މިއަހަރުގެ ތެރޭގައި އިސްރާއީލާއެކު ސުލްޙައިގެ އެއްބަސްވުމަކަށް އާދެވޭނެ ކަމަށް އުއްމީދުކުރައްވާ ކަމަށާ، އެމެރިކާގެ ރައީސް ޑޮނާލްޑް ޓްރަމްޕްގެ ބައިވެރިވަޑައިގެންނެވުމާއެކު މިކަމުގައި ކާމިޔާބު ލިބޭނެ ކަމަށް ފަލަސްޠީނުގެ ރައީސް މަހްމޫދު އައްބާސް ވިދާޅުވެއްޖެއެވެ.
އައްބާސް މިހެން ވިދާޅުވީ އެމެރިކާގެ ނިއު ޔޯކްގައި ކުރިއަށްދާ އދގެ ޢާއްމު މަޖިލީހުގެ 72 ވަނަ ޖަލްސާގެ ހަވާސާގައި އެމެރިކާގެ ރައީސާ ބައްދަލުކުރައްވާ ދެއްކެވި ވާހަކަތަކުގައެވެ.
ނިއު ޔޯކްގައި ކުރިއަށްދާ އދގެ ޢާއްމު މަޖިލީހުގެ 72 ވަނަ ޖަލްސާގެ ހަވާސާގައި އެމެރިކާގެ ރައީސް ޑޮނާލްޑް ޓްރަމްޕާ ބައްދަލުކުރައްވާ ވާހަކަ ދައްކަވަމުން ފަލަސްޠީނުގެ ރައީސް މަހްމޫދު އައްބާސް ވިދާޅުވީ، ޓްރަމްޕް ވެރިކަމާ ހަވާލުވެވަޑައިގެން ފަހުން ޓްރަމްޕްގެ ޓީމާ ފަލަސްޠީނުގެ އޮފިޝަލުންނާ ދެމެދު ގިނަ ބައްދަލުވުންތަކެއް ބާއްވާފައިވާ ކަމަށާ މީގެންވެސް އެނގެނީ މެދުއިރުމަތީގެ ސުލްޙައިގެ އެއްބަސްވުމެއް ޤާއިމުކުރުމަށް ޓްރަމްޕް މަސައްކަތް ކުރައްވާ މިންވަރު ކަމަށެވެ. އަދި ކުރިއަށް އޮތް މަސްތަކުގައި މިފަދަ އެއްބަސްވުމެއް ޤާއިމުކުރެވޭނެ ކަމަށް އުއްމީދުކުރާ ކަމަށާ މިއެއްބަސްވުމަކީ މުޅި ޤަރުނުގައި ވެސް ޤާއިމުކުރެވޭނެ އެންމެ ހަރުދަނާ އެއްބަސްވުމަށް ވާނެ ކަމަށް ވެސް ފަލަސްޠީނުގެ ރައީސް މަހްމޫދު އައްބާސް ވިދާޅުވިއެވެ.
މި ބައްދަލުކުރެއްވުމުގައި ވާހަކަ ދައްކަވަމުން އެމެރިކާގެ ރައީސް ޑޮނާލްޑް ޓްރަމްޕް ވިދާޅުވީ، މެދުއިރުމަތީގެ ސުލްޙައިގެ މައްސަލައިގައި އޭނާގެ މުޝީރުން ގިނަ މަސައްކަތްތަކެއް ކުރަމުންދާ ކަމަށާ މިކަމުގައި އިސްރާއީލާ ސަޢޫދީ ޢަރަބިއްޔާ ފަދަ ޤައުމުތަކުން ވެސް ހަރުދަނާ މަސައްކަތްތަކެއް ކުރަމުންދާ ކަމަށެވެ. އަދި މިކަމުގައި އެއްބަސްވުމެއް ޤާއިމުކުރެވޭނެ ފުރުޞަތު އޮތް ކަމަށް ޤަބޫލު ކުރައްވާ ކަމަށާ މިކަމަށްޓަކައި ކެނޑިނޭޅި މަސައްކަތްތައް ކުރައްވާނެ ކަމަށް ވެސް އެމެރިކާގެ ރައީސް ވިދާޅުވިއެވެ. އަދި މިއީ ވަރަށް މުހިއްމު ވަގުތެއް ކަމަށާ، އެމެރިކާއިން ބޭނުން ވަނީ ހުސް ވަޢުދުތަކެއް ވުމުގެ ބަދަލުގައި މިކަމުގައި ކާމިޔާބު ހޯދުމަށް ކަމަށްވެސް ޓްރަމްޕް ވިދާޅުވިއެވެ.
މި ބައްދަލުކުރެއްވުމަށް ފަހު އދގެ ޢާއްމު މަޖިލީހުގެ 72 ވަނަ ޖަލްސާގައި ތަޤްރީރު ކުރައްވަމުން ފަލަސްޠީނުގެ ރައީސް މަހްމޫދު އައްބާސް ވިދާޅުވީ، ފަލަސްޠީނުގެ ސަރަހައްދުތަކުގައި އިސްރާއީލުން ނުހައްޤުން ކުރަމުންދާ އިސްތީޢުމާރީ ހަރަކާތްތައް ވަކި ތާވަލެއްގެ ތެރެއިން ހުއްޓުވަން ޖެހޭ ކަމަށެވެ. އަދި ފަލަސްޠީނުގެ ބިންތަކުގައި އިސްރާއީލުން ހިންގަމުންދާ ޤާނޫނާ ޚިލާފު އިސްތިޢުމާރީ ހަރަކާތްތަކާ ޢަމަލުތަކަށް ހުއްޓުމަކަށް ގެނައުން ވެގެންދާނީ ޓެރަރިޒަމާ ދެކޮޅަށް ކުރާ ހަނގުރާމައިގައި ލިބިގެންދާނެ ބޮޑު ކުރިއެރުމަކަށްވާނެ ކަމަށެވެ. އަދި އިސްރާއީލުގެ އަނިޔާވެރި އިސްތިއުމާރު، ޓެރަރިސްޓް ފަރާތްތަކުން ހަމަލާތައް ދިނުމުގެ ނިވާފަތްގަނޑަކަށް ހަދަމުންދާ ކަމަށް ވެސް އައްބާސް ވިދާޅުވިއެވެ.
އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވެސް މިހަފްތާގައި އެމެރިކާގެ ރައީސް ޓްރަމްޕާ ބައްދަލުކުރައްވާފައިވާއިރު އިސްރާއީލާ ފަލަސްޠީނުގެ އިސްވެރިން ވެސް ވަނީ އެމެރިކާގެ ރައީސަށް ތަޢުރީފުކުރައްވާ ވާހަކަތައް ދައްކަވާފައެވެ.
އިސްރާއީލާ ފަލަސްޠީނާ ދެމެދު އެންމެ ފަހުން ސީދާ ސުލްޙައިގެ ވާހަކަތައް ބާއްވާފައިވަނީ 2013 ވަނަ އަހަރުގެ އޭޕްރިލްމަހުއެވެ. އެފަހަރުގެ ވާހަކަތައް މެދުކަނޑާލީ އިސްރާއީލުން ޤަވާއިދާ ޚިލާފަށް ވެރިވެގަތްފައިވާ ފަލަސްޠީނުގެ ބިމުގައި ނުހައްޤުން ޔަހޫދީން ވަޒަންވެރިކުރުމުގެ މަޝްރޫޢުތައް ކުރިއަށް ގެންދާ ގެންދިއުން ހުއްޓާ ނުލުމުގެ ސަބަބުންނެވެ.