ކޮޕަރްޝަންގެ ތުހުމަތުގައި ސައޫދީ ޝާހީ އާއިލާގެ ބައެއް އިސް ބޭފުޅުންނާއި ކުރީގެ ބައެއް ވަޒީރުންނާއި ނަން މަޝްހޫރު ބައެއް ވިޔަފާރިވެރިން ހައްޔަރުކޮށްފައިވާ މައްސަލައިގައި އެމެރިކާއިން ކަންބޮޑުވުން ފާޅުކޮށްފިއެވެ.
ހައްޔަރުކޮށްފައިވާ ބޭފުޅުންގެ މައްސަލާގައި ކަންބޮޑުވުންތަކެއް ހުރިކަން ސައޫދި ޚާރިޖީ ވަޒީރު އާދިލްއަލްޖުބައިރަށް ދަންނަވާފައިވާނެ ކަމަށާއި ޖުބައިރުގެ އަރިހުން ބައެއް ކަންކަން ސާފުކުރައްވާފައިވާނެކަމަށް، އެމެރިކާގެ ޚާރިޖީ ވަޒީރު ރެކްސް ޓިލަރސަން ވިދާޅުވިއެވެ. މި މައްސަލައިގައި ކަންބޮޑުވާކަން ޓިލަރސަން ހާމަކުރައްވާފައި މިވަނީ ސައޫދީ ސަރުކާރުގެ އެ ފިޔަވަޅަށް ތާއީދުކުރައްވައި އެމެރިކާގެ ރައީސް ޑޮނަލްޑް ޓްރަމްޕް ވާހަކަދައްކަވާފައިވާ ދަނޑިވަޅެއްގައެވެ.
ކޮރަޕްޝަންގެ ތުހުމަތުގައި ހައްޔަރުކުރި ބޭފުޅުންގެ މައްސަލައިގައި އެމެރިކާއިން ކަންބޮޑުވާ ކަމަށާއި، އެ ބޭފުޅުންގެ ތަޙުޤީޤުތައް، އިންސާފުވެރި ގޮތެއްގައި ކުރިޔަށްގެންދިޔުމަށް ސައޫދީ ސަރުކާރުގެ ކިބައިން އެދޭކަމަށް، އެމެރިކާގެ ޚާރިޖީ ވުޒާރާގެ ތަރުޖަމާނު ހެދަރ ނުއަރޓް ވިދާޅުވިއެވެ. ކޮރަޕްޝަންގެ ތުހުމަތުގައި ހައްޔަރުކޮށްފައިވާ ބޭފުޅުންގެ ޢަދަދު ދުއިސައްތައަށް އަރާފައިވާއިރު ކޮރަޕްޝަންގެ ދަޢުވާ އުފުލަންޖެހޭ ފަރާތްތައް ވަރަށް އަވަހަށް ކަނޑައަޅާނެ ކަމަށް ސަޢުދީ ބަންޑާރަނައިބު ވަނީ ވިދާޅުވެފައެވެ.
ހައްޔަރުކޮށްފައިވާ ފަރާތްތަކުން ފާއިތުވީ އަހަރުތަކުގައި ސަޢުދީ ދައުލަތުގެ ޚަޒާނާއިން ސަތޭކަ ބިލިޔަން ޑޮލަރަށްވުރެ ގިނަ ޢަދަދެއްގެ ފައިސާއަށް ޚިޔާނާތްތެރިވެފައިވާކަމުގެ ހެކިތައް އެބަހުރި ކަމަށްވެސް ސައޫދީ ބަންޑާރަނާއިބު ވިދާޅުވިއެވެ.