަކައި ކޯޓްތަކަށް ބަރޯސާވާ މިންވަރު އިތުރުވެފައިވާކަމެވެ.