ލީބިޔާއިން ރެފިއުޖީން ގޮވައިގެން މެޑިޓެރޭނިއަން ކަނޑު ހުރަސްކޮށް ވިލާތަށް ދިއުމަށް މަސައްކަތްކުރި ބޯޓެއް ބަންޑުން ޖަހާލައި ހިނގި ޙާދިސާއެއްގައި 31 މީހުން މަރުވެއްޖެއެވެ.
މި ޙާދިސާގައި މަރުވި މީހުންގެ ތެރޭގައި ގިނަ ޢަދަދެއްގެ ކުޑަކުދިން ހިމެނެއެވެ. މި ބޯޓުން ދަތުރުކުރި މީހުންގެ ތެރެއިން ސާޅިސް މީހަކު ސަލާމަތްކޮށްފައިވެއެވެ.
ވޭތުވެދިޔަ ދެތިން ދުވަހުގެ މޫސުމް ރަނގަޅުވެ ކަނޑު މަޑުވުމުގެ ސަބަބުން ލީބިޔާއިން ވިލާތަށް ދަތުރުކުރާ ރެފިއުޖީންގެ ޢަދަދު ވަނީ އިތުރުވެފައެވެ. އެ ގޮތުން، މިދިޔަ ބުރާސްފަތި ދުވަހު ވިލާތަށް ދަތުރުކުރަން މަސައްކަތްކުރި 250 މީހުން ހާލުގައި ޖެހިފައިވަނިކޮށް ލީބިޔާގެ ކޯސްޓްގާޑުން ވަނީ ސަލާމަތްކޮށްފައެވެ.
އަދި ހުސްވި ހަފުތާގެ އަންގާރަ ދުވަހު އިޓަލީވިލާތުގެ ކޯސްޓުގާޑުން ވަނީ 1،100 މީހުންނަށް އެހީތެރިކަން ފޯރުކޮށްދީފައެވެ.