ތައިލެންޑްގައި ސިޔާސީ ހަރަކާތްތައް މަނާކޮށްފައި އޮންނަ އޮތުން ނިމުމަކަށް ގެނައުމަށް، އެގައުމުގެ އެންމެ ބޮޑު ސިޔާސީ އެއް ޕާޓީ ކަމަށްވާ ޕުއެތައި ޕާޓީން ގޮވާލައިފިއެވެ.
ތައިލެންޑްގެ ކުރީގެ ބޮޑުވަޒީރު ތަކްސިން ޝިނަވަޓްރާ އުފެއްދެވި ޕުއެތައި ޕާޓީން ތައި އަސްކަރީ ސަރުކާރަށް ގޮވާލީ، ތައިލެންޑަށް އަލުން ޑިމޮކްރަސީ ގެނައުމުގެ މަސައްކަތް އަވަސްކޮށް، ސިޔާސީ ހަރަކާތްތައް މަނާކޮށްފައި އޮންނަ އޮތުން ނިމުމަކަށް ގެނައުމަށެވެ. އަދި ހުރިހާ ސިޔާސީ ޕާޓީތަކަށް ފުރުސަތު އޮންނަ ގޮތަށް، ޤާނޫނު ހަދާ މަޖިލީހުގެ އިންތިޚާބު ބޭއްވުމަށްވެސް އެ ޕާޓީން ގޮވާލާފައިވެއެވެ.
ތައިލެންޑްގެ އަސްކަރީ ވެރިޔާ އަދި ބޮޑުވަޒީރު ޖެނެރަލް ޕްރަޔުތު ޗާނޯޗާ ވަނީ، ދެހާސް އަށާރަވަނަ އަހަރުގެ ފަހުކޮޅު އެ ގައުމުގައި އިންތިޚާބު ބާއްވާނެކަން އިޢުލާން ކުރައްވާފައެވެ. ނަމަވެސް އިންތިޚާބު ބާއްވާނެ ތާރީޚެއް ކަނޑައަޅާފައެއްނުވެއެވެ. މީގެކުރިންވެސް އިންތިޚާބު ބޭއްވުމަށް ނިންމުމަށްފަހު އަސްކަރީ ސަރުކާރުން ވަނީ އިންތިޚާބު ފަސްކޮށްފައެވެ.
އިންތިޚާބު ބޭއްވުން އަދިވެސް ފަސްކޮށްފާނެކަމުގެ ބިރު އެބަ އޮތްކަމަށާއި، ތައި އަސްކަރީ ވެރިން ވެރިކަމުން ފައިބަން ބޭނުންނުވާކަމުގެ ނިޝާންތައް ފެންނަމުންދާ ކަމަށް ޕޮއެ-ތައި ޕާޓީން ނެރުނު ބަޔާނެއްގައި ބުނެފައިވެއެވެ.
ތައިލެންޑްގައި އެންމެ ފަހުން ހުންނެވި ބޮޑުވަޒީރު ޔިންގްލަކް ޝިނަވަޓްރާގެ ވެރިކަން ވައްޓާލައި އެކަމަނާ މަޤާމުން ދުރުކުރީ، ދެހާސް ސާދަވަނަ އަހަރު ގެނައި އަސްކަރީ އިންޤިލާބެއްގައެވެ. އެ އިންޤިލާބުގެ ވެރިއަކަށް ހުންނެވީ ތައިލެންޑްގެ ސިފައިންގެ ވެރިޔާ ޖެނެރަލް ޕްރަޔުތު ޗާނޯޗާއެވެ. އެއަށްފަހު ޔިންގްލަކްގެ މައްޗަށް ކޮރަޕްޝަންގެ ދައުވާ ސާބިތުވެ އެކަމަނާގެ މައްޗަށްވަނީ ފަސް އަހަރު ދުވަހުގެ ޖަލު ޙުކުމެއް އިއްވާފައެވެ.