މޯލްޑިވިއަން އައިޑަލްގެ ފޭނުންނަށް ދިރާގުގެ ޚާއްސަ ހަދިޔާއެއްގެ ގޮތުގައި ވައިބަރ ސްޓިކަރ ޕެކެއް އެކުންފުނިން ތަޢާރަފުކޮށްފިއެވެ.
ދިވެހިންގެ މެދުގައި އެންމެ މަޤުބޫލު އެއް ސޯޝަލް މީޑިއާ ޕްލެޓްފޯމްކަމުގައިވާ ވައިބަރ ބޭނުންކުރާ ފަރާތްތަކަށް ޚާއްސަކޮށްގެން ދިރާގުން ނެރުނު މި ސްޓިކަރ ޕެކަކީ އެކުންފުނިން މިފަދަ ގޮތަކަށް ތަޢާރަފުކުރި ފުރަތަމަ ސްޓިކަރ ޕެކެވެ. މި ސްޓިކަރ ޕެކުގައި މޯލްޑިވިއަން އައިޑަލް ސީޒަން އެކެއް އަދި ސީޒަން ދޭއްކުން ވިދާލި ބައެއް ފަންނާނުންނާއި، މި ޝޯވގެ ތިން ޖަޖުން އަދި ޝޯވގެ ޕްރެޒެންޓަރުންގެ ކެރެކްޓަރތައް ފެނިގެންދާއިރު، ލިޔުންތަކުގެ ގޮތުގައިވެސް ބޭނުންކޮށްފައިވަނީ އައިޑަލްގެ އެކި ޝޯވތަކުން އާއްމުންގެ ތެރެއަށް މަޝްހޫރުވެގެންދިޔަ ބައެއް ބަސްބަހެވެ.
އެންޑްރޮއިޑް އަދި އައި.އޯ.އެސްގެ ފޯންތައް ގެންގުޅުއްވާ ފަރާތްތަކަށް މި ސްޓިކަރ ޕެކް މިހާރު ޑައުންލޯޑްކޮށްގެން ބޭނުންކުރެވޭނެކަމަށް ދިރާގުން ބުންޏެވެ. ރާއްޖޭގެ އެންމެ ފުރަތަމަ އަދި އެންމެ ބޮޑު މުވާސަލާތީ ކުންފުނިކަމުގައިވާ ދިރާގަކީ މޯލްޑިވިއަން އައިޑަލް ސީޒަން އެކެއް އަދި ސީޒަން ދޭއްގެވެސް ޓައިޓަލް ސްޕޮންސަރެވެ.
މޯލްޑިވިއަން އައިޑަލްގެ ޝޯވތަކަށް ބެލުންތެރިންގެ ފަރާތުން ބޮޑު މަޤުބޫލުކަމެއް ލިބިފައިވާއިރު، އައިޑަލްގެ ޓީމުން މިހާރު އަންނަނީ މޯލްޑިވިއަން އައިޑަލް ސީޒަން ދޭއްގެ ގްރޭންޑް ފިނާލޭއަށް ތައްޔާރުވަމުންނެވެ. މިފަހަރުގެ ސީޒަންގެ ގްރޭންޑް ފިނާލޭގައި ވާދަކުރާ ގަދަ 3 ބައިވެރިންނަކީ ޙަމޫދު އަޙްމަދު، މުޙައްމަދު ތަސްނީމް، ޝަމްވީލް މުޙައްމަދުއެވެ. އައިޑަލްގެ ގްރޭންޑް ފިނާލޭ އޮންނާނީ މި ހަފްތާ ބަންދުގެ ހުކުރު އަދި ހޮނިހިރު ދުވަހުގެރެއެވެ.