ޗައިނާގެ ސިޔާދަތާއި ސަރަޙައްދީ މިނިވަންކަން ޙިމާޔަތްކުރުމުގެ ޤާބިލުކަން އެ ޤައުމުގެ އަސްކަރިއްޔާއަށް ލިބިގެންވާކަމަށް ޗައިނާގެ ދިފާޢީ ވަޒީރު ވިދާޅުވެއްޖެއެވެ.
ޗައިނާގެ ދައުލަތުން ހިންގާ ދުވަހު ނޫހެއް ކަމަށްވާ ޗައިނާ ޑެއިލީގައި ޝާއިޢުކޮށްފައިވާ ރިޕޯޓެއްގައި ޗައިނާގެ ދިފާޢީ ވަޒީރު ޗޭންގް ވާންކުއާން ވިދާޅުވީ، ޗައިނާގެ ސަރަހައްދީ މިނިވަންކަމާއި ސިޔާދަތު ދިފާޢުކުރުމުގެ ޤަބިލިއްޔަތާއި އިތުބާރު، ޗައިނާގެ އަސްކަރިއްޔާއަށް އެބައޮތް ކަމަށެވެ.
ޗޭންގް މި މޭރުމުން ވާހަކަފުޅު ދައްކަވާފައިވަނީ، ޓައިވާނުގެ ފަރާތުން ޗައިނާއަށް އޮތް އަސްކަރީ ނުރައްކަލުގެ މައްޗަށް ބައްލަވާލައްވަމުންނެވެ. ޗޭންގް އިތުރަށް ވިދާޅުވީ، 1992ވަނަ އަހަރު ޗައިނާ އާއި ޓައިވާނާ ދެމެދު ޤާއިމުކުރި އެއްބަސްވުމަކީ ދެ ޤައުމުގެ ދެމެދު ސިޔާސީ ގޮތުން ސުލްޙަވެރި ކުރިއެރުންތަކެއް ޤާއިމުކުރުމުގެ ބިންގާ ކަމަށެވެ. 1992ވަނަ އަހަރު ޤާއިމުކުރި އެއްބަސްވުމުގައި ބުނެފައިވަނީ ޓައިވާނަކީ ޗައިނާގެ ސަރަހައްދުގެ ތެރޭގައި ހިމެނޭ ތަނެއް ކަމުގައިވާނަމަވެސް އެ ޤައުމުގައި ވަކި ވެރިކަމެއް ކުރުމުގެ ހުއްދަ ޗައިނާއިން ދޭނެ ކަމަށެވެ.
ޗޭންގް މިވާހަކަތައް ދައްކަވާފައިވަނީ ޗައިނާގެ އަސްކަރިއްޔާއަށް 90 އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައެވެ . އެ ރަސްމިއްޔާތުގައި ޗައިނާގެ އަސްކަރިއްޔާގެ ގޮފިތަކުގައި ހިމެނޭ އުޅަނދުތަކާއި ހަތިޔާރުތައް ދައްކާލާފައިވެއެވެ. މީގެ ތެރޭގައި ޓޭންކަރުތަކާއި، ނިއުކްލިޔަރ ބޮން އުފުލައިގެން ދިޔަ އުޅަނދުތަކުގެ އިތުރުން، އަސްކަރީގެ ވައިގެ އުޅަނދުތައް ވެސް ހިމެނެއެވެ. އަދި މީގެ އިތުރުން، ސިފައިންގެ ޝަރަފުގެ ހިނގާލުމެއްވެސް މި ރަސްމިއްޔާތުގެ ތެރެއިން ކުރިއަށްގެންގޮސްފައިވެއެވެ.
ދުނިޔޭގެ އެންމެ ބޮޑު އަސްކަރިއްޔާ، ޗައިނާގެ އަސްކަރިއްޔާއިން މިހާރު ދަނީ، ޒަމާނީ ޓެކްނޮލޮޖީގެ އެހީގައި އަސްކަރިއްޔާގެ ހަތިޔާރުތަކާ އުކުޅުތައް ބަދަލުކުރުމުގެ މަސައްކަތްތައް ކުރަމުންނެވެ.