ރާއްޖޭގެ ޝަރުޢީ ދާއިރާ އިސްލާހު ކުރުމުގެ ނަމުގައި، ކޯޓުތަކުގެ ނިންމުންތަކާއި ގުޅިގެން ކޯޓުތަކަށް ގޮންޖަހާ، ޝަރުޢީ ދާއިރާއާ ދިމާކޮށް ހެދުމަކީ ދިވެހި ދައުލަތުގެ ޤާނޫނީ އަސާސަށް ހުރި ނުރައްކަލެއް ކަމަށް އުއްތަމަ ފަނޑިޔާރު އަހުމަދު ފާއިޒް ހުސައިން ވިދާޅުވެއްޖެއެވެ.
އުއްތަމަ ފަނޑިޔާރު މިހެން ވިދާޅުވީ ސުޕްރީމް ކޯޓުން މިމަހުގެ ނުވަވަނަ ދުވަހު ނިންމެވި މިންމެވުމަކާއި ގުޅިގެން އެކި ފަރާތްތަކުން ދައްކަވާ ވާހަކަތަކާ ގުޅިގެން ނެރުއްވި ބަޔާނެއްގައެވެ. މިބަޔާނުގައި އުއްތަމަ ފަނޑިޔާރު ވިދާޅުވީ، ރާއްޖޭގެ ދުސްތޫރީ އަދި ސިޔާސީ ނިޒާމުގެ ހުރިހާ ދިމާއެއްގައިވެސް އިސްލާހު ކުރަންޖެހޭ ކަންތައްތަކެއް އެބަހުރި ކަމަށެވެ. ނަމަވެސް ޝަރުޢީ ނިޒާމު އިސްލާހު ކުރުމުގެ ނަމުގައި މަދުބަޔަކު ކޯޓުތަކާއި ދިމާކޮށް ހިންގާ ޢަމަލުތަކަކީ އަޅާނުލާ ދޫކޮށްލެވިގެންވާނެ ޢަމަލުތަކެއް ނޫން ކަމަށް ވިދާޅުވިއެވެ. އަދި ރާއްޖޭގެ އަދުލު އިންސާފު ޤާއިމް ކުރުމާއި ޤާނޫނީ ހުކޫމަތު ދެމެހެއްޓުމުގެ މަސްޢޫލިއްޔަތު ޤާނޫނު އަސާސީން މަތިކޮށްފައިވަނީ ސުޕްރީމް ކޯޓަށް ކަމަށާއި ޤާނޫނު އަސާސީ މާނަކުރުމުގައި ސްޕްރީމް ކޯޓުން ނިނަމަވާ ނިންމެވުމަކީ އެންމެ ފަހުގެ ނިންމެވުން ކަމަށް މިބަޔާނުގައި ވިދާޅުވެފައިވެއެވެ.
މިބަޔާނުގައި ސުޕްރީމް ކޯޓާއި ގުޅޭގޮތުން އެމެރިކާގެ ސްޓޭޓް ޑިޕާޓްމަންޓްގެ ތަރުޖަމާނު ޖެން ސާކީއާއި ކެނެޑާގެ ފޮރިން މިނިސްޓްރީއާއި އިންޓަރނޭޝަނަލް ހިއުމަން ރައިޓްސްގެ ޕާލަމެންޓްރީ ސެކެޓްރީ ދީޕަކް އޮބްރާއި އިއްޔެ ނެރުއްވި ދެ ބަޔާނަށް ރިޔާއަތް ކުރައްވާފައިވެއެވެ. މި ދެ ބަޔާނަށް ރިޔާއަތްކުރައްވާ އުއްތަމަ ފަނޑިޔާރު ވިދާޅުވީ، ރާއްޖޭގެ ދާޚިލީ އަދި ޤާނޫނީ މައްސަލައެއްގައި ސުޕްރީމް ކޯޓުން ނިންމެވި ނިންމެވުމަކަށް، ހަޤީޤަތާއި ހިލާފު ވާހަކަތަކެއް ހިމަނައިގެން ރާއްޖޭގެ ޝަރުޢީ ނިޒާމުގެ ޙުރުމަތާއި ހައިބަތަށް އަރައިގަނެވޭފަދަ ގޮތަކަށް އެކުވެރި ބައެއް ދަޢުލަތްތަކުން ނެރުނު ބަޔާންތަކަކީ ރާއްޖޭގައި ކަންކަން ހިނގާ ނުހިނގާ ގޮތް ނޭނގި ތިބެ ވަރަށް ޒިންމާދާރުކަން ކުޑަ ގޮތަކަށް ނެރުނު ބަޔާންތަކެއް ކަމަށާއި އެކަން ހަރުކަށި ޢިބާރާތުން ކުށްވެރިކުރައްވާ ކަމަށެވެ. އަދި ދިވެހިރާއްޖޭގެ ސުޕްރީމް ކޯޓަށާއި ޝަރުޢީ ދާއިރާއަށް ޤާނޫނު އަސާސީން ލިބިފައިވާ ބާރުތައް ބޭނުން ކުރުމުގައި ބޭރުގެ އެއްވެސް ދަޢުލަތެއް ނުވަތަ ޖަމާއަތެއްގެ ފިއްތުމަކަށް ޖެހިލުން ވަޑައިނުގެން މަސްޢޫލިއްޔަތު އަދާކުރެއްވުމުގައި ދެމިތިއްބަވާނެ ކަމަށް މިބަޔާނުގައި ވިދާޅުވެފައިވެއެވެ.