ޤައުމުތަކުގެ ޤާނޫނު ބައްޓަންކުރަނީ އެޤައުމެއްގެ ނިސްބަތުން ދިމާވެފައިވާ މައްސަލަތައް ޙައްލުވާނެ ގޮތަށް ކަމަށާއި މިކަމުގައި އެއްގައުމު އަނެއްޤައުމާ އަޅާ ނުކިޔޭނެކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
ދިވެހި ސަފީރުންގެ އަހަރީ މަހާސިންތާ ފަށްޓަވާދެއްވާ ވާހަކަފުޅުދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ، އެއްޤައުމަކުން ޓެރަރިޒަމް ކަމުގައި ބަލައިގަންނަ ކަންކަން އަނެއް ޤައުމާ ތަފާތުވެދާނެކަމަށާއި، އެއީ ދުނިޔޭގެ ޤައުމުތަކުގައި އެހެން ކުށްތައްވެސް ދަރަޖަކުރެއްވޭ ގޮތްކަމަށެވެ. މީހެއްގެ ރުހުމެއް ނެތި ހިފައި ހައްޔަރުކޮށް، ނިޒާމުން ގެއްލުވާލުމަކީ، ރާއްޖޭގެ ޤަނޫނީ ނިޒާމުގައި ޓެރަރިޒަމްގެ ޢަމަލެއްކަމަށް ބަޔާންކޮށްފައި އޮންނަ އޮތުމަށް ބައެއް ފަރާތްތަކުން ކިޔަމުންދާ ފާޑުތަކަށް ރައްދުދެއްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ދިވެހިރާއްޖޭގެ ޤާނޫނުގައި އެގޮތަށް ބަޔާންކޮށްފައިވަނީ އެކަމަކީ ދިވެހި މުޖުތަމައަށް ހުރި ނުރައްކަލަކަށްވާތީކަމަށެވެ. އަދި ވަކި ކުށެއް ޖިނާޔަތުގެ މަތީ ދަރަޖައިގެ ކުށެއްކަމަށް ޤައުމަކުން ކަނޑައެޅި ސަބަބު ދެނެގަނެވޭނީ، އެކުށް ޤާނޫނުގައި ބަޔާންކުރީ ކީއްވެގެންކަން ދެނެގަތުމުންކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ މިހެން ވިދާޅުވެފައި މިވަނީ ކުރީގެ ރައީސް މުހައްމަދު ނަޝީދުގެ މައްޗަށް ސާބިތުވެފައިވާ ޓެރަރިޒަމްގެ ކުށާ ގުޅިގެން ދުނިޔޭގެ ބައެއް ޤައުމުތަކުން ފާޑުކިޔުންތައް ރާއްޖެއަށް އާމާޒުވެފައިވަނިކޮށެވެ.
ރައީސް ޔާމީން ވިދާޅުވީ ޤާނޫނު ކުރިމަތީގައި އެންމެން ހަމަހަމަ ވާނެކަމަށާއި ވަކި ބަޔަކު ކުށްކުރުމުން އެމީހުން ޤާނޫނުން އިސްތިސްނާ ނުކުރެވޭނެކަމަށެވެ. ޤާނޫނު ތަންފީޒުކުރުމުގައި ސަރުކާރުން ގެންގުޅުއްވާ ސިޔާސަތުތަކަށް ބައެއް ފަރާތަކުން ފާޑު ކިޔަމުންދާއިރު ޢާންމު ރައްޔިތަކު ޤާނޫނުގައި ކަނޑައަޅާފައިވާ ކުށެއް ކުރުމާއި، ސިޔާސީ މީހަކު ކުށެއް ކުރުމުން ތަފާތު ގޮތަކަށް ޢަމަލުކުރުމަކީ އިންސާފެއް ނޫންކަމަށްވެސް ރައީސް ވިދާޅުވިއެވެ.
ރާއްޖޭގެ މުޅި ދައުލަތް ހިނގަމުންދާނީ ޤާނޫނާ އެއްގޮތަށްކަމަށާއި، ކޮންމެ ފަރާތަކުން ފާޑުކިއުންތައް އަމާޒުކުރިނަމަވެސް ޤާނޫނީ އިމުން ބޭރުން އެއްވެސް ކަމެއް ނުކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.