މިދިޔަ އޯގަސްޓުމަހުގެ 25 ވަނަ ދުވަހުން ފެށިގެން މިޔަންމާގެ ރަކާން ސްޓޭޓްގައި ރޮހިންޔާ ދަރިކޮޅުގެ މުސްލިމުންނާ ދެކޮޅަށް މިޔަންމާގެ އަސްކަރިއްޔާއިން ހިންގި ޖަރީމާތަކުން ސަލާމަތްވެގެން އަވަށްޓެރި ބަންގްލަދޭޝަށް ހިޖުރަކުރި އެތަށް ހާސް މީހުން އަނބުރާ މިޔަންމާއަށް ގެންދިޔުން ލަސްވަނީ، މި ކަމުގައި ބަންގްލަދޭޝުން ދޭންޖެހޭ އެއްބާރުލުން ނުދޭތީކަމަށް މިޔަންމާ ސަރުކާރުން ތުހުމަތުކޮށްފިއެވެ.
އޯގަސްޓް މަހުގެ ފަހުކޮޅު ރަކާންގައި ހިންގި ޖަރީމާތަކުގެ ސަބަބުން 600،000 މީހުން ވަނީ ބަންގްލަދޭޝަށް ހިޖުރަކޮށްފައެވެ. އެ މީހުން އަނބުރާ ވަޒަނަށް ގެނައުމަށް ކުރާ މަސައްކަތްތަކާ ބެހޭގޮތުން ވާހަކަދައްކަވަމުން މިޔަންމާގެ ލީޑަރު އައުން ސަން ސޫޗީގެ ތަރުޖަމާނު ޒައު ތާއި ވިދާޅުވީ، މިޔަންމާގެ ރެފިއުޖީން އަނބުރާ ގައުމަށް ގެނައުމަށް، އެ ގައުމާއި ބަންގްލަދޭޝާއެކު 1990ގެ އަހަރުތަކުގައި ޤާއިމުކޮށްފައިވާ އެއްބަސްވުމުގެ ދަށުން މިޔަންމާއިން އެކަން ފަށަން ތައްޔާރަށް އޮތްކަމަށެވެ. އެހެންނަމަވެސް ބަންގްލަދޭޝުން މިކަން ޤަބޫލުކުރާކަން އަދި ހާމަކޮށްފައި ނުވާކަމަށް ތާއި ފާހަގަކުރެއްވިއެވެ.
އޭނާ ވަނީ، މިކަމުގައި ބަންގްލަދޭޝްއިން ލަސްކުރަމުންދަނީ ބައިނަލްއަޤުވާމީ ދުނިޔެއިން މިކަމަށް ދޭ މާލީ އެހީގެ ސަބަބުންކަމަށް ދޭހަވާ ފަދަ މޭރުމަކުން ވާހަކަ ދައްކަވާފައެވެ. މިޔަންމާގެ މި ތުހުމަތުތަކާ ބެހޭގޮތުން ބަންގްލަދޭޝުން އެއްޗެއް ބުނެފައެއް ނުވެއެވެ. ހުސްވި ހަފުތާގައި ބަންގްލަދޭޝުން ބުނެފައިވަނީ މިކަމުގައި ދެ ގައުމުގެ ދެމެދު އެންމެ ފަހުން ކުރިއަށްގެންދިޔަ ވާހަކަތަކުގައި ބަންގްލަދޭޝުން ހުށަހަޅާފައިވާ 10ނުކުތާގެ އެއްބަސްވުން ޤަބޫލުކުރުމަށް މިޔަންމާއިން ދެކޮޅުހެދިކަމަށެވެ.