ރާއްޖޭގައި އޮތް އެންމެ ބޮޑު އަދި އެންމެ ކާމިޔާބު ސިޔާސީ ޕާޓީއަކަށް ޕްރޮގްރެސިވް ޕާޓީ އޮފް މޯލްޑިވްސް، ޕީޕީއެމްވެފައި ވަނީ އެޕާޓީގެ އާންމު މެމްބަރުންނާއި ހެޔޮއެދޭ ފަރާތްތަކުގެ ބުރަ މަސައްކަތުން ކަމަށް އެޕާޓީން ބުނެފިއެވެ.
ސަރުކާރު ހިންގާ މައިޕާޓީ ޕީޕީއެމްގެ ހަވަނަ އަހަރީ ދުވަހުގެ މުނާސަބަތުގައި އެޕާޓީން ނެރުނު ތަހުނިޔާގެ މެސެޖެއްގައި ވަނީ ޕާޓީގެ ހަވަނަ އަހަރީ ދުވަހުގެ ތަހުނިޔާއާ މުބާރަކުބާދީ ޕާޓީގެ މުޝްތަޝާރު އަދި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާ އެޕާޓީގެ އާންމު މެމްބަރުންނަށް އަރިސްކޮށްފައެވެ.
މި ތަހުނިޔާގެ މެސެޖުގައި ބުނެފައިވަނީ މިހާތަނަށް އެޕާޓީއަށް ލިބިފައިވާ ކާމިޔާބީތައް ދެމެހެއްޓުމުގައި މިހާރަށްވުރެ ބޮޑަށް ޕާޓީގެ އެންމެހާ މެމްބަރުންނާއި އަދި އެކި ގޮތްގޮތުން އެޕާޓީއަށް އެހީތެރިވެވަޑައިގެން ދެއްވާ ފަރާތްތަކުން ދިވެހި ރައްޔިތުންގެ ހައްޤުގައި މަސައްކަތް ކޮށްދެއްވާނެ ކަމުގެ ޔަޤީންކަން އެ ޕާޓީއަށް އެބައޮތް ކަމަށެވެ. ޕީޕީއެމްއިން ވަނީ އެޕާޓީގެ އެންމެހާ އާންމު މެމްބަރުންނަށާއި ދިވެހި ރައްޔިތުންނަށް އުފާފާގަތިކަމާއި ހަމަޖެހުމާއި ކާމިޔާބީއާ ކުރިއެރުން އެދޭ ކަމަށް ބުނެފައެވެ.