ިރާޤުގެ ކުރުދީ ސަރަހައްދުގެ ރައީސް މައްސޫދު ބަރްޒާނީގެ ދައުރު ހަމަވުމަށްފަހު، އިތުރު ދައުރަކަށް ވެރިކަމުގައި ދެމި ނުހުންނަވާނެކަމަށް ކުރުދީ ސަރުކާރުން ހާމަކޮށްފިއެވެ. ބަރްޒާނީ ވެރިކަމުން ދުރުވެވަޑައިގަންނަވާކަން ހާމަކޮށްފައި މިވަނީ އިރާޤުގެ މައި ސަރުކާރުން ވަކިވުމަށް ކުރުދީ ސަރުކާރުން ކުރަމުންދާ މަސައްކަތްތައް ނާކާމިޔާބުވެފައިވާ ދަނޑިވަޅެއްގައެވެ.
އިރާޤުގެ ކުރުދީ ސަރުކާރުން އެގައުމުގެ މައި ސަރުކާރާ ވަކިވުމަށް ސެޕްޓެމްބަރު މަހުގެ 25 ވަނަ ދުވަހު ނެގި ފެންނަ ނުފެންނަ
ވޯޓުގައި ބައިވެރިވި ތިން މިލިއަން މީހުންގެ ތެރެއިން 93 އިންސައްތަ މީހުން ބޭނުން ވަނީ ކުރުދީންގެ އަމިއްލަ ދައުލަތެއް ޤާއިމުކުރުމަށެވެ. އެހެންނަމަވެސް މައި ސަރުކާރުން މި ނަތީޖާ އާއި ވޯޓު ބަލައިގަތުމަށް ދެކޮޅު ހަދާފައިވާއިރު މި ވޯޓުގެ ފަހުން މައި ސަރުކާރުން ކުރުދީ ސަރުކާރާ ދެކޮޅަށް މިވަނީ ފިޔަވަޅުތައްވެސް އަޅާފައެވެ. އެގޮތުން އޮކްޓޯބަރު މަހުގެ ކުރީކޮޅު އިރާޤުގެ މައި ސަރުކާރުން ވަނީ، ކުރުދީ ސަރަހައްދުގައި ހުންނަ ބައިނަލްއަޤުވާމީ ވައިގެ ބަނދަރުތަކަށް ބައިނަލްއަޤުވާމީ އުދުހުންތައް ކުރުން ހުއްޓާލުމަށް ޢަމުރުކޮށްފައެވެ. އަދި ކުރުދީ ސަރަހައްދުގައި ހުންނަ ބޭންކުތަކަށް ޑޮލަރު ވިއްކުން ވެސް މައި ސަރުކާރުން މިވަނީ ހުއްޓާލާފައެވެ.އަދި ކުރުދީން އެކްސްޕޯޓް ުރާ ތެޔޮ ނުގަތުމަށްވެސް މައި ސަރުކާރުން ވަނީ ބައިނަލްއަޤްވާމީ ދުނިޔެއަށް ގޮވާލާފައެވެ.
މިކަންކަމުގެ ސަބަބުން ކުރުދީންގެ މުސްތަގްބަލާމެދު މިހާރު ސުވާލުތައް އުފެދިފައިވާއިރު، ކުރުދީންގެ މިނިވަން ދައުލަތެއް ޤާއިމުކުރުމަށް އެންމެ ގަދައަށް މަސައްކަތް ކުރެއްވި އެސަރަހައްދުގެ ރައީސް މައްސޫދު ބަރްޒާނީ މިވަނީ ނޮވެމްބަރު މަހުގެ ފުރަތަމަ ދުވަހު ރައީސްކަމުގެ ދައުރު ހަމަވުމަށްފަހު އެ މަޤާމުގައި ދެމި ނުހުންނަވާނެކަން އިޢުލާންކުރައްވާފައެވެ.
މިހާރުގެ ރައީސްގެ ރިޔާސަތު ހަމަވުމުގެ ނިޔަލަށް އެ ގައުމުގައި ރިޔާސީ އިންތިޚާބެއް ބޭއްވިފައި ނުވާތީ، ރިޔާސަތުގެ ބާރުތައް ޤާނޫނު ހަދާ މަޖިލީހާއި ޝަރުޢީ ބާރުތަކާ ދެމެދު ބަހާލުމަށް ބަރްޒާނީ ޢަމުރުކުރައްވާފައިވާކަމަށް ކުރުދީ ސަރުކާރުން ނެރުނު ބަޔާނެއްގައި ބުނެފައިވެއެވެ. ކުރުދީ ސަރަހައްދުގައި އެކެއް ނޮވެމްބަރުގައި ރިޔާސީ އަދި ޢާއްމު އިންތިޚާބެއް ބޭއްވުމަށް މީގެ ކުރިން ހަމަޖައްސާފައިވާ ނަމަވެސް ސެޕްޓެމްބަރުމަހުގެ ފެންނަ ނުފެންނަ ވޯޓަށްފަހު އުފެދުނު ނުތަނަވަސްކަމުގެ ސަބަބުން މި އިންތިޚާބުތައް ވަނީ ވަކި މުއްދަތެއް ނެތި ފަސްކޮށްފައެވެ.
ޢުމުރުން 71 އަހަރުގެ ބަރްޒާނީ ކުރުދީ ސަރަހައްދުގެ ރިޔާސަތާ އެންމެ ފުރަތަމަ ހަވާލުވެވަޑައިގަތީ 2005 ވަނަ އަހަރުގައެވެ. ކުރުދީ ސަރަހައްދުގައި އެންމެ ފަހުން ބޭއްވި ރިޔާސީ އިންތިޚާބު 2009 ވަނަ އަހަރު ކާމިޔާބު ކުރެއްވީ ވެސް ރައީސް ބަރްޒާނީއެވެ