ވެނަޒުއޭލާގެ އައު ޤާނޫނު އަސާސީ އެކުލަވާލުމަށް ޚާއްޞަ މަޖިލިސް އިންތިޚާބުކުރުމަށް އެ ޤައުމުގައި އާދިއްތަ ދުވަހު ބޭއްވި އިންތިޚާބުގައި، ވޯޓުލުމުގެ ޝަރުތު ހަމަވާ 41.5 އިންސައްތަ މީހުން ވޯޓުލާފައިވާކަމަށް އެ ގައުމުގެ އިންތިޚާބާ ބެހޭ އޮފިޝަލުން ބުނެފިއެވެ. ވެނަޒުއޭލާގެ ރައީސް ނިކޮލަސް މަދޫރޯ ވަނީ، އާދިއްތަ ދުވަހުގެ އިންތީޚާބަކީ ކާމިޔާބީއެއް ކަމަށާއި އެއީ އެގައުމުގެ ބޭއްވި އެންމެ ބޮޑު އިންތިޚާބުކަމަށް ވިދާޅުވެފައެވެ.
އެހެންނަމަވެސް ވެނަޒުއޭލާގެ އިދިކޮޅު ފަރާތްތަކުން ބުނެފައިވަނީ އާދިއްތަ ދުވަހު އެ ގައުމުގައި ނެގި ވޯޓުގައި، ވޯޓުލުމުގެ ޙައްޤު ލިބިފައިވާ އާބާދީގެ އައްޑިހަ އަށް އިންސައްތަ މީހުން ބައިވެރި ނުވާކަމަށާއި، އެހެންކަމުން މި އިންތިޚާބަކީ ސައްހަ އިންތިޚާބެއްކަމަށް ނުބެލެވޭނެ ކަމަށެވެ. އާދިއްތަ ދުވަހު ބޭއްވި އިންތިޚާބާ ދެކޮޅަށް ވެނަޒުއޭލާގައި އިތުރު މުޒާހަރާތައް ކުރާނެކަމަށް އެ ޤައުމުގެ އިދިކޮޅު ފަރާތްތަކުން ވަނީ ބުނެފައެވެ.
އިންތިޚާބުގެ ވޯޓުލުން ކުރިއަށް ގެންދިޔައިރުވެސް އެ ޤައުމުގައި ކުރި މުޒާހަރާތަކުގައި ހިންގި ކުރިމަތިލުންތަކުގައި ވަނީ 10 މީހުން މަރުވެފައި. ވެނުޒުއޭލާގެ ޤާނޫނު އަސާސީ އަލުން އެކުލަވާލުމަށް އިންތިޚާބުކުރާ ޚާއްޞަ މަޖިލީހުން ޤާނޫނު އަސާސީ އަލުން އެކުލަވާލުމުގެ ބާރުގެ އިތުރުން މިހާރު އެ ޤައުމުގައި އޮތް ޤާނޫނު ހަދާ މަޖިލީހުގެ މައްޗަށް ޢަމުރު ހިންގުމުގެ ބާރުވެސް ލިބިގެންދާނެއެވެ. ވެނެޒުއޭލާގައި މިހާރު އޮތް ޤާނޫނު ހަދާ މަޖިލީހުގެ އަޣުލަބިއްޔަތު ވަނީ އިދިކޮޅު ޕާޓީތަކުގެ އަތުގައެވެ.