އެމެރިކާގެ ކޮންގްރެސް އިން ރަޝިޔާއާ ދެކޮޅަށް އަޅަން ނިންމި ދަތިކުރުމުގެ ފިޔަވަޅުތަކަށް ރައްދުދިނުމުގެ ގޮތުން ރައްދުގައި އެމެރިކާއާ ދެކޮޅަށް ވިލާތުގެ ޤައުމުތަކުންވެސް ފިޔަވަޅުތަކެއް އަޅަންޖެހޭ ކަމަށް ޖަރުމަނުވިލާތުގެ އިޤުތިޞާދާ ބެހޭ ވަޒީރު ބްރިޖިޓް ޒިބްރީޒް ވިދާޅުވެއްޖެއެވެ.
އެމެރިކާއިން ރަޝިޔާއާ ދެކޮޅަށް އަޅަން ނިންމި ފިޔަވަޅުތަކުގެ ސަބަބުން ވިލާތުގެ އެތައް ސަތޭކަ ކުންފުންޏަކަށް ބޮޑެތި ގެއްލުންތަކެއް ކުރިމަތިވާނެ ކަމަށާއި، އޭގެތެރޭގައި ޖަރުމަނުގެ ކުންފުނިތައްވެސް ހިމެނޭކަމަށް، ޖަރުމަނުވިލާތުގެ ނޫސްވެރިންނަށް ދެއްވި ބަސްދީގަތުމެއްގައި ޒިބްރީޒް ވިދާޅުވިއެވެ.
އެ ގޮތުން ރަޝިޔާގެ ގުދުރަތީ ގޭސް ޖަރުމަނަށް ސަޕްލައިކުރުމަށް ދެ ގައުމުގެ ދެމެދުގައި ބިނާކުރާ ގޭސް ހޮޅީގެ މަސައްކަތްކުރާ ޖަރުމަނުގެ ކުންފުނިތަކަކީ އެމެރިކާގެ ފިޔަވަޅުތަކުގެ ސަބަބުން މާލީގޮތުން ބޮޑެތި ގެއްލުންލިބިގެންދާނެ ކުންފުނިތައް ކަން އޭނާ ފާހަގަކުރައްވާފައިވެއެވެ.
އެމެރިކާގެ ކޮންގްރެސް އިން ރަޝިޔާ ދެކޮޅަށް އަޅަން ނިންމި ފިޔަވަޅުތަކަށް ވައިޓް ހައުސްގެ ތާއީދު އޮތްކަން މިހާރު ވަނީ ހާމަކޮށްފައެވެ. އެ ފިޔަވަޅުތަކާބެހޭ ޤާނޫނު، ރައީސް ޑޮނަލްޑް ޓްރަމްޕް ތަސްދީޤުކުރައްވައި އެއަށް ޢަމަލުކުރަން ފެށުމުން، އެމެރިކާ އާއި ވިލާތާ ދެމެދު ވިޔަފާރީގެ އަރާރުމެއް އުފެދުމުގެ ފުރުޞަތު ބޮޑުވެގެންދާނެކަމަށް ވިލާތުގެ ތަޖުރިބާކާރުން އަންދާޒާކުރެއެވެ.