ޢަރަބި ބާރުތަކުން ޤަތަރާ ދެކޮޅަށް ވިޔަފާރީގެ ގޮތުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އެ ޤައުމަށް ލިބޭ ގެއްލުންތަކުގެ ބަދަލުހޯދުމަށް ކަމަށް ބުނެ، ޤަތަރުން ދުނިޔޭގެ ވިޔަފާރީއާބެހޭ ޖަމްޢިއްޔާ ޑަބްލިއު.ޓީ.އޯ އަށް މައްސަލައެއް ހުށަހަޅައިފިއެވެ. ޖޫން މަހުގެ ފަސް ވަނަ ދުވަހު ސައުދީ ޢަރަބިޔާ، ޔޫ.އޭ.އީ، ބަހްރައިން އަދި މިސްރުން ޤަތަރާ ސިޔާސީ އަދި ވިޔަފާރީގެ ގުޅުން ކަނޑާލިފަހުން އެ ގައުމުތަކުން ވަނީ ޤަތަރާއެކު އެއްވެސް ގުޅުމެއް ބޭއްވުމަށް ދެކޮޅު ހަދާފައެވެ.
ޤަތަރުގެ ސަރުކާރުން ޓެރަރިސްޓް ޖަމާޢަތްތަކަށް އެއްބާރުލުންދޭކަމަށް ތުހުމަތުކޮށް، ސައުދީ ޢަރަބިޔާ، ޔޫ.އޭ.އީ، ބަހްރައިން އަދި މިސްރުން ޤަތަރާ ގުޅުން ކަނޑާލާފައިވާއިރު، ޤަތަރުން މި ތުހުމަތުތައް ދޮގުކުރެއެވެ، ދެފަރާތުންވެސް ދުލެއް ނުދީ ގިނަ ދުވަސްތަކެއް ފާއިތުވުމަށް ފަހު ދެ ފަރާތުން ވެސް މިހާރު ވަނީ، ސީދާ މަޝްވަރާތަކަށް ތައްޔާރުކަން ހާމަކޮށްފައެވެ. އެހެންނަމަވެސް ޢަރަބި ބާރުތަކުން ޤަތަރާއެކު ސީދާ މަޝްވަރާތައް ކުރިއަށްގެންދާނީ، މި ކަމުގައި ޤަތަރުން މިހާތަނަށް ގެންގުޅުނު ސިޔާސަތުތަކަށް ބަދަލު ގެނެސްގެން ކަމަށްވެސް އެ ޤައުމުތަކުގެ ޚާރިޖީ ވަޒީރުން، މިހަފުތާގެ އާދިއްތަ ދުވަހު ބަހްރައިންގެ ވެރިރަށް މަނާމާގައި ބޭއްވި ބައްދަލުކުރެއްވުމަށްފަހު ވަނީ ހާމަކުރައްވާފައެވެ.
މިދަނޑިވަޅުގައި، ޤަތަރުގެ ސަރުކާރުން މިވަނީ، ޢަރަބި ބާރުތަކުން ޤަތަރާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އެ ޤައުމަށް މިހާތަނަށް ލިބިފައިވާ ގެއްލުމުގެ ބަދަލު ހޯދުމަށް ދުނިޔޭގެ ވިޔަފާރީއާ ބެހޭ ޖަމާޢަތް ޑަބްލިއު.ޓީ.އޯއަށް މިމައްސަލަ ހުށަހަޅާފައެވެ. އެ ގޮތުން ޤަތަރުން އެ ޖަމާޢަތަށް ހުށަހަޅާފައި ވަނީ ޤާނޫނީ މައްސަލައެއް ކަމަށާއި، މި މައްސަލައަކީ ސައުދީ، ޔޫ.އޭ.އީ އަދި ބަހްރައިނުން ޤަތަރާއެކު ވިޔަފާރިކުރުން ހުއްޓުވުމާ ދެކޮޅަށް ޤަތަރުން ހުށަހަޅާފައިވާ މައްސަލައެއް ކަމަށް ޤަތަރު ސަރުކާރުން ބުނެއެވެ. އަދި ޤަތަރުން ރަސްމީކޮށް މިފަދަ މައްސަލައެއް ޑަބްލިއު.ޓީ.އޯއަށް ހުށަހެޅުމާއެކު ކުރިއަށް އޮތް 60 ދުވަހުގެ ތެރޭގައި ޤަތަރުގެ މި ހުށަހެޅުމަށް ރަސްމީ ޖަވާބެއް ދިނުމަށް މި ތިން ޤައުމަށް މަޖުބޫރުވާނެއެވެ.
ޤަތަރުގައި ހުންނަ ޑަބްލިއު.ޓީ.އޯގެ އޮފީހުގެ ޑިރެކްޓަރ ޢަލީ ޢަލްވަލީދް ޢަލް ޘާނީ ވިދާޅުވީ، ޤަތަރާ ދެކޮޅަށް ވިޔަފާރީގެ ގޮތުން ފިޔަވަޅު އަޅަމުންދާ ފަރާތްތަކުން މިހާތަނަށް ބޭނުންކުރަމުން ދިޔަ ބަހަނާތަކުގެ ފަހަތުގައި ޤާނޫނީ އެއްވެސް ސަބަބެއް އޮތްތޯ ބެލުމަށް އެ ޤައުމުތަކަށް ވަރަށް ގިނަ ފުރުސަތު ދެވިއްޖަ ކަމަށާއި، އެ ކަމުގައި ފިޔަވަޅު އަޅަންވީ ވަގުތު ޖެހިއްޖެކަމަށެވެ. ޤަތަރުން އަބަދުވެސް ބޭނުންވަނީ މިމައްސަލަ ހައްލުކުރުމަށް މަޝްވަރާގެ ވާހަކަތައް ކުރިއަށް ގެންދިއުމަށް ކަމަށާއި، މިއީ މިފަދަ މަޝްވަރާތައް ކުރިއަށް ގެންދިއުމަށްވެސް ލިބިގެންދާނެ ފުރުސަތެއް ކަމަށް ޢަލީ ވިދާޅުވިއެވެ.
ޤަތަރާއި ޢަރަބި ބާރުތަކާ ދެމެދު އުފެދިފައިވާ މައްސަލަތައް ހައްލުކުރުމަށް އެގައުމުތަކާ އެކު ސީދާ މަޝްވަރާތައް ކުރިއަށްގެންދިޔުމަށް ޤަތަރުންވެސް ތައްޔާރަށް އޮތްކަން ހުސްވި މަހު ޤަތަރުގެ ޢަމީރު ވަނީ ހާމަކުރައްވާފައެވެ. އެހެންނަމަވެސް ޤަތަރުން މަޝްވަރާގެ މޭޒުދޮށަށް ދާނީ، އެކަމުގެ ސަބަބުން ޤަތަރުގެ ސިޔާދަތަށް އެއްވެސް ނުރައްކަލެއް ނެތްކަމުގައިވާނަމަ ކަމަށް ޤަތަރުގެ ޢަމީރު ވަނީ ވިދާޅުވެފައެވެ.